Okuva 13:1-22 LGCB2014 - Bible AI

¹Awo Mukama nʼagamba Musa nti,

²ⓔ “Ebibereberye byonna binjawulireko. Abaana abaggulanda mu Isirayiri yonna banaabanga bange; nʼebisolo ebiggulanda nabyo binaabanga byange.”

³Awo Musa nʼagamba abantu nti, “Mujjukiranga olunaku luno, olunaku lwe mwaviirako mu Misiri, ensi gye mwafugibwanga ngʼabaddu, kubanga Mukama yabaggyayo nʼomukono gwe ogwʼamaanyi. Temuliirangako mugaati gulimu kizimbulukusa.

⁴Ku lunaku lwa leero olwʼomwezi guno Abibu, lwe musitudde okuva mu Misiri.

⁵Mukama bwʼalimala okubatuusa mu nsi yʼAbakanani, nʼAbakiiti, nʼAbamoli; nʼeyʼAbakiivi, nʼAbayebusi, ensi gye yalayirira bajjajjammwe okugibawa, ensi ekulukuta amata nʼomubisi gwʼenjuki, mukwatanga omukolo guno mu mwezi guno.

⁶Mumalanga ennaku musanvu nga mulya emigaati egitaliimu kizimbulukusa, ne ku lunaku olwʼomusanvu kwe munaakoleranga embaga ya Mukama.

⁷Munaalyanga emigaati egitali mizimbulukuse okumala ennaku musanvu; tewabangawo alabika nʼomugaati omuzimbulukuse, wadde ekizimbulukusa okusangibwa nammwe mu nsi yammwe.

⁸Ku lunaku olwo mulitegeeza abaana bammwe nti, ‘Tukola tuti nga tujjukira ebyo Mukama bye yatukolera nga tuva mu Misiri.’

⁹Omukolo guno gunaababeereranga ngʼakabonero ku mikono gyammwe, oba mu byenyi wakati wʼamaaso gammwe, okubajjukizanga etteeka lya Mukama eritaavenga ku mimwa gyammwe. Kubanga Mukama yabaggya mu Misiri nʼomukono gwe ogwʼamaanyi.

¹⁰Noolwekyo onookolanga ekiragiro kino bye kigamba, mu kiseera kyakyo buli mwaka, buli mwaka.

¹¹“Mukama ngʼamaze okubatuusa mu nsi yʼAbakanani, nga bwe yabalayirira mmwe ne bajjajja bammwe, era agenda kugibawa,

¹²ⓕ Mukama mumwawulirangako ebiggulanda byonna. Zisseddume zonna embereberye ezʼamagana gammwe zinaabanga za Mukama.

¹³Buli kalogoyi[16] akabereberye mukawaanyisangamu omwana gwʼendiga ne mukanunulayo, naye bwe mutaakanunulenga mukamenyanga ensingo ne kafa. Ne buli mutabani wammwe omubereberye mumununulanga.

¹⁴“Awo olulituuka batabani bammwe, bwe bababuuzanga nti, ‘Kino kye mukola kitegeeza ki?’ Mubaddangamu nti, ‘Kubanga Mukama yatuggya mu Misiri, ensi eyʼobuddu, nʼomukono gwe ogwʼamaanyi.

¹⁵Naye Falaawo bwe yali ngʼakakanyadde ngʼatugaanye okuvaayo, Mukama nʼatta ebibereberye byonna mu nsi yʼe Misiri; ababereberye bʼabantu nʼebibereberye byʼebisolo. Noolwekyo kyetuva tuwaayo ssaddaaka eri Mukama eyʼebiggulanda byonna ebisajja; naye batabani baffe abaggulanda tubanunulayo.’

¹⁶Omukolo ogwo gunaababeereranga ngʼakabonero akookebbwa ku mikono gyammwe, oba mu byenyi wakati wʼamaaso gammwe; kubanga Mukama yabaggya mu Misiri nʼomukono gwe ogwʼamaanyi.”

¹⁷Awo abantu, bwe baasitula nga Falaawo amaze okubaleka, Katonda teyabayisa mu kkubo eriyita mu nsi yʼAbafirisuuti, newaakubadde lye lyali eryʼokumpi.[17] Kubanga Katonda yagamba nti, “Singa bagwa mu lutalo, bayinza okwejjusa ne bawetamu ne baddayo e Misiri.”

¹⁸Bwʼatyo Katonda nʼabeekooloobya ngʼabayisa mu kkubo eryʼomu ddungu eriggukira ku Nnyanja Emyufu. Abaana ba Isirayiri baava mu nsi yʼe Misiri nga bakutte ebyokulwanyisa byabwe nga beetegekedde okulwana.

¹⁹ⓖ Awo Musa nʼavaayo nʼamagumba ga Yusufu, kubanga Yusufu yali alayizza abaana ba Isirayiri. Yabagamba nti, “Ddala, ddala Mukama agenda kubadduukirira. Kale, amagumba gange mugendanga nago nga muva wano.”

²⁰Bwe baava e Sukkosi ne bakuba eweema zaabwe mu Yesamu eddungu we litandikira.

²¹Emisana Mukama yabakulemberanga ngʼali mu mpagi eyʼekire okubalaga ekkubo, nʼekiro ngʼali mu mpagi eyʼomuliro okubamulisiza, balyoke batambulenga emisana nʼekiro.

²²Empagi eyʼekire eyʼemisana, nʼempagi eyʼomuliro eyʼekiro tezaggibwawo mu maaso gʼabantu obudde bwonna.