Okubikkulirwa 3:1-22 LGCB2014 - Bible AI

¹“Eri malayika owʼEkkanisa eyʼomu Saadi wandiika nti, Bwʼati bwʼayogera oyo alina emyoyo omusanvu egya Katonda nʼemmunyeenye omusanvu nti, Mmanyi ebikolwa byo, ngʼolina erinnya eriraga nti oli mulamu so nga oli mufu.

²Kale weegendereze onyweze ebikyasigaddewo ebitannafa. Kubanga mu byʼokola sinnalabamu byʼotuukiriza mu maaso ga Katonda wange.

³Kale jjukira bye wayigirizibwa ne bye wawulira obikwate era weenenye. Bwʼotegendereze ndijja mangu ngʼomubbi, so tolimanya ssaawa gye ndijjiramu gyʼoli.

⁴Naye waliwo abamu mu Saadi abatonotono abatayonoonanga byambalo byabwe, balitambula nange nga bambadde engoye enjeru, kubanga basaanidde.

⁵Na buli awangula alyambazibwa engoye enjeru nga bali, era sirisangula linnya lye mu kitabo kyʼobulamu, naye ndyatula erinnya lye mu maaso ga Kitange ne bamalayika be nti Oyo muntu wange.

⁶Alina amatu awulire Omwoyo kyʼagamba Ekkanisa ezo.”

⁷“Eri malayika owʼEkkanisa eyʼomu Firaderufiya wandiika nti, Bwʼati bwʼayogera oyo Omutukuvu era owʼamazima era alina ekisumuluzo kya Dawudi aggulawo ne wataba aggalawo, nʼokuggalawo ne wataba aggulawo.

⁸Mmanyi ebikolwa byo. Laba nkugguliddewo oluggi, omuntu yenna lwʼatayinza kuggala; kubanga olina amaanyi matono, okuumye ekigambo kyange nʼoteegaana linnya lyange,

⁹laba nnyinza okuwaayo abamu ku abo abʼomu kuŋŋaaniro lya Setaani abeeyita Abayudaaya; laba ndibaleeta okusinziza ku bigere byammwe bategeere nti Mbaagala.

¹⁰Olwokubanga wakwata ekigambo kyange ekyʼokugumiikiriza, nange ndikuwonya ekiseera ekyʼokugezesebwa ekinaatera okujja.

¹¹Nzija mangu! Nnyweza kyʼolina waleme kubaawo akutwalako ngule yo.

¹²Awangula ndimufuula empagi mu Yeekaalu ya Katonda wange, mwʼataliva emirembe gyonna, era ndimuwandiikako erinnya lya Katonda wange, nʼerinnya lyʼekibuga kya Katonda wange, Yerusaalemi ekiggya nga kikka okuva mu ggulu eri Katonda wange nʼerinnya lyange eriggya.

¹³Alina amatu awulire Omwoyo kyʼagamba Ekkanisa ezo.”

¹⁴“Eri malayika owʼEkkanisa eyʼomu Lawodikiya wandiika nti, Bwʼati bwʼayogera oyo Amiina, omujulirwa, omwesigwa, owʼamazima, omukulu wʼabaliwo, nʼabalibaawo emirembe gyonna, era ensibuko yʼebitonde bya Katonda.

¹⁵Mmanyi ebikolwa byo: toyokya so tonnyogoga, nandiyagadde obe ngʼoyokya oba ngʼonnyogoga.

¹⁶Naye olwokubanga oli wa kibuguumirize toyokya so tonnyogoga, kinaandetera okukuwandula okuva mu kamwa kange.

¹⁷Olwokubanga ogamba nti, ‘Ndi mugagga era nnina ebintu bingi, sso siriiko kye neetaaga. Sirina kimbulako!’ Sso nʼotomanya ngʼoli munaku asaasirwa, omwavu, omuzibe wʼamaaso era ali obwereere.

¹⁸Nkuwa amagezi onguleko ebya zaabu, eyalongoosebwa mu muliro, olyoke ogaggawale. Era onguleko ebyambalo ebyeru, obyambale, owone ensonyi ezʼokuyita obwereere; onguleko nʼomuzigo osiige ku maaso go, osobole okulaba.

¹⁹Buli gwe njagala mmunenya era mmukangavvula; kale nyiikira okwenenya.

²⁰Laba nnyimiridde ku luggi era nkonkona. Buli awulira eddoboozi lyange nʼaggulawo, nnaayingira omumwe ne tuliira wamu ffembi.

²¹Buli awangula ndimukkiriza okutuula ngʼanninaanye, ku ntebe yange eyʼobwakabaka, nga nange bwe nawangula ne ntuula ne Kitange ku ntebe ye.

²²Alina amatu awulire Omwoyo kyʼagamba Ekkanisa ezo.”