1“Muganda wo Alooni muyiteyo mu baana ba Isirayiri, awamu ne batabani be: Nadabu, ne Abiku, ne Eriyazaali, ne Isamaali, bajje bampeereze nga be bakabona.
2Muganda wo Alooni mutungire ebyambalo ebitukuvu, nga bya kitiibwa era nga birabika bulungi.
3Yogera nʼabo bonna abasobola, be nawa ekirabo ekyʼamagezi mu mirimu egyo, bakolere Alooni ebyambalo mwʼanaayawulirwa okubeera kabona wange.
4Bino bye byambalo bye banaakola: ekyʼomu kifuba, ekkanzu eyʼobwakabona okutali mikono ennyimpi eyitibwa ekkanzu eyʼobwakabona eyitibwa efodi; ngʼekoma mu ntumbwe; omunagiro; ekkooti erimu obusaze obwʼobusimba nʼobwʼobukiika; ekitambaala; nʼolukoba. Bakolere Alooni ne batabani be ebyambalo ebitukuvu balyoke bampeereze nga be bakabona.
5Abakozi baweebwe ewuzi eza zaabu, ne bbululu, ne kakobe, ne myufu, ne linena omulebevu omulange.
6“Abakozi abakugu bakole ekkanzu eyʼobwakabona ennyimpi etaliiko mikono nʼewuzi eza zaabu, ne bbululu, ne myufu, ne linena omulebevu omulange.
7Ebeere nʼebyʼokubibegabega bibiri nga bitungiddwa wʼekoma, eryoke egattibwe bulungi.
8Omusipi gwayo mu kiwato gukolebwe nʼamagezi mangi nga aganaakola ekkanzu eyʼobwakabona, era nʼebinaakola bifaanagane, ngʼewuzi za zaabu, ne bbululu, ne kakobe, ne myufu, ne linena omulebevu alangiddwa.
9“Oddire amayinja ga enuku abiri, ogalambeko amannya ga batabani ba Isirayiri,
10amannya mukaaga ku jjinja erimu, nʼamannya gʼabasigaddewo omukaaga ku jjinja eryokubiri, ngʼokuzaalibwa kwabwe bwe kugenda kuddiriragana.
11Olambe amannya ga batabani ba Isirayiri ku mayinja ago abiri ngʼomusazi wʼamayinja bwʼayola akabonero ku jjinja; ogateeke mu fuleemu ogeetoolooze nʼemikugiro egya zaabu.
12Amayinja ago ojja gakwasiza ku byʼokubibegabega ebyʼekkanzu eyʼobwakabona eyitibwa efodi, ngʼamayinja agʼekijjukizo kyʼabaana ba Isirayiri. Alooni asitulenga amannya gaabwe awali Mukama ngʼekijjukizo.
13Okole fuleemu eza zaabu,
14nʼenjegere bbiri eza zaabu omuka, ozirange ngʼemiguwa; olyoke osibire enjegere ezo ku fuleemu.
15“Kola ekyomukifuba ekyʼokutereezanga ensonga, nga mulimu gwa kikugu ngʼogwʼekkanzu eyʼobwakabona eyitibwa efodi, nʼewuzi eza zaabu, ne bbululu, ne kakobe, ne myufu, ne linena omulebevu omulange.
16Kijja kwenkanankana, buli ludda sentimita amakumi abiri mu bbiri, okiwetemu wakati.
17Otungireko ennyiriri nnya ezʼamayinja agʼomuwendo omungi. Mu lunyiriri olusooka osseemu amayinja saasiyo, ne topazi, ne kaabankulo;
18ne mu lunyiriri olwokubiri osseemu emalada, ne safiro ne dayamandi;
19ne mu lunyiriri olwokusatu osseemu jasinta; ne ageti, ne ametisita,
20ne mu lunyiriri olwokuna osseemu berulo, ne onuku, ne jasifa, ogateeke mu fuleemu ya zaabu.
21Wabeerewo amayinja kkumi nʼabiri, nʼamannya gaago ngʼamannya gʼabatabani ba Isirayiri. Gasalibwe bulungi ngʼobubonero obuwoolebwa, nga ku buli limu kulambiddwako erinnya lyako okumalirayo ddala amannya gʼebika ekkumi nʼebibiri.
22“Ekyomukifuba kikolere enjegere ennange ngʼemiguwa gya zaabu omuka.
23Era ekyomukifuba kikolere empeta za zaabu bbiri, oteeke empeta ezo zombi ku mikugiro ebiri egyʼekyomu kifuba.
24Oyise enjegere ebbiri eza zaabu mu mpeta ebbiri eziri ku mikugiro gyʼekyʼomu kifuba.
25Oddire enjuuyi ebbiri ezisigaddewo ezʼenjegere ozikwasize ku fuleemu ebbiri, ozinywereze mu maaso gʼebyʼoku bibegabega byombi ebyʼekkanzu eyʼobwakabona eyitibwa efodi.
26
27Era okole empeta bbiri eza zaabu oziteeke mu maaso, mu bitundu ebya wansi ebyʼebyʼokubibegabega byombi ebyʼekkanzu eyʼobwakabona eyitibwa efodi, wagguluko okumpi nʼoluzizi lwʼomusipi olwʼekkanzu eyʼobwakabona eyitibwa efodi.
28Empeta ezʼoku kyomukifuba zisibwe wamu nʼempeta zʼekkanzu eyʼobwakabona eyitibwa efodi nʼakaguwa aka bbululu, kagattibwe nʼolukoba, olwʼomu kifuba luleme kutaggulukuka ku kkanzu eyʼobwakabona eyitibwa efodi.
29“Buli kiseera Alooni lwʼanaayingiranga mu Kifo Ekitukuvu, anaabanga ayambadde amannya ga batabani ba Isirayiri ku kyomukifuba ekyʼokumala ensonga, nga kiri ku mutima gwe, kibeerenga ekijjukizo awali Mukama.
30
31“Onookola ekyambalo ekiri ngʼekkanzu eyʼobwakabona eyitibwa efodi, nga kyonna kya bbululu.
32Waggulu mu makkati gaakyo munaabaamu ekituli omwʼokuyisa omutwe; okwetooloola ekituli ekyo kunaabaako omuge omuyonde obulungi ngʼomuleera ku kituli kyʼomutwe ekyʼekkanzu eyʼobwakabona, kireme okuyulika.
33Okwetooloola ebirenge wansi onootungayo amajjolobera mu wuzi eza bbululu, ne kakobe, ne myufu; nga mu makkati ga buli langi eziriraanye otobekamu obude obwa zaabu.
34Ngʼotunga amajjolobera nʼozzaako akade, ate nʼoddiriza amajjolobera nʼozzaako akade; bwʼotyo okwetooloola ebirenge byʼekyambalo ekyo.
35Gunaabanga mulimu gwa Alooni okwambala ekyambalo ekyo ngʼagenda okuweereza. Obude obwo bunaawulirwanga ngʼayingira mu Kifo Ekitukuvu awali Mukama, ne bwʼanaabanga afuluma, aleme okufa.
36“Onookola akapande aka zaabu omuka ennyo, okayoleko, nga bwe bayola akabonero, nti, ‘MUTUKUVU WA MUKAMA.’
37Akapande okasibeko akaguwa aka bbululu, okanywereze ku kitambaala kyʼoku mutwe ku ludda olwʼomu maaso olwʼekitambaala.
38Akapande ako kanaabeeranga mu kyenyi kya Alooni, era Alooni yʼanaabangako obuvunaanyizibwa nga wabaddewo ebitatuuse mu biweebwayo ebitukuvu abaana ba Isirayiri bye banaaleetanga nga bamaze okubyawula ngʼebirabo byabwe ebitukuvu; kanaabeeranga ku kyenyi kye bulijjo, Mukama alyoke akkirize ebirabo ebyo.
39“Luka ekkooti erimu obusaze obwʼobusimba nʼobwʼobukiika mu wuzi eza linena omulebevu, era okole nʼekitambaala ekyʼoku mutwe mu linena omulebevu, era okole olukoba ngʼolutunzeemu amajjolobera.
40Batabani ba Alooni bakolere amakooti, nʼemisipi, nʼenkuufiira; nga byonna bya kitiibwa era nga birabika bulungi nnyo.
41Alooni muganda wo mwambaze ebyambalo ebyo, ne batabani be nabo bwʼotyo; olyoke obafukeko amafuta agʼomuzeeyituuni, obaawule, obatukuze, bampeerezenga nga be bakabona.
42“Bakolere empale ezʼomunda eza linena, nga ziva mu kiwato okukoma mu bisambi, zibikke omubiri gwabwe.
43Alooni ne batabani be banaazambalanga nga bajja mu Weema ya Mukama Omukuŋŋaanirwa oba bwe banaasembereranga Ekyoto okuweereza mu Kifo Ekitukuvu, baleme okwereetako omusango ne bafa.