1“Zimba ekyoto mu miti gya akasiya, obugulumivu mita emu ne desimoolo ssatu, nʼobuwanvu mita bbiri ne desimoolo ssatu, ate obugazi mita bbiri ne desimoolo ssatu.
2Era ku nsonda zaakyo ennya kolerako amayembe; ngʼekyoto nʼamayembe bibajjiddwa bumu mu muti gumu; ekyoto kyonna olyoke okibikkeko ekikomo.
3Kola ebbakuli omunaayoolerwanga evvu lyakyo, nʼebisena evvu, nʼebbensani, nʼewuuma zʼennyama, ne fulampeni; ebyo byonna nga bikolebwa mu kikomo.
4Ekyoto kikolere ekitindiro ekyʼobutimba ekyʼebyuma ebyʼekikomo; ku nsonda ennya ezʼekitindiro olyoke okolereko empeta nnya ezʼekikomo.
5Leebeeseza ekitindiro ekyo mu kyoto, nga waggulu kinyweredde ku muziziko ne kireebeeta okukoma wakati ngʼekyoto bwe kikka.
6Kola emisituliro gyʼekyoto mu muti gwa akasiya, ogibikkeko ekikomo.
7Emisituliro egyo ogiyingize mu mpeta ennya, gibeere ku njuyi zombi ezʼekyoto nga kibadde kisitulwa okubaako gye kitwalibwa.
8Ekyoto kikole nʼembaawo, nga wakati kya muwulukwa. Okikole nga bwe kyakulagibwa ku lusozi.
9“Eweema ya Mukama gikolere oluggya. Ku ludda olwa ddyo oluggya lubeere mita amakumi ana mu mukaaga obuwanvu, era nga lulina amagigi aga linena omulebevu alangiddwa,
10nʼentobo amakumi abiri nʼebikolo ebikondo mwe bituula ebyʼekikomo amakumi abiri; nga ku bikondo kuliko amalobo aga ffeeza nʼemikiikiro egya ffeeza.
11Ne ku ludda olwakkono oluggya lubeere mita ana mu mukaaga obuwanvu, era ebeeyo amagigi nʼebikondo amakumi abiri, nʼentobo zaabyo ebyʼekikomo amakumi abiri, nga ku bikondo kuliko amalobo aga ffeeza nʼemikiikiro egya ffeeza.
12“Ku ludda olwʼobugwanjuba oluggya lubeere mita amakumi abiri mu ssatu obugazi, era lubeere nʼamagigi nʼebikondo kkumi awamu nʼentobo zaabyo kkumi.
13Ku ludda olwʼebuvanjuba, enjuba gyʼefulumira, nayo oluggya lubeere mita amakumi abiri mu ssatu obugazi.
14Ku ludda olumu olwʼomulyango kubeereko amagigi mita mukaaga ne desimoolo mwenda obuwanvu, nʼebikondo bisatu nʼentobo zaabyo ssatu,
15ne ku ludda olulala nakwo kubeereko amagigi mita mukaaga ne desimoolo mwenda obuwanvu, nʼebikondo bisatu nʼentobo zaabyo ssatu.
16“Mu mulyango oguyingira mu luggya wanikamu eggigi mita mwenda obuwanvu, nga lya wuzi za bbululu, ne kakobe, ne myufu, ne linena endebevu ennange, nga bikolebwa omutunzi omukugu, era ngʼeggigi lirina ebikondo bina nʼentobo zaabyo nnya.
17Ebikondo byonna mu luggya bibeere nʼemikiikiro gya ffeeza, nʼamalobo ga ffeeza, nʼentobo za kikomo.
18Oluggya lubeere mita amakumi ana mu mukaaga obuwanvu, nʼobugazi mita amakumi abiri mu ssatu, nʼamagigi aga linena endebevu ennange, mita bbiri ne desimoolo ssatu obugulumivu, nʼentobo ezʼekikomo.
19Ebintu ebirala byonna ebinaakozesebwa ku mirimu gya Weema egya buli ngeri, ngʼotaddeko nʼobukondo obukomerera Weema nʼobwʼomu luggya, byonna bibeera bya kikomo.
20“Lagira abaana ba Isirayiri bakuleetere amafuta agʼemizeeyituuni amalungi ennyo agʼokukozesa mu ttaala, eryoke eyakenga obudde bwonna nga tezikira.
21Mu kisenge kya Weema ya Mukama Omukuŋŋaanirwa, ebweru wʼeggigi eribisse Endagaano, awo Alooni ne batabani be we banaabeeranga nga balabirira ettaala eyakirenga awali Mukama okuva olweggulo okutuusa mu makya. Lino libeere tteeka abaana ba Isirayiri lye banaakwatanga emirembe gyonna.”