Okuva 1:1-22 LGCB2014 - Bible AI

¹ⓐ Gano ge mannya ga batabani ba Isirayiri, era ye Yakobo, abajja naye mu Misiri; buli omu nʼabʼomu nnyumba ye:

²Lewubeeni, ne Simyoni, ne Leevi ne Yuda,

³ne Isakaali, ne Zebbulooni, ne Benyamini,

⁴ne Ddaani, ne Nafutaali, ne Gaadi, ne Aseri.

⁵ⓑ Abaana bonna awamu Yakobo yennyini be yazaala baali bawera nsanvu[1]; Yusufu ye, yali yabeera dda mu Misiri.

⁶Awo Yusufu nʼafa; ne baganda be ne bonna abʼomulembe ogwo ne bafa.

⁷Naye Abayisirayiri ne bazaala nnyo, ne baala, ne bayitirira obungi, era ne baba ba maanyi nnyo; ne bajjula ekitundu ekyo mwe baali.

⁸ⓒ Awo ne waddawo kabaka omuggya mu Misiri ataamanya Yusufu.

⁹Nʼagamba abantu be nti, “Abayisirayiri batuyitiriddeko obungi era ba maanyi.

¹⁰Ka tubasalire amagezi baleme kweyongera bungi. Kubanga singa wagwawo olutalo ne beegatta nʼabalabe baffe, ne batulwanyisa, balituddukako ne bava mu nsi eno.”

¹¹Bwe batyo ne babateekako bannampala bababonyeebonye nʼemirimu egyʼobuwaze; ne bazimbira Falaawo ebibuga ebyʼamaterekero, Pisomu ne Lamusesi.

¹²Naye gye baakoma okutuntuzibwa, ate gye baakoma okweyongera obungi, ne basaasaana wonna. Abamisiri ne bakyawa abaana ba Isirayiri ate nga bwe babatya.

¹³Ne bongera okutuntuza abaana ba Isirayiri nʼobukambwe.

¹⁴Obulamu bwʼAbayisirayiri ne bubakaayirira nga bakozesebwa ngʼabaddu; nga batabula ebbumba okukola amatoffaali; nʼemirimu egya buli ngeri egikolebwa mu nnimiro. Mu mirimu egyo gyonna baabakozesanga nʼamaanyi era nʼobukambwe.

¹⁵Awo kabaka wʼe Misiri nʼayogera nʼabazaalisa bʼAbaebbulaniya, amannya gaabwe Sifira ne Puwa[2], nʼabagamba nti,

¹⁶“Bwe mubanga muzaalisa abakazi Abaebbulaniya, ne mulaba ngʼomwana wabulenzi, mumuttanga bussi, naye bwʼabanga owoobuwala, mumulekanga nʼalama.”

¹⁷Naye abazaalisa baali batya Katonda, nga bamussaamu ekitiibwa, ebyo kabaka wʼe Misiri bye yabalagira ne batabikolerako, nʼabaana abalenzi nabo ne babaleka ne balama.

¹⁸Kabaka wʼe Misiri nʼayita abazaalisa, nʼababuuza nti, “Kiki ekibakozesezza bwe mutyo, okuleka abaana abalenzi ne balama?”

¹⁹Abazaalisa, ne baddamu Falaawo nti, “Abakazi Abaebbulaniya tebali ngʼabakazi Abamisiri; bo balamu bulungi era ba maanyi; abazaalisa we bagendera okubatuukako nga bamaze okuzaala.”

²⁰Katonda, nʼayisanga bulungi abazaalisa nʼabawa emikisa. Abaana ba Isirayiri ne beeyongera nnyo obungi era ne baba ba maanyi nnyo.

²¹Olwokubanga abazaalisa bassangamu Katonda ekitiibwa, nga bamutya, nʼabawa ezzadde.

²²Falaawo nʼalyoka alagira abantu be bonna nti, “Buli mwana wabulenzi Abaebbulaniya gwe banaazaalanga mumusuulanga mu mugga Kiyira, naye owoobuwala mumulekanga.”