Okubikkulirwa 7:1-17 LGCB2014 - Bible AI

¹Oluvannyuma lwʼebyo, ne ndaba bamalayika bana nga bayimiridde ku njuyi ennya ezʼensi, nga bakutte empewo ennya ezʼensi zireme okukunta, waleme kubaawo mpewo ekunta ku nsi, wadde ku nnyanja wadde ku muti gwonna.

²Ne ndaba malayika omulala ngʼava ebuvanjuba ngʼakutte akabonero kʼenvumbo aka Katonda omulamu, nʼayogera mu ddoboozi eryʼomwanguka ngʼagamba bamalayika abana abaali baweereddwa obuyinza okwonoona ensi nʼennyanja nti,

³“Temukola kintu kyonna, ekinaayonoona ensi, nʼennyanja oba emiti, okutuusa nga tumaze okuteeka akabonero kʼenvumbo ka Katonda akakulu ku byenyi byʼabaweereza ba Katonda waffe.

⁴Awo ne mpulira omuwendo gwʼabo abaateekebwako akabonero kʼenvumbo nga baali emitwalo kkumi nʼena mu enkumi nnya (144,000) okuva mu bika ekkumi nʼebibiri ebya Isirayiri.

⁵Abʼomu kika kya Yuda omutwalo gumu mu enkumi bbiri (12,000), abʼomu kika kya Lewubeeni omutwalo gumu mu enkumi bbiri (12,000), abʼomu kika kya Gaadi omutwalo gumu mu enkumi bbiri (12,000),

⁶abʼomu kika kya Aseri omutwalo gumu mu enkumi bbiri (12,000), abʼomu kika kya Nafutaali omutwalo gumu mu enkumi bbiri (12,000), abʼomu kika kya Manaase omutwalo gumu mu enkumi bbiri (12,000),

⁷abʼomu kika kya Simyoni omutwalo gumu mu enkumi bbiri (12,000), abʼomu kika kya Leevi omutwalo gumu mu enkumi bbiri (12,000), abʼomu kika kya Isakaali omutwalo gumu mu enkumi bbiri (12,000),

⁸abʼomu kika kya Zebbulooni omutwalo gumu mu enkumi bbiri (12,000), abʼomu kika kya Yusufu omutwalo gumu mu enkumi bbiri (12,000), abʼomu kika kya Benyamini omutwalo gumu mu enkumi bbiri (12,000). Abo be baateekebwako akabonero kʼenvumbo.”

⁹Oluvannyuma lwʼebyo ne ndaba, era laba, ekibiina kyʼabantu ekinene ennyo nga tebasoboka na kubalika, nga bava mu buli nsi na buli kika, na buli ggwanga na buli lulimi, nga bayimiridde mu maaso gʼentebe eyʼobwakabaka ne mu maaso gʼOmwana gwʼEndiga nga bambadde ebyambalo ebyeru nga balina nʼenkindu mu ngalo zaabwe.

¹⁰Ne boogera mu ddoboozi eryʼomwanguka nga bagamba nti,

¹⁰“Obulokozi bwa Katonda waffe atudde ku ntebe eyʼobwakabaka era bwa Mwana gwʼEndiga.”

¹¹Awo bamalayika bonna ne bayimirira nga beetoolodde entebe eyʼobwakabaka nʼabakadde era nʼebiramu ebina, ne bavuunama mu maaso gʼentebe eyʼobwakabaka ngʼebyenyi byabwe biri wansi ne basinza Katonda.

¹²Ne bayimba nti,

¹²“Amiina! Okutenderezebwa, nʼekitiibwa, nʼamagezi, nʼokwebazibwa, nʼettendo, nʼobuyinza, nʼamaanyi, bibe eri Katonda waffe emirembe nʼemirembe. Amiina!”

¹³Awo omu ku bakadde nʼambuuza nti, “Bano abambadde ebyambalo ebyeru obamanyi, era omanyi gye bava?”

¹⁴Ne nziramu nti. “Mukama wange, gwʼomanyi.” Nʼaŋŋamba nti, “Bano be baayita mu kubonaabona okunene, ne bayoza ebyambalo byabwe ne babitukuza mu musaayi gwʼOmwana gwʼEndiga.

¹⁵Kyebavudde

¹⁵babeera wano mu maaso gʼentebe eyʼobwakabaka eya Katonda nga bamusinza emisana nʼekiro mu Yeekaalu ye. Oyo atudde ku ntebe eyʼobwakabaka, anaaberanga nabo ngʼabalabirira.

¹⁶Tebaliddayo kulumwa njala wadde ennyonta, newaakubadde omusana okubookya wadde ekyokya ekirala kyonna;

¹⁷kubanga Omwana gwʼEndiga ayimiridde mu maaso gʼentebe eyʼobwakabaka, yʼanaabeeranga omusumba waabwe era yʼanaabakulemberanga okubatwala eri ensulo ezʼamazzi agʼobulamu. Era Katonda alisangula buli zziga mu maaso gaabwe.”