Okuva 24:1-18 LGCB2014 - Bible AI

¹Awo Mukama nʼalagira Musa nti, “Mwambuke eno gye ndi, ggwe ne Alooni, ne Nadabu, ne Abiku, nʼabakulembeze ba Isirayiri nsanvu. Musinze nga mwesuddeko akabanga,

²Musa yekka yʼanaansemberera; abalala tebasembera. Era abantu tebasaana kujja naye.”

³Musa nʼajja nʼategeeza abantu ebigambo byonna Mukama bye yamugamba awamu nʼamateeka ge gonna. Abantu bonna ne baddiramu wamu ne bagamba nti, “Ebigambo ebyo byonna Mukama byʼagambye tunaabikola.”

⁴Bwʼatyo Musa nʼawandiika ebigambo byonna Mukama bye yayogera.

⁴Awo Musa nʼakeera mu makya nʼazimba ekyoto awo wansi wʼolusozi; nʼasimbako nʼempagi kkumi na bbiri ngʼebika bya Isirayiri ekkumi nʼebibiri bwe byali.

⁵Nʼatuma abasajja abavubuka Abayisirayiri, ne bawaayo ebiweebwayo ebyokebwa eri Mukama, ne ssaddaaka eyʼemirembe eyʼente.

⁶Musa nʼaddira ekitundu kyʼomusaayi nʼakissa mu mabeseni, nʼekitundu ekirala nʼakimansira ku kyoto.

⁷Nʼasitula Ekitabo kyʼEndagaano, nʼakisomera abantu nga bonna bawulira. Ne bagamba nti, “Ebyo byonna Mukama byʼagambye tujja kubikola; era tunaamugonderanga.”

⁸ⓑ Awo Musa nʼaddira omusaayi nʼagumansira ku bantu, nʼagamba nti, “Guno gwe musaayi gwʼendagaano Mukama Katonda gye yabalagira okukwata.”

⁹Awo Musa ne Alooni, ne Nadabu, ne Abiku, nʼabakulembeze ba Isirayiri ensanvu, ne bambuka;

¹⁰ne balaba Katonda wa Isirayiri. Wansi wʼebigere bye nga waliwo ngʼomwaliiro ogwʼamayinja ga safiro, agalabika obulungi ngʼeggulu eritaliiko bire.

¹¹Naye Katonda teyakola kabi konna ku bakulembeze ba Isirayiri abo; Katonda baamulaba, ne balya era ne banywa.

¹²Mukama nʼagamba Musa nti, “Yambuka eno gye ndi ku lusozi, obeere wano olinde; nzija kukuwa ebipande ebyʼamayinja okuli amateeka gʼempandiise ogayigirize abantu.”

¹³Awo Musa nʼasituka nʼomuweereza we Yoswa; Musa nʼayambuka ku lusozi lwa Katonda.

¹⁴Nʼagamba abakulembeze bʼabantu nti, “Mugira mutulindako wano nga naffe bwe tukomawo. Mbalekedde Alooni ne Kuuli; buli anaaba nʼensonga yonna agende gye bali, bajja kugimumalira.”

¹⁵Awo Musa nʼalinnyalinnya olusozi, ekire ne kirubikka.

¹⁶Ekitiibwa kya Mukama ne kibeera ku Lusozi Sinaayi. Ekire ne kibikka olusozi okumala ennaku mukaaga; ku lunaku olwʼomusanvu Mukama nʼayita Musa ngʼasinziira wakati mu kire.

¹⁷Abaana ba Isirayiri bwe baatunuulira ekitiibwa kya Mukama, ne kibalabikira ngʼomuliro ogwʼamaanyi ennyo ku ntikko yʼolusozi.

¹⁸Musa nʼayingira mu kire ngʼagenda alinnyalinnya olusozi. Ku lusozi yamalako ennaku amakumi ana.