Okubikkulirwa 5:1-14 LGCB2014 - Bible AI

¹Awo ne ndaba omuzingo gwʼekitabo mu mukono ogwa ddyo ogwʼOyo eyali atudde ku ntebe eyʼobwakabaka, nga guwandiikiddwamu munda ne kungulu era nga guteekeddwako obubonero bwʼenvumbo musanvu.

²Ne ndaba malayika owʼamaanyi ngʼayogera mu ddoboozi eryʼomwanguka ngʼabuuza nti, “Ani asaanidde okubembulula obubonero obusibiddwa ku muzingo gwʼekitabo guno alyoke aguzingulule?”

³Ne wataba nʼomu mu ggulu newaakubadde ku nsi, wadde wansi wʼensi, eyayinza okugwanjuluza wadde okugutunulamu.

⁴Awo ne nkaaba amaziga mangi, kubanga tewaalabikawo nʼomu eyasaanira okwanjuluza omuzingo newaakubadde okugutunulamu.

⁵Awo omu ku bakadde abiri mu abana nʼaŋŋamba nti, “Lekeraawo okukaaba, kubanga, laba, empologoma eyʼomu kika kya Yuda, owʼomu lulyo lwa Dawudi, yawangula, era yʼayinza okukutula obubonero omusanvu obwʼenvumbo nʼokuzingulula omuzingo gwʼekitabo.”

⁶Ne ndaba nga ali ngʼOmwana gwʼEndiga ngʼattiddwa ngʼayimiridde wakati wʼentebe eyʼobwakabaka nʼebiramu ebina, ne wakati wʼabakadde, ngʼalina amayembe musanvu nʼamaaso musanvu, gyʼemyoyo omusanvu egya Katonda, egitumibwa mu buli kitundu ekyʼensi.

⁷Nʼasembera nʼaggya omuzingo gwʼekitabo mu mukono ogwa ddyo ogwʼOyo eyali atudde ku ntebe eyʼobwakabaka.

⁸Bwe yagukwata, ebiramu ebina nʼabakadde amakumi abiri mu abana, ne bagwa mu maaso gʼOmwana gwʼEndiga ne bavuunama, buli omu ngʼalina ennanga era ngʼakutte ekibya ekya zaabu, ekyali kijjudde obubaane obwakaloosa nga butegeeza okusaba kwʼabantu abatukuvu.

⁹Baali bamuyimbira oluyimba oluggya nti,

⁹“Ggwʼosaanidde okutoola omuzingo gwʼekitabo, nʼokusumulula ebigusibye nʼokuguzingulula, kubanga wattibwa, omusaayi gwo ne gununula abantu ba Katonda okubaggya mu buli kika, na buli lulimi, na buli ggwanga, na buli nsi.

¹⁰Nʼobafuula obwakabaka ne bakabona ba Katonda okumuweerezanga, era be balifuga ensi.”

¹¹Awo ne ndaba era ne mpulira eddoboozi lya bamalayika enkumi nʼenkumi, nʼenkuyanja nga beetoolodde entebe eyʼobwakabaka awamu nʼebiramu biri nʼabakadde bali.

¹²Ne boogera mu ddoboozi eryʼomwanguka nti,

¹²“Omwana gwʼEndiga eyattibwa, asaanidde okuweebwa obuyinza, nʼobugagga, nʼamagezi nʼamaanyi, nʼekitiibwa, nʼettendo nʼokwebazibwa!”

¹³Ne ndyoka mpulira buli kitonde kyonna mu ggulu ne ku nsi ne wansi wʼensi ne mu nnyanja ne byonna ebigirimu nga bitendereza nti, “Okutenderezebwa, nʼettendo, nʼekitiibwa, nʼamaanyi byʼOyo atudde ku ntebe yʼobwakabaka awamu nʼOmwana gwʼEndiga, emirembe nʼemirembe.”

¹⁴Ebiramu ebina ne biddamu nti, “Amiina.” Nʼabakadde ne bavuunama ne bamusinza.