Okuva 20:1-26 LGCB2014 - Bible AI

¹Awo Mukama nʼayogera ebigambo bino, nʼagamba nti,

²“Nze Mukama Katonda wo, eyakuggya mu Misiri, mu nsi gye mwafuulirwa abaddu.”

³“Tobeeranga na bakatonda balala wabula Nze nzekka.”

⁴ⓢ “Teweekoleranga kintu kyonna ekyole ekifaanana nʼekintu kyonna ekiri waggulu mu ggulu, oba wansi ku nsi, oba ekiri mu mazzi agali wansi wʼensi.

⁵Tobivuunamiranga so tobisinzanga. Kubanga, nze Mukama Katonda wo ndi Katonda wa buggya; mbonereza abaana olwʼebibi bya bakitaabwe nʼebya bajjajjaabwe okutuusa ku mulembe ogwokusatu nʼogwokuna ogwʼabo abankyawa.

⁶Naye abo enkumi nʼenkumi abanjagala era abakwata amateeka gange, mbalaga okwagala kwange okutaggwaawo. ”

⁶

⁷“Tokozesanga linnya lya Mukama Katonda wo ngʼolayira ebitaliimu nsa; kubanga Mukama talirema kumusalira musango ne gumusinga omuntu oyo alayirira obwereere erinnya lye.

⁸Olunaku lwa Ssabbiiti lujjukirenga era olutukuzenga.

⁹Kolanga emirimu gyo, ofaabiine mu nnaku omukaaga,

¹⁰naye olunaku olwʼomusanvu ye Ssabbiiti ya Mukama Katonda wo. Ku lunaku olwo tokolerangako mulimu gwonna; ggwe, wadde mutabani wo, wadde muwala wo, wadde omuweereza wo omusajja, oba omuweereza wo omukazi, wadde ensolo zo, wadde omugenyi ali omumwo.

¹¹Kubanga mu nnaku omukaaga Mukama Katonda mwe yakolera eggulu nʼensi, nʼennyanja, ne byonna ebibirimu, nʼawummulira ku lunaku olwʼomusanvu. Mukama kyeyava awa omukisa olunaku olwa Ssabbiiti nʼalutukuza.”

¹¹

¹²“Kitaawo ne nnyoko obassangamu ekitiibwa, olyoke owangaale mu nsi Mukama gyʼakuwadde.”

¹²

¹³“Tottanga.”

¹³

¹⁴“Toyendanga.”

¹⁴

¹⁵“Tobbanga.”

¹⁵

¹⁶“Towaayirizanga muntu munno.”

¹⁶

¹⁷ⓣ “Teweegombanga nnyumba ya muliraanwa wo. Teweegombanga mukazi wa muliraanwa wo, newaakubadde omuweereza we omulenzi, newaakubadde omuweereza we omuwala, wadde ente ye oba endogoyi ye, oba ekintu kyonna ekya muntu munno.”

¹⁸ⓤ Awo abantu bwe baalaba okumyansa kwʼeraddu, ne bawulira nʼokubwatuka kwʼeggulu awamu nʼeddoboozi lyʼakagombe, ne balaba nʼolusozi nga lunyooka ne bakankana nga batidde nnyo. Ne bayimirira walako,

¹⁹ne bagamba Musa nti, “Ggwe yogera naffe, tujja kubiwuliriza. Naye Katonda aleme kwogera naffe tuleme okufa.”

²⁰Musa nʼagamba abantu nti, “Temutya, kubanga Katonda azze kubagezesa, mumutyenga bulijjo, mulyoke muleme okwonoona.”

²¹Abantu ne basigala nga bayimiridde walako, naye Musa nʼasembera mu kizikiza ekikwafu Katonda mwe yali.

²²Mukama nʼagamba Musa nti, “Bwʼoti bwʼoba otegeeza abaana ba Isirayiri nti, ‘Mmwe bennyini mwerabiddeko nga njogera nammwe nga nsinziira mu ggulu.

²³Temwekoleranga bakatonda balala wendi; temwekoleranga bakatonda ba ffeeza oba bakatonda ba zaabu.’ ”

²⁴“ ‘Munkolere ekyoto ekyʼettaka, muweereyo okwo ssaddaaka zammwe ezookebwa, nʼessaddaaka olwʼemirembe, eyʼendiga zo nʼente zo. Mu buli kifo mwe nnaaleeteranga erinnya lyange okuweebwa ekitiibwa, nnajjanga ne mbaweera omwo omukisa.

²⁵ⓥ Bwe munzimbiranga ekyoto ekyʼamayinja, temukizimbisanga mayinja mayooyoote, kubanga ekyuma bwe kirigakoonako kirigafuula agatasaanira kyoto kyange.

²⁶Ekyoto kyange temukizimbangako madaala, muleme okukiweebuula nga mulinnya amadaala.’ ”