Okuva 15:1-27 LGCB2014 - Bible AI

¹ⓘ Awo Musa nʼabaana ba Isirayiri ne bayimbira Mukama oluyimba luno nga bagamba nti, “Nnaayimbiranga Mukama, kubanga awangudde nʼekitiibwa kingi; Asudde mu nnyanja embalaasi nʼomwebagazi waayo.

²ⓙ Mukama ge maanyi gange era lwe luyimba lwange, era afuuse obulokozi bwange; Ye Katonda wange, nange nnaamutenderezanga, ye Katonda wa kitange, nange nnaamugulumizanga.

³Mukama mulwanyi; MUKAMA, lyʼerinnya lye.

⁴Amagaali ga Falaawo nʼeggye lye abisudde mu nnyanja; Nʼabaduumizi bʼamaggye ge abalondemu basaanyeewo mu Nnyanja Emyufu.

⁵Obuziba bubasaanikidde; basse okutuuka ku ntobo ngʼejjinja.”

⁵

⁶“Omukono gwo ogwa ddyo, Ayi Mukama, gwalina amaanyi nʼekitiibwa; omukono gwo ogwa ddyo, Ayi Mukama, gwasesebbula omulabe.

⁷Mu bukulu obwʼekitiibwa kyo, wamegga abalabe bo, wabalaga obusungu bwo, ne bubasiriiza ngʼebisasiro.

⁸Omukka bwe gwava mu nnyindo zo, amazzi ne geetuuma; Amazzi gʼebuziba ne geekwata ngʼekisenge wakati mu nnyanja.”

⁸

⁹“Omulabe nʼayogera nti, ‘Ka mbagobe, mbakwate. Nnaagabana omunyago; mbeemalireko eggoga. Nnaasowolayo ekitala kyange, ndyoke mbazikirize.’

¹⁰Naye wakunsa embuyaga zo, ennyanja nʼebasaanikira. Bakka ngʼekyuma, ne basaanawo mu mazzi amangi agʼamaanyi.

¹¹Ani akufaanana, Ayi Mukama, mu bakatonda bonna? Ani akufaanana, ggwe, Omutukuvu Oweekitiibwa, Atiibwa era atenderezebwa, akola ebyamagero?

¹²Wagolola omukono gwo ogwa ddyo, ensi nʼebamira.”

¹²

¹³“Mu kwagala kwo okutaggwaawo, abantu be wanunula olibakulembera. Mu maanyi go, olibatuusa mu kifo kyo ekitukuvu.

¹⁴Amawanga galikiwulira ne gakankana, ababeera mu Bufirisuuti balijjula ennaku.

¹⁵Abakungu bʼomu Edomu balitangaalirira nga batidde; abakulembeze abʼamaanyi aba Mowaabu balikankana; Abatuuze bʼomu Kanani baliggwaamu endasi.

¹⁶Okwesisiwala nʼentiisa biribajjira. Olwʼomukono gwo ogwʼamaanyi tebalinyega, balisirika ngʼejjinja okutuusa abantu bo lwe baliyitawo, Ayi Mukama, okutuusa abantu bo, be wanunula, lwe baliyitawo.

¹⁷Olibayingiza nʼobassa ku lusozi lwo lwe weerondera, kye kifo, Ayi Mukama kye weekolera mwʼonoobeeranga, Ekifo kyo Ekitukuvu, kye weekolera, Ayi Mukama, nʼemikono gyo.

¹⁸Mukama anaafuganga emirembe nʼemirembe.”

¹⁹Embalaasi za Falaawo, nʼamagaali ge, ne basajja be abeebagadde embalaasi bwe baayingira mu nnyanja, Mukama nʼakomyawo amazzi agʼennyanja ne gabasaanikira; naye nga bo abaana ba Isirayiri batambulira ku ttaka kkalu wakati mu nnyanja.

²⁰Awo Miryamu, nnabbi omukazi era mwannyina wa Alooni, nʼakwata ekitaasa; nʼabakazi abalala ne bamugoberera nga balina ebitaasa era nga bwe bazina.

²¹Miryamu nʼabayimbira bwʼati nti,

²¹“Muyimbire Mukama, kubanga awangudde nʼekitiibwa kingi. Asudde mu nnyanja embalaasi nʼagyebagadde.”

²²Awo Musa nʼakulembera Isirayiri, nʼabaggya ku Nnyanja Emyufu, ne bayingirira eddungu lyʼe Ssuuli. Ne batambulira ennaku ssatu mu ddungu nga tebalabye ku mazzi.

²³Bwe baatuuka e Mala, ne batasobola kunywa ku mazzi gaawo, kubanga gaali gakaawa: era eyo yʼensonga eyatuumisa ekifo ekyo Mala.

²⁴Abantu ne beemulugunyiza Musa, ne bamubuuza nti, “Tunywe ki?”

²⁵Musa ne yeegayirira Mukama; Mukama nʼamulaga ekitundu kyʼomuti. Bwe yakisuula mu mazzi, amazzi ne gaba malungi okunywa. Mu kifo kino Mukama we yabaweera ekiragiro kino nʼetteeka, era nʼabagezesa

²⁶ngʼagamba nti, “Singa muwuliriza eddoboozi lya Mukama Katonda wammwe nʼobwegendereza, ne mukola ebyo byʼalaba nga bituufu, ne mussaayo omwoyo ku biragiro bye, era ne mugondera amateeka ge, sigenda kubaleetako ndwadde nʼemu, ngʼezo ze naleetera Abamisiri, kubanga nze Mukama, nze mbawonya endwadde zammwe.”

²⁷Awo ne batuuka mu Erimu, awaali ensulo ekkumi nʼebbiri, nʼenkindu ensanvu; ne bakuba awo eweema zaabwe okumpi nʼamazzi.