Okuva 16:1-36 LGCB2014 - Bible AI

¹Awo abaana ba Isirayiri, nga kibiina kinene, ne basitula okuva mu Erimu; ne batuuka mu ddungu lya Sini, eriri wakati wa Erimu ne Sinaayi, nga baakamala emyezi ebiri nʼennaku kkumi na ttaano kasookedde bava mu nsi yʼe Misiri.

²Nga bali mu ddungu eryo, ekibiina kyonna ekyʼabaana ba Isirayiri ne kyemulugunyiza Musa ne Alooni.

³Abaana ba Isirayiri ne babagamba nti, “Singa twasigala mu nsi yʼe Misiri, Mukama nʼatuttira eyo nʼomukono gwe! Kubanga eyo twalyanga sefuliya zʼennyama, nʼemmere nnyingi nga bwe twayagalanga, ne tukkuta; naye kaakano mutuleese mu ddungu lino, ekibiina kino kyonna kife enjala.”

⁴ⓚ Awo Mukama nʼagamba Musa nti, “Nzija kubatonnyeseza emmere ngʼeva mu ggulu. Abantu banaakuŋŋaanyanga buli lunaku ekitundu ekyʼolunaku olwo; ndyoke mbagezese ndabe obanga banaakwatanga amateeka gange, oba tebaagakwatenga.

⁵Ku lunaku olwʼomukaaga bwe banaabanga bakuŋŋaanya emmere eyʼolunaku olwo, bakuŋŋaanyanga eyenkanaankana nʼeyʼennaku bbiri.”

⁶Awo Musa ne Alooni ne bagamba abaana ba Isirayiri bonna nti, “Obudde nga buwungeera, we munaategeerera nga Mukama ye yabaggya mu nsi yʼe Misiri:

⁷ate enkya lwe munaalaba ekitiibwa kya Mukama, kubanga awulidde nga mumwemulugunyiza. Kubanga naffe ffe bʼani mmwe okutwemulugunyiza?”

⁸Musa nʼayongera okubagamba nti, “Mujja kwongera okutegeera Mukama, olweggulo nga buwungeera bwʼanaabawa ennyama ne mulya, ate enkya nʼabawa emmere ebamala: kubanga Mukama awulidde nga mumwemulugunyiza. Naffe ffe bʼani? Temwemulugunyiza ffe, wabula Mukama.”

⁹Awo Musa nʼagamba Alooni nti, “Tegeeza ekibiina kyonna ekyʼabaana ba Isirayiri nti, ‘Musembere awali Mukama, kubanga awulidde okwemulungunya kwammwe!’ ”

¹⁰Awo olwatuuka, Alooni bwe yali ngʼakyategeeza ekibiina kyonna ekyʼabaana ba Isirayiri, ne batunula mu ddungu; era, laba, ekitiibwa kya Mukama ne kirabikira mu kire.

¹¹Mukama nʼayogera ne Musa, ngʼagamba nti,

¹²“Mpulidde okwemulugunya kwʼabaana ba Isirayiri. Bagambe nti, ‘Obudde nga buwungeera munaalya ennyama, nʼenkya munakkusibwa emmere. Bwe mutyo munaategeera nga nze Mukama Katonda wammwe.’ ”

¹³Obudde nga buwungeera enkwale ne zijja ne zijjula olusiisira; ne mu makya ne wabaawo omusulo ku ttaka mu lusiisira.

¹⁴Omusulo nga gwamuse ngʼobudde bukaze, laba, ku ttaka ne kulabikako obuntu obutono obwekulungirivu obufaanana ngʼomusulo ogukutte olwʼobunnyogovu obungi.

¹⁵ⓛ Abaana ba Isirayiri bwe baabulaba ne beebuzaganya nti, “Kiki kino?” Kubanga baali tebakimanyi. Musa nʼabategeeza nti, “Eno ye mmere Mukama gyʼabawadde okulya.

¹⁶Mukama alagidde bwʼati nti, ‘Buli muntu akuŋŋaanye gyʼanaamalawo. Buli muntu ali mu weema zammwe mumukuŋŋaanyize kilo bbiri.’ ”

¹⁷Abaana ba Isirayiri ne bakola nga bwe baalagirwa; abamu ne bakuŋŋaanya nnyingi, nʼabalala ntono.

¹⁸ⓜ Bwe baagipimiranga mu kabakuli aka oma, ze lita ebbiri, oyo eyali akuŋŋaanyizza ennyingi teyasukkirizanga, nʼoyo owʼentono nga teyeeseera. Buli muntu yakuŋŋaanyanga ngʼokwetaaga kwe bwe kwabanga.

¹⁹Musa nʼabagamba nti, “Tewabaawo omuntu nʼomu agifissaako okutuusa enkeera.”

²⁰Kyokka abamu Musa tebaamufaako; ne beeterekerako okutuusa enkeera; nʼezaala envunyu, era nʼewunya. Musa nʼabasunguwalira.

²¹Buli nkya ne bakuŋŋaanyanga buli omu gye yayinzanga okulya nga anaagimalawo; naye akasana bwe kaayakanga nga kakazizza, nʼesaanuuka.

²²Awo ku lunaku olwʼomukaaga ne bakuŋŋaanya emmere ya mirundi ebiri, ze kilo nnya buli muntu; abakulembeze bonna mu kibiina ne bajja ne bategeeza Musa.

²³Nʼabagamba nti, “Mukama yalagidde bwʼati nti, ‘Enkya lunaaba lunaku lwa kuwummula, ye Ssabbiiti ya Mukama Entukuvu. Leero mwokye emmere yammwe gye mwetaaga okwokya, era mufumbe gye mwagala okufumba; eneeba esigaddewo mugyeterekere okutuusa enkya.’ ”

²⁴Bwe batyo ne bagyeterekera okutuusa enkeera, nga Musa bwe yabalagira; nʼetewunya wadde okuzaala envunyu.

²⁵Musa nʼabagamba nti, “Eyo mugirye leero, kubanga leero ye Ssabbiiti ya Mukama, ku ttaka temujja kusangako mmere.

²⁶Mu nnaku omukaaga mujjanga kugikuŋŋaanya, naye ku lunaku olwʼomusanvu, olwa Ssabbiiti, emmere teebeerengawo.”

²⁷Naye era abamu ku bantu baafuluma ku lunaku olwʼomusanvu bagikuŋŋaanye, naye tebaasangayo kantu.

²⁸Awo Mukama nʼagamba Musa nti, “Mulituusa ddi nga mukyajeemera ebiragiro byange?

²⁹Mutegeere nga Mukama abawadde Ssabbiiti; ku lunaku olwʼomukaaga kyava abawa emmere ya nnaku bbiri. Buli muntu abeerenga mu maka ge nga tafulumye nʼakatono ku lunaku olwʼomusanvu.”

³⁰Abantu bwe batyo ne bawummula ku lunaku olwʼomusanvu.

³¹Abʼomu nnyumba ya Isirayiri, emmere eyo ne bagiyitanga “Maanu”. Yali efaanana ngʼakasigo ka koliyanda, nga njeru; ngʼewoomerera ngʼobusukuuti obufumbiddwa nʼomubisi gwʼenjuki.

³²Musa nʼagamba nti, “Mukama alagidde bwʼati nti, ‘Muddire akabakuli aka kilo bbiri mukajjuze maanu mugiterekere abʼemirembe egigenda okujja; balyoke balabe ku mmere gye nabaliisanga mu ddungu, bwe nabaggya mu nsi yʼe Misiri.’ ”

³³Musa nʼagamba Alooni nti, “Ddira akabakuli osseemu maanu ejjuza oma, ze lita bbiri, obungi, ogisse awali Mukama, eterekerwe abʼemirembe egigenda okujja.”

³⁴Bwʼatyo Alooni nʼateeka maanu awali Endagaano, ekuumirwe awo, nga Mukama bwe yalagira Musa.

³⁵Abaana ba Isirayiri ne balya maanu okumala emyaka amakumi ana, okutuusa lwe baatuuka mu nsi omuli abantu. Baalya maanu[18] okutuusa lwe baatuuka ku nsalo ya Kanani.

³⁶Oma[19] emu yenkana kimu kya kkumi ekya efa.[20]