Okuva 10:1-29 LGCB2014 - Bible AI

¹Awo Mukama nʼagamba Musa nti, “Genda eri Falaawo, kubanga nnyongedde okukakanyaza omutima gwe, nʼomutima gwʼabaweereza be, ndyoke mbalage ebyamagero byange bino:

²era naawe onyumize abaana bo, nʼabaana bʼabaana bo, ebintu bye nkoledde mu Misiri, nʼebyamagero bye mbalaze; nammwe mulyoke mutegeere nga nze Mukama.”

³Awo Musa ne Alooni ne bagenda ewa Falaawo, ne bamugamba nti, “Mukama Katonda wa Abaebbulaniya nʼagamba bwʼati nti, ‘Olituusa ddi ngʼokyagaanye okwetoowaza mu maaso gange? Leka abantu bange bagende, bansinze.

⁴Singa ogaana okubakkiriza okugenda, enkya nzija kuleeta enzige mu nsi yo.

⁵Zijja kubikka ensi yonna, wabulewo nʼomuntu wʼayisa eriiso okulaba ettaka. Zijja kulya ebyo omuzira bye gwalekawo, zirye ne buli muti ogukula mu nnimiro.

⁶Zinajjuza amayumba go, nʼamayumba gʼabakungu bo bonna, nʼamayumba gʼAbamisiri bonna; ekyo bakadde bo, ne bakadde ba bakadde bo nga tebakirabangako kasookedde babeera mu nsi eno nʼokutuusa leero.’ ” Musa nʼakyuka nʼaviira Falaawo.

⁷Abakungu ba Falaawo ne bamugamba nti, “Omusajja ono alituusa ddi ngʼatufuukidde omutego? Leka abantu bagende basinze Mukama Katonda waabwe. Ggwe tolaba Misiri nga bwʼeweddewo?”

⁸Musa ne Alooni ne bazzibwa awali Falaawo. Nʼabagamba nti, “Kale, mugende musinze Mukama Katonda wammwe. Naye abagenda be baani?”

⁹Musa nʼaddamu nti, “Abakulu nʼabato, batabani baffe ne bawala baffe bonna tujja kugenda nabo; era tugenda nʼamagana gaffe nʼebisibo byaffe, kubanga waliwo embaga gye tujja okukolera Mukama.”

¹⁰Falaawo nʼabagamba nti, “Mukama abeere nammwe, obanga mulowooza nga nzija kubaleka mugende, mmwe nʼabaana bammwe! Nze ndaba nga mulina olukwe lwe muteekateeka.

¹¹Nedda! Abasajja bokka ka bagende basinze[11] Mukama; kubanga ekyo kye mwagala.” Ne bagobebwa awali Falaawo.

¹²Awo Mukama Katonda nʼagamba Musa nti, “Golola omukono gwo ku nsi ya Misiri oyite enzige, zijje ku nsi ya Misiri, zirye buli kantu konna akamera mu nnimiro, nʼebyo byonna omuzira bye gwataliza.”

¹³Musa nʼagolola omuggo gwe ku nsi ya Misiri; Mukama Katonda nʼaleeta embuyaga ezaava ebuvanjuba, ne zikunta olunaku olwo lwonna nʼekiro kyonna. Obudde bwe bwakya embuyaga ne zireeta enzige.

¹⁴ⓦ Enzige nnyingi nnyo ne zigwa ku nsi yonna eyʼe Misiri, ne zigisaanikira, okuva ku nsalo yaayo eyʼoluuyi olumu okutuuka ku yʼoluuyi olulala. Zaali nzige za kabi kanene, nga tewalabikanga ziri ngʼezo, era tezigenda kulabika.

¹⁵ⓧ Zaabuutikira ensi yonna, ne wabaawo ekizikiza ku nsi; ne zirya buli kimera kyonna mu nsi, nʼebibala byonna ebyʼemiti omuzira bye gwali gutalizza; era tewaasigalawo kintu kyonna kya kiragala ku miti nʼebimera mu nnimiro, mu nsi yonna eyʼe Misiri.

¹⁶Awo Falaawo nʼatumya Musa ne Alooni bunnambiro, nʼabagamba nti, “Nnyonoonye eri Mukama Katonda wammwe ne gye muli.

¹⁷Mbeegayiridde munsonyiwe olwʼokwonoona kwange, omulundi guno gwokka; era musabe Mukama Katonda wammwe anziggyeeko olumbe luno lwokka olututta.”

¹⁸Musa nʼava ewa Falaawo ne yeegayirira Mukama.

¹⁹Awo Mukama nʼaleeta embuyaga ezʼamaanyi ennyo nga ziva ebuvanjuba, ne zisitula enzige ne zizisuula mu Nnyanja Emyufu. Tewaasigala nzige nʼemu wonna wonna mu nsi yʼe Misiri.

²⁰Naye Mukama nʼakakanyaza omutima gwa Falaawo, abaana ba Isirayiri nʼatabakkiriza kugenda.

²¹Awo Mukama nʼagamba Musa nti, “Golola omukono gwo waggulu eri eggulu, wabeewo ekizikiza ku nsi eyʼe Misiri; ekizikiza ekiyinza nʼokuwulikika.”

²²ⓨ Musa nʼagolola omukono gwe eri eggulu; ne wabaawo ekizikiza ekikwafu mu nsi yonna eyʼe Misiri okumala ennaku ssatu.

²³Abantu bonna nga tewali asobola kulaba munne; era tewaali yaseguka kuva mu kifo kye wʼabeera okumala ennaku ssatu. Naye bo abaana ba Isirayiri ewaabwe ngʼobudde bulaba.

²⁴Awo Falaawo nʼatumya Musa, nʼamugamba nti, “Mugende musinze Mukama. Abaana bammwe nabo mugende nabo, wabula ente zammwe, nʼembuzi nʼendiga ze ziba zisigala.”

²⁵Naye Musa nʼaddamu nti, “Osaana otuleke tutwale ebisolo ebyʼokuwaayo ssaddaaka nʼebiweebwayo ebyokebwa eri Mukama Katonda waffe.

²⁶Ente zaffe tusaana okugenda nazo; tewali nsolo nʼemu eneesigala. Kubanga kitusaanira okuzitwala nga tugenda okusinza Mukama Katonda waffe; kubanga tujja kumala kutuuka eri, ne tulyoka tumanya kye tunaakozesa mu kusinza Mukama.”

²⁷Naye Mukama nʼakakanyaza omutima gwa Falaawo, nʼatabaleka kugenda.

²⁸Falaawo nʼagamba Musa nti, “Nva mu maaso! Era weekuume, sikulabanga ngʼokomyewo wʼendi; bwe ndiddayo okukulaba tolirema kufa.”

²⁹Musa nʼaddamu nti, “Nga bwʼogambye, nange siriddayo kukulaba.”