Okuva 18:1-27 LGCB2014 - Bible AI

¹Yesero, kabona wʼe Midiyaani, era kitaawe wa mukyala wa Musa, nʼawulira byonna Katonda bye yakolera Musa nʼabantu be, Abayisirayiri; era nga Mukama yaggya Isirayiri mu Misiri.,

²Ye yalabiriranga Zipola, mukyala wa Musa; kubanga Musa yali amuzzizza ewaabwe ngʼamumulekedde,

³ⓞ ne batabani be babiri. Mutabani we omu yamutuuma Gerusomu, kubanga Musa yagamba nti, “Mbadde mugwira mu nsi etali yange;”

⁴nʼerinnya lyʼomulala lyali Eryeza, kubanga yagamba nti, “Katonda wa kitange ye yali omubeezi wange, era nʼamponya ekitala kya Falaawo.”

⁵Yesero, mukoddomi wa Musa, nʼajja ne batabani ba Musa ne mukyala we eri Musa mu ddungu, we yali asiisidde okuliraana olusozi lwa Katonda.

⁶Yesero yali amutumidde nti, “Nze Yesero mukoddomi wo, nzija okukulabako. Ndi ne mukyala wo ne batabani be bombi.”

⁷Awo Musa nʼafuluma nʼagenda okwaniriza mukoddomi we; nʼakutamako ngʼamulamusa, nʼamugwa mu kifuba. Ne balamusaganya, nʼoluvannyuma ne bayingira mu weema.

⁸Musa nʼanyumiza mukoddomi we ebyo byonna Mukama bye yakola Falaawo nʼAbamisiri ngʼabalanga Isirayiri; nʼebizibu ebyabatuukako mu lugendo lwabe, ne Mukama nga bwe yabibawonya.

⁹Yesero nʼasanyuka nnyo okuwulira ebirungi ebyo byonna Mukama bye yakolera Isirayiri, ngʼabanunula ku Bamisiri.

¹⁰Yesero nʼagamba nti, “Mukama atenderezebwe eyabanunula mu mikono gyʼAbamisiri ne mu mukono gwa Falaawo, nʼaggya abantu be mu mikono gyʼAbamisiri.

¹¹Kaakano ntegedde nga Mukama mukulu wa kitiibwa okukira bakatonda bonna, kubanga yanunula abantu be mu mikono gyabo abaali babeeragirako.”

¹²Awo Yesero, mukoddomi wa Musa, nʼawaayo eri Mukama ekiweebwayo ekyokye ne ssaddaaka endala; Alooni nʼabakulembeze ba Isirayiri bonna ne balya ne mukoddomi wa Musa emmere mu maaso ga Katonda.

¹³Awo bwe bwakya enkya, Musa nʼatuula ku ntebe ye okulamula abantu. Abantu ne bamwetooloola okuva enkya okutuusa akawungeezi.

¹⁴Mukoddomi we bwe yalaba Musa bye yali akolera abantu, nʼamugamba nti, “Kiki kino kyʼokola? Lwaki olamula bwʼomu, abantu bano bonna ne bayimirira okukwetooloola okuva ku nkya okutuusa akawungeezi?”

¹⁵Musa nʼaddamu mukoddomi we nti, “Kubanga abantu bajja gye ndi bategeere Katonda byʼayagala.

¹⁶Buli lwe babeera nʼobutakkiriziganya, bajja gye ndi, ne mbasalirawo, era ne mbategeeza amateeka ga Katonda nʼebiragiro bye.”

¹⁷Mukoddomi wa Musa nʼamugamba nti, “Kyʼokola si kirungi.

¹⁸Ggwe, nʼabantu bano bonna abajja gyʼoli, mujja kukoowa nnyo. Kubanga omulimu guno munene nnyo; tosobola kugukola bwʼomu.

¹⁹Nkusaba ompulirize nkusalire ku magezi, ne Katonda ngʼali naawe. Osaana obeere omubaka wʼabantu ewa Katonda, era omutuusengako ensonga zaabwe.

²⁰Bayigirize amateeka nʼebiragiro, era obalage nga bwe basaana okweyisanga, awamu nʼemirimu gye basaanidde okukola.

²¹Londayo abasajja abalina ebisaanyizo, ngʼobaggya mu bantu bonna, abasajja abatya Katonda, abʼamazima era abatalya nguzi; obawe obukulembeze, ngʼabamu bavunaanyizibwa abantu enkumi, nʼabalala abantu ebikumi, nʼabamu ebibiina ebyʼataano nʼabalala ebyʼekkumi kkumi.

²²Bawe obuyinza okulamulanga abantu ebbanga lyonna, naye ngʼemisango emizibu bagikuleetera, emisango emyangu bo bagisalenga. Ekyo kinaawewulanga ku buzito bwʼomugugu gwo, kubanga banaabanga bagukukwatirako.

²³Singa okola bwʼotyo, nga ne Katonda bwʼakulagidde, ojja kusobola okugumira emirimu egyo, era nʼabantu bano bonna balyoke baddeyo ewaabwe nga basanyuse.”

²⁴Musa bwʼatyo nʼawuliriza amagezi gonna mukoddomi we ge yamuwa, nʼakolera ku ebyo byonna bye yamubuulirira.

²⁵Musa nʼalonda mu Isirayiri yonna abasajja abasobola, nʼabafuula abakulembeze bʼabantu; nga bavunaanyizibwa enkumi, nʼabalala ebikumi, nʼabamu amakumi ataano ataano, nʼabalala kkumi kkumi.

²⁶Ne balamula abantu ebbanga lyonna. Emisango emizibu nga bagireetera Musa, naye emyangu nga bagisala.

²⁷Awo Musa nʼasiibula mukoddomi we, mukoddomi we nʼakwata ekkubo ne yeddirayo mu nsi yʼewaabwe.