Okukungubaga 1:1-22 LGCB2014 - Bible AI

¹ⓐ Ekibuga ekyajjulanga abantu nga kyabuliddwa! Ekyabanga ekyʼamaanyi mu mawanga, nga kifuuse nga nnamwandu! Eyali kabaka omukazi ngʼalina amasaza, afuuse omuddu omukazi.

²Ekiro akaaba nnyo nnyini, nʼamaziga ne gakulukuta ku matama ge. Mu baganzi be bonna, talina nʼomu amubeesabeesa. Mikwano gye bonna bamuliddemu olukwe, bafuuse balabe be.

²

³ⓑ Yuda agenze mu buwaŋŋanguse oluvannyuma lwʼokubonaabona nʼokukozesebwa nʼobukambwe ngʼomuddu. Kati abeera mu bannamawanga, talaba kifo kya kuwummuliramu. Bonna abamunoonya bamusanga mu nnaku ye.

³

⁴Enguudo za Sayuuni zikungubaga, kubanga tewali nʼomu ajja ku mbaga zaakyo ezaalagibwa. Emiryango gye gyonna girekeddwa awo, bakabona be, basinda; bawala be abaweereza bali mu buyinike, naye yennyini ali mu nnaku.

⁴

⁵Abamuyigganya bafuuse bakama be; abalabe be beeyagala, kubanga Mukama amuleeseeko ennaku, olwʼebibi bye ebingi. Abaana be batwalibbwa mu buwaŋŋanguse, bawambiddwa omulabe.

⁵

⁶Ekitiibwa kyonna ekyali ku muwala wa Sayuuni kimuweddeko, abalangira be bafuuse ngʼennangaazi ezibuliddwa omuddo; mu bunafu, badduse ababagoba.

⁶

⁷Mu nnaku ezʼokubonaabona kwe ngʼasagaasagana, Yerusaalemi ajjukira ebintu ebyʼomuwendo byonna bye yalinanga mu nnaku ezʼedda. Abantu be bwe baagwa mu mikono gyʼomulabe, tewaali nʼomu amubeera; abalabe be ne bamutunuulira ne bamusekerera olwʼokugwa kwe.

⁷

⁸Yerusaalemi yayonoona nnyo nnyini, bwʼatyo nʼafuuka atali mulongoofu. Bonna abaamussangamu ekitiibwa bamunyooma, kubanga balabye bwʼasigalidde awo; ye yennyini asinda, era akwatibwa ensonyi.

⁸

⁹Obutali bulongoofu bwe bwali mu birenge bye; teyassaayo mwoyo ku bulamu bwe obwʼebiseera ebijja. Okugwa kwe kwali kwa kyewuunyo; tewaali nʼomu amubeesabeesa. “Ayi Mukama, tunuulira okubonaabona kwange, kubanga omulabe awangudde.”

⁹

¹⁰Omulabe yagololera omukono ku bintu bya Yerusaalemi byonna ebyʼomuwendo; yalaba amawanga amakaafiiri nga gayingira awatukuvu we, beebo be wali ogaanye okuyingira mu kuŋŋaaniro lyo.

¹⁰

¹¹Abantu be bonna basinda nga bwe banoonya ekyokulya; ebyʼobugagga byabwe babiwanyisaamu emmere, okusobola okuba abalamu. “Laba, Ayi Mukama Katonda, onziseeko omwoyo kubanga nnyoomebwa.”

¹¹

¹²“Mmwe tekibakwatako, mmwe mwenna abayitawo? mwetegereze mulabe obanga waliwo obuyinike obwenkana, obwantukako, Mukama bwe yanteekako ku lunaku olwʼobusungu bwe obungi.

¹²

¹³“Yaweereza omuliro okuva waggulu, ne gukka mu magumba gange. Yatega ebigere byange akatimba, nʼanzizaayo emabega. Yandeka mpuubadde, nga nzirise olunaku lwonna.

¹³

¹⁴“Ebibi byange binfuukidde ekikoligo; bisibiddwa ne binywezebwa omukono gwe. Binzitoowerera mu bulago, era bimmazeemu amaanyi. Mukama ampaddeyo mu mikono gyʼabo be siyinza kugumiikiriza.

¹⁴

¹⁵“Mukama anyoomye abalwanyi abazira bonna abaali nange; akuŋŋaanyizza eggye okunwanyisa, okuzikiriza abavubuka bange. Mukama alinnyiridde Omuwala Embeerera owa Yuda, ngʼomuntu bwʼasambirira ezabbibu mu lyato ngʼasogola.

¹⁵

¹⁶“Kyenva nkaaba, amaaso gange ne gajjula amaziga, kubanga tewali nʼomu andi kumpi okumbeesabeesa, ayinza okunzizaamu amaanyi. Abaana bange banakuwavu kubanga omulabe awangudde.”

¹⁶

¹⁷Sayuuni agolola emikono gye, naye tewali nʼomu amudduukirira. Mukama awadde ekiragiro ku Yakobo baliraanwa be babeere balabe be; Yerusaalemi afuuse ekintu ekitali kirongoofu wakati mu bo.

¹⁷

¹⁸“Mukama mutuukirivu, newaakubadde nga najeemera ekiragiro kye. Muwulirize mmwe amawanga gonna, mutunuulire okubonaabona kwange; Abavubuka bange ne bawala bange batwalibbwa mu busibe.

¹⁸

¹⁹“Nakoowoola bannange bannyambe, naye tebanfaako; bakabona bange nʼabakadde bʼekibuga kyange bazikiririra mu kibuga nga banoonya ekyokulya baddemu amaanyi.

¹⁹

²⁰“Laba, Ayi Mukama Katonda bwe ndi omunakuwavu! Ndi mu kubonaabona, nʼomutima gwange teguteredde kubanga njeemye nnyo ekiyitiridde. Ebweru ekitala kirindiridde okunsanyaawo, ne mu nnyumba mulimu kufa kwereere.

²⁰

²¹“Abantu bawulidde okusinda kwange, naye tewali nʼomu ananyamba. Abalabe bange bonna bawulidde okusinda kwange; basanyukidde ekyo kyʼokoze. Olunaku lwe walangirira, lubatuukeko, babeere nga nze.

²¹

²²“Obabonereze olwʼobutali butuukirivu bwabwe bwonna, nga nze bwe wambonereza. Okusinda kwange kungi nʼomutima gwange guzirika.”