Okuva 25:1-40 LGCB2014 - Bible AI

¹Mukama nʼayogera ne Musa nti,

²“Gamba abaana ba Isirayiri bandeetere ekiweebwayo. Buli muntu aleete ekiweebwayo ngʼokuteesa kwʼomutima gwe bwe kuli, okimunzijireko.

³Bino bye biweebwayo bye banaakukwasa: zaabu, ffeeza, ekikomo;

⁴olugoye olwa bbululu, nʼolwa kakobe, nʼolumyufu, nʼolwa linena ennungi; obwoya bwʼembuzi,

⁵amaliba gʼendiga ennume agasiigiddwa langi emyufu, nʼamaliba gʼente eyʼomu nnyanja; embaawo zʼomuti gwa akasiya;

⁶amafuta agʼomu ttaala; ebyʼobuloosa ebyʼokussa mu mafuta agʼokusiiga, nʼobubaane obwʼokunyookeza;

⁷amayinja onuku agʼomuwendo, nʼamayinja agʼokutona ku kkanzu eyʼobwakabona, ne ku kasawo kʼomu kifuba aka kabona;

⁸bankolere ekifo ekitukuvu ndyoke mbeerenga wakati mu bo.

⁹Mukole Eweema ya Mukama eyo entukuvu nʼebigibeeramu byonna nga bwe nnaabalagirira.

¹⁰“Bakole essanduuko mu muti gwa akasiya, obuwanvu mita emu ne sentimita kkumi na ssatu, obugazi sentimita nkaaga mu musanvu nʼobugulumivu sentimita nkaaga mu musanvu.

¹¹Ogiteekeko zaabu omuka ennyo munda ne kungulu, era ogyetoolooze omuge ogwa zaabu.

¹²Ogiweeseze empeta nnya eza zaabu ozisibe ku magulu gaayo ana, ngʼempeta ebbiri ziri ku ludda olumu, nʼendala ebbiri ku ludda lwayo olulala.

¹³Obajje emisituliro mu muti ogwa akasiya, ogibikkeko zaabu.

¹⁴Ogisonseke mu mpeta eziri ku ssanduuko, okusituzanga essanduuko.

¹⁵Emisituliro egyo ginaalekebwanga mu mpeta ze ssanduuko, si zaakuggyangamu.

¹⁶Mu ssanduuko omwo mwʼonossa Amateeka ge nnaakuwa.

¹⁷ⓒ “Okolereko ekisaanikira, ye ntebe eyʼokusaasira, nga kya zaabu omuka ennyo; obuwanvu bwakyo sentimita nkaaga mu musanvu, nʼobugazi sentimita nkaaga mu musanvu.

¹⁸Era okolereko ebifaananyi bya bakerubi babiri mu zaabu empeese, ku njuyi ebbiri ezʼekisaanikira.

¹⁹Oteeke ekifaananyi kya kerubi omu ku ludda lumu olwʼekisaanikira, nʼekifaananyi kya kerubi omulala ku ludda olwokubiri, nga ebifaananyi bya bakerubi byombi byekutte wamu nʼekisaanikira.

²⁰Ebiwaawaatiro bya bakerubi bibe bibikkule nga bisonze waggulu, era nga bisiikiriza ekisaanikira. Bakerubi batunulagane nga boolekedde ekisaanikira.

²¹Ekisaanikira onookissa kungulu ku Ssanduuko; ekiwandiiko ekyʼEndagaano eyʼAmateeka kye nnaakuwa, okisse munda mu Ssanduuko.

²²Awo waggulu wʼekisaanikira, mu bakerubi bombi abali ku Ssanduuko eyʼEndagaano, we nzija okukusisinkana ndyoke nkuwe ebiragiro byange byonna bye nkoledde abaana ba Isirayiri.

²³“Okole emmeeza mu muti gwa akasiya, obuwanvu bwayo sentimita kyenda, obugazi sentimita amakumi ana mu ttaano, nʼobugulumivu sentimita nkaaga mu musanvu.

²⁴Ogibikkeko zaabu omuka ennyo; era ogyetoolooze ne zaabu omuge gwonna.

²⁵Era ogyetoolooze olukugiro oluweza sentimita musanvu ne desimoolo ttaano obugazi, nʼomuge ogwa zaabu okwetooloola olukugiro olwo.

²⁶Ogikolere empeta nnya eza zaabu, ozisibe mu nsonda ennya awali amagulu ana.

²⁷Empeta zijja kubeera waggulu okumpi nʼomuge, emisituliro gyʼemmeeza mwe ginaayisibwa.

²⁸Okole emisituliro mu muti gwa akasiya, ogibikkeko zaabu, egyo emmeeza kwʼeneesitulirwanga.

²⁹Era ogikolere essowaani eza zaabu, nʼebijiiko ebya zaabu, nʼensuwa eza zaabu, nʼebibya ebya zaabu ebyʼokufukanga ebiweebwayo.

³⁰ⓓ Era ku mmeeza eno onossaako Emigaati egyʼOkulaga, egyʼokubeeranga mu maaso gange bulijjo.

³¹“Okole ekikondo kyʼettaala nga kya zaabu omuka. Ekikondo kyonna na bino ebikiriko: entobo yaakyo nʼenduli, ebikopo ebifaanana ngʼebimuli, amatabi nʼemitunsi nʼebimuli byako, byonna byakuweesebwa mu kyuma kya zaabu kimu bulambalamba.

³²Kunaabako amatabi mukaaga omutuula emisubbaawa: amatabi asatu nga gali ku ludda lumu, nʼamalala asatu nga gali ku ludda olulala.

³³Ku matabi gonna omukaaga agava ku kikondo kyʼettaala, kubeeko ku buli ttabi, ebikopo bisatu ebikole ngʼebimuli byʼalumondi; mu buli kikopo nga mulimu omutunsi nʼekimuli.

³⁴Ku kikondo kyʼettaala kyennnyini kubeeko ebikopo bina ebifaanana ebimuli byʼalumondi nga mulimu emitunsi nʼebimuli.

³⁵Omutunsi gumu gujja kuba wansi wʼamatabi abiri agava ku kikondo, nʼomutunsi ogwokubiri gubeere wansi wʼamatabi abiri amalala, nʼomutunsi ogwokusatu gubeere wansi wʼamatabi abiri amalala; amatabi gonna omukaaga ne gaggwaayo.

³⁶Emitunsi nʼamatabi biweesebwe mu kyuma kya zaabu omwereere, nga kiri bulambalamba nʼekikondo kyʼettaala.

³⁷“Era ekikondo kikolere ettaala musanvu; ettaala zino nga zaakira mu maaso gaakyo.

³⁸Makansi ezikomola entambi, nʼessowaani ezʼokussaako ebisirinza, byonna bikolebwe mu zaabu mwereere.

³⁹Ojja kwetaaga zaabu omwereere aweza obuzito bwa kilo asatu mu nnya, okukola ekikondo kyʼettaala ne byonna ebigenderako.

⁴⁰ⓔ Weegendereze, byonna obikole ngʼogoberera ekifaananyi kye nkulaze wano ku lusozi.”