Okuva 2:1-25 LGCB2014 - Bible AI

¹Awo olwatuuka omusajja owʼomu kika kya Leevi, nʼagenda nʼawasa omukazi, nga naye Muleevi.

²Omukazi oyo nʼaba olubuto nʼazaala omwana mulenzi; naye bwe yalaba nga mwana alabika obulungi ennyo, nʼamukwekera emyezi esatu.

³Naye bwe yatuusa ekiseera nga takyasobola kumukweka, nʼamufunira ekibaya ekyʼebitoogo, nʼakisiigako ebitosi ne koolaasi; omwana nʼamuteeka omwo, nʼakissa mu bitoogo ku lubalama lwʼomugga Kiyira.

⁴Mwannyina wʼomwana nʼayimiriranga nga yeesuddeko akabanga, alabe ebinaamutuukangako.

⁵Awo muwala wa Falaawo nʼaserengeta ku mugga Kiyira okunaaba; abaweereza be abawala ne batambulira ku lubalama lwʼomugga; muwala wa Falaawo nʼalaba ekibaya mu bitoogo, nʼatuma omu ku bawala okukikima, nʼakireeta.

⁶Bwe yakisaanukulako, nʼalabamu omwana. Omwana yali akaaba, nʼamusaasira nnyo, nʼagamba nti, “Ono yʼomu ku baana abawere aba Baebbulaniya.”

⁷Awo mwannyina wʼomwana nʼasembera, nʼagamba muwala wa Falaawo nti, “Ŋŋende nkuyitire omulezi wʼabaana Omwebbulaniya ajje akumulerere?”

⁸Muwala wa Falaawo nʼamuddamu nti, “Kale, genda.” Omuwala mwannyina wʼomwana oyo bwe yagenda, yaleeta nnyina wa mwana!

⁹Muwala wa Falaawo nʼagamba nnyina wʼomwana nti, “Twala omwana ono omunderere, nnaakusasulanga.” Omukazi oyo nʼatwala omwana nʼamulera.

¹⁰ⓓ Omwana bwe yakula, nʼamutwalira muwala wa Falaawo, nʼafuuka omwana wa muwala wa Falaawo. Nʼamutuuma erinnya Musa, nʼagamba nti, “Kubanga namuggya mu mazzi.”

¹¹ⓔ Awo olwatuuka, Musa ngʼamaze okukula, nʼagendako mu bantu be Abaebbulaniya, nʼalaba emirimu emikakanyavu gye baali bakozesebwa. Nʼalaba Omumisiri ngʼakuba Omwebbulaniya, omuntu owʼomu baganda be.

¹²Awo Musa nʼamagamaga, bwe yalaba nga teri muntu mulala amulaba, nʼakwata Omumisiri nʼamutta, nʼamukweka mu musenyu.

¹³Bwe yaddayo enkeera, nʼalaba abasajja babiri Abaebbulaniya nga balwana. Nʼabuuza oyo eyali asobezza nti, “Lwaki okuba Mwebbulaniya munno?”

¹⁴Omusajja nʼamuddamu nti, “Ani eyakulonda okuba omufuzi waffe era omulamuzi waffe? Oyagala kunzita nga bwe watta Omumisiri?” Musa nʼatya, nʼayogera mu mutima gwe nti, “Ekintu kye nakola kirabika kyategeerebwa.”

¹⁵Awo Falaawo bwe yakiwulira, nʼagezaako okutta Musa. Naye Musa nʼaviira Falaawo, nʼaddukira mu nsi ya Midiyaani;[3] nʼatuula awali oluzzi.

¹⁶Waaliwo kabona mu Midiyaani eyalina abaana be abawala musanvu, ne bajja okusena amazzi bajjuze ebyesero banywese endiga za kitaabwe.

¹⁷ⓕ Kyokka ne wabaawo abasumba ne bajja ne babagobawo; naye Musa nʼasituka nʼabalwanirira, nʼanywesa endiga zaabwe.

¹⁸Abawala bwe baddayo eka eri kitaabwe Leweri,[4] nʼababuuza nti, “Nga mukomyewo mangu leero?”

¹⁹Ne bamuddamu nti, “Omusajja Omumisiri atulwaniridde ngʼabasumba batujoogereza; yʼatusenedde nʼamazzi nʼanywesa ekisibo kyaffe.”

²⁰Nʼabuuza bawala be nti, “Ali ludda wa? Ye lwaki mumuleseeyo? Mumuyite ajje alye ku mmere.”

²¹Musa nʼakkiriza. Nʼabeerera ddala mu maka ga Leweri. Leweri nʼawa Musa muwala we Zipola okuba mukyala we.

²²Zipola nʼamuzaalira omwana owoobulenzi. Musa nʼamutuuma erinnya Gerusomu, ngʼagamba nti, “Kubanga ndi mugwira mu nsi etali yange.”

²³Awo nga wayiseewo ebbanga ggwanvu, kabaka wʼe Misiri nʼafa. Abaana ba Isirayiri ne basindanga era ne bakaabanga olwʼobuddu bwe baalimu, nʼokukaaba kwabwe ne kutuuka eri Katonda.

²⁴Katonda nʼawulira okusinda kwabwe. Katonda nʼajjukira endagaano ye gye yalagaana ne Ibulayimu, ne Isaaka ne Yakobo.

²⁵Katonda nʼatunuulira abaana ba Isirayiri, nʼategeera okubonaabona kwabwe.