Okukungubaga 2:1-22 LGCB2014 - Bible AI

¹Obusungu bwa Mukama nga bubuubuukidde ku Muwala wa Sayuuni ne bumussa wansi wʼekire! Ekitiibwa kya Isirayiri, Mukama akissizza wansi okuva mu ggulu okutuuka ku nsi; ne yeerabira entebe eyʼebigere bye ku lunaku lwe yasunguwalirako.

²Mukama azikirizza abatuula mu Yakobo bonna awatali kubasaasira; mu busungu bwe amenye ebigo ebyʼamaanyi ebyʼomuwala wa Yuda; assizza wansi obwakabaka bwe nʼabakungu be nʼabamalamu ekitiibwa.

²

³Mu busungu obungi amaanyi gonna aga Isirayiri agakendeezezza; bwʼalabye omulabe ngʼasembera, nʼaggyawo omukono gwe ogwa ddyo; anyiigidde Yakobo okufaanana ngʼomuliro bwe gubumbujja ne gwokya buli ekiguliraanye.

³

⁴Anaanudde omutego gwe okufaanana nga ogwʼomulabe, era omukono gwe ogwa ddyo mweteefuteefu. Azikirizza ebyo byonna ebisanyusa amaaso mu weema eyʼomuwala wa Sayuuni, okufaanana ngʼomulabe bwe yandikoze; obusungu bwe bubuubuuka ngʼomuliro.

⁴

⁵Mukama afuuse ngʼomulabe; azikirizza Isirayiri, nʼazikiriza embiri ze, nʼazikiriza nʼebifo bye ebyʼamaanyi. Aleetedde muwala wa Yuda okweyongera okukaaba nʼokukungubaga.

⁵

⁶Asaanyizzaawo eweema ye nʼefaanana ngʼennimiro, era azikirizza nʼekifo kye ekyʼOkukuŋŋaanirangamu. Mukama yeerabizza Sayuuni embaga ze entukuvu ne ssabbiiti, era mu busungu bwe obungi anyoomye kabaka ne kabona.

⁶

⁷Mukama atamiddwa ekyoto kye, nʼalekulira nʼekifo kye ekitukuvu. Awaddeyo bbugwe wʼembiri ze eri omulabe; era baleekaanidde mu nnyumba ya Mukama, ne baleetamu oluyoogaano nga ku lunaku olwʼembaga entukuvu.

⁷

⁸Mukama yamalirira okumenya bbugwe eyeetoolodde muwala wa Sayuuni, nʼagolola omuguwa ogupima, Omukono gwe ne guteewala kuzikiriza. Yaleetera enkomera ne bbugwe okukungubaga, byonna ne biggweerera.

⁸

⁹Emiryango gye gisse mu ttaka, nʼemitayimbwa gyagyo agimenye nʼagyonoona. Kabaka we nʼabakungu be baawaŋŋangusizibwa, eteri mateeka gaabwe agabafuga, era ne bannabbi be tebakyafuna kwolesebwa kuva eri Mukama.

⁹

¹⁰Abakadde bʼOmuwala wa Sayuuni batuula wansi ku ttaka nga basiriikiridde; bayiye enfuufu ku mitwe gyabwe era beesibye ebibukutu; nʼabawala ba Yerusaalemi bakotese emitwe gyabwe.

¹⁰

¹¹Amaaso gange gakooye olwʼokukaaba nʼemmeeme yange enyiikadde nʼomutima gwange gulumwa olwʼokuzikirizibwa kwʼabantu bange, nʼolwʼabaana abato nʼabaana abawere okuzirikira wakati mu nguudo ezʼomu kibuga.

¹¹

¹²Bakaabirira bannyaabwe nga bwe boogera nti, “Omugaati ne wayini biri ludda wa?” nga bwe bazirika okufaanana ngʼabaliko ebiwundu mu nguudo ezʼekibuga, nga bwe bakaabira mu bifuba bya bannyaabwe.

¹²

¹³Nnyinza kugamba ki, era kiki kye nnyinza okukugeraageranyaako ggwe Omuwala wa Yerusaalemi? Kiki kye nnyinza okukufaananya, okukusanyusa ggwe Omuwala Embeerera owa Sayuuni? Ekiwundu kyo kinene nnyo, kale ani ayinza okukiwonya?

¹³

¹⁴Okwolesebwa bannabbi bo kwe baafuna, kwali kwa bulimba era kwa butaliimu; tebaakutegeeza obutali butuukirivu bwo okukuwonya obusibe. Engero ze baabanyumizanga zaali za bulimba era eziwabya.

¹⁴

¹⁵Bonna abayitawo babakubira mu ngalo ne bafuuwa empa ne banyeenyeza omuwala wa Yerusaalemi emitwe gyabwe nga boogera nti, “Kino kye kibuga ekyayitibwanga ekituukiridde, era essanyu lyʼensi zonna?”

¹⁵

¹⁶Abalabe bo bonna baasaamiridde nga beewuunya; nga bafuuwa empa, era baluma amannyo nga boogera nti, “Tumuzikirizza. Luno lwe lunaku lwe twalindirira, kaakano lutuukiridde, era tululabye.”

¹⁶

¹⁷Mukama akoze kye yateekateeka, era atuukirizza ekigambo kye kye yalagira mu nnaku ezʼedda. Akuzikirizza awatali kukusaasira, aleetedde omulabe wo okukusekerera, nʼamaanyi gʼabalabe bo agagulumizza.

¹⁷

¹⁸Kaabirira Mukama nʼeddoboozi eryʼomwanguka ggwe Omuwala wa Sayuuni. Leka amaziga go gakulukute ngʼomugga emisana nʼekiro. Teweewummuza so toganya maaso go kuwummula.

¹⁸

¹⁹Golokoka, okaabe ekiro obudde nga bwa kaziba; Fuka emmeeme yo ngʼamazzi mu maaso ga Mukama. Yimusa emikono gyo gyʼali, olwʼobulamu bwʼabaana bo abato abazirise olwʼenjala mu buli luguudo.

¹⁹

²⁰“Tunula, Ayi Mukama Katonda osaasire! Ani gwe wali obonerezza bwʼotyo? Ddala, abakyala balye ebibala byʼembuto zaabwe, abaana be bakuzizza? Ddala, bakabona ne bannabbi battibwe mu watukuvu wa Mukama?

²⁰

²¹“Abato nʼabakulu bonna bafiiridde wamu mu nfuufu eyʼenguudo; abavubuka bange ne bawala bange battiddwa nʼekitala; obattidde ku lunaku olwʼobusungu bwo, era obasse awatali kusaasira.

²¹

²²“Nga bwʼoyita abantu ku lunaku olwʼembaga, bwʼotyo bwʼompitidde ebikemo ku njuyi zonna; era ku lunaku olwʼobusungu bwa Mukama, tewali nʼomu eyasimattuka newaakubadde eyasigalawo; abo be nalabirira ne nkuza, omulabe wange be yazikiriza.”