Okuva 19:1-25 LGCB2014 - Bible AI

¹Mu mwezi ogwokusatu abaana ba Isirayiri nga bavudde mu Misiri, ne batuuka mu Ddungu lya Sinaayi.

²Kubanga baali basitudde okuva mu Lefidimu ne bayingira Eddungu lya Sinaayi. Abayisirayiri ne basimba eweema zaabwe mu ddungu omwo mu maaso gʼolusozi Sinaayi.

³Awo Musa nʼayambuka eri Katonda; Mukama nʼamuyita ngʼasinziira ku lusozi ngʼagamba nti, “Bino byʼonoogamba ennyumba ya Yakobo, byʼonootegeeza abaana ba Isirayiri nti bwʼati bwʼayogera Mukama nti,

⁴‘Mwalaba bye nakola Abamisiri, mmwe ne mbasitulira ku biwaawaatiro byʼempungu[22] nʼembeereetera gye ndi.

⁵ⓟ Kale, singa mugondera eddoboozi lyange awatali kwerekeramu, ne mukuuma endagaano yange, mulibeera eggwanga lyange eryʼenjawulo egganzi mu mawanga gonna, kubanga ensi yonna yange.

⁶Munaabeeranga obwakabaka bwange obwa bakabona, era eggwanga ettukuvu.’ Ebyo bye bigambo byʼojja okutegeeza abaana ba Isirayiri.”

⁷Awo Musa nʼakomawo, nʼayita abakulembeze bʼabantu nʼabategeeza ebigambo ebyo byonna Mukama bye yamulagira.

⁸Abantu bonna ne baddiramu wamu nti, “Ebyo byonna Mukama byʼagambye, tujja kubikola.” Musa nʼategeeza Mukama ngʼabantu bwe baayogera.

⁹Mukama nʼagamba Musa nti, “Nzija kujja gyʼoli mu kire ekikutte, abantu bawulire nga njogera naawe, bakukkirizenga era bakwesigenga ennaku zonna.” Musa nʼategeeza Mukama abantu bye baayogera.

¹⁰Mukama nʼagamba Musa nti, “Genda eri abantu, obatukuze leero nʼenkya. Bagambe booze engoye zaabwe,

¹¹ku lunaku olwokusatu babeere beetegefu, kubanga ku lunaku olwo Mukama alikka ku lusozi Sinaayi ngʼAbayisirayiri bonna balaba.

¹²ⓠ Abayisirayiri bakugire nʼolukomera okwetooloola olusozi, obagambe nti, ‘Mwekuume muleme okwambuka ku lusozi oba okulukwatako we lutandikira. Anaalukwatako ajja kuttibwa.

¹³Tajja kukwatibwako, wabula ajja kukubirwa ddala amayinja oba kufumitibwa. Omuntu tajja kulama, nʼebisolo tewaabeewo kirama.’ Akagombe bwe kanaamala okuvugira akabanga, olwo abantu ne balyoka bajja awali olusozi.[23]”

¹⁴Awo Musa nʼava ku lusozi nʼaserengeta eri abantu, nʼabatukuza ne bayoza engoye zaabwe.

¹⁵Nʼabagamba nti, “Mwetegekere olunaku olwokusatu, ne bakyala bammwe temubasemberera.”

¹⁶ⓡ Awo ku lunaku olwokusatu ku nkya ne waba okubwatuka nʼokumyansa, nʼekire ekikutte ku lusozi, nʼeddoboozi lyʼakagombe eryʼomwanguka ennyo; abantu bonna abaali mu lusiisira nʼokukankana ne bakankana.

¹⁷Musa nʼaggya abantu mu lusiisira nʼabaleeta basisinkane Katonda; ne bayimirira wansi wʼolusozi.

¹⁸Olusozi Sinaayi ne lubikkibwa omukka; kubanga Mukama yalukkako mu muliro. Omukka ne gunyooka nga gwambuka ngʼoguva mu kyoto, nʼolusozi lwonna ne lukankana nnyo.

¹⁹Eddoboozi lyʼakagombe bwe lyeyongera okuvuga nʼomwanguka ogwʼamaanyi, Musa nʼayogera, ne Katonda nʼamwanukula nʼeddoboozi eryʼokubwatuka.

²⁰Awo Mukama nʼakka ku ntikko yʼOlusozi Sinaayi. Mukama nʼayita Musa agende ku ntikko yʼolusozi; Musa nʼalinnya.

²¹Mukama nʼagamba Musa nti, “Serengeta eri abantu obalabule baleme kuwaguza okujja okutunula ku Mukama, abantu bangi baleme kuzikirira.

²²Ne bakabona, abasemberera Mukama, nabo basaana beetukuze, kubanga Mukama ayinza okubasaanyaawo.”

²³Musa nʼaddamu Mukama nti, “Abantu tebasobola kwambuka ku Lusozi Sinaayi, kubanga ggwe wennyini watulagira nti, ‘Muteekeewo akakomera okwetooloola olusozi, lusigale lwokka nga lutukuvu.’ ”

²⁴Mukama nʼalagira Musa nti, “Serengeta oleete Alooni; naye bakabona nʼabantu tobaganya kuwaguza kujja kwambuka eri Mukama, kubanga ayinza okubasaanyaawo.”

²⁵Bwʼatyo Musa nʼaserengeta mu bantu nʼabategeeza.