Okuva 3:1-22 LGCB2014 - Bible AI

¹Awo olwatuuka, Musa bwe yali ngʼalunda ekisibo kyʼendiga za mukoddomi we Yesero, kabona wʼe Midiyaani, nʼatwala ekisibo ku ludda olwʼebugwanjuba olwʼeddungu; nʼatuuka ku lusozi lwa Katonda[5] oluyitibwa Kolebu.

²ⓖ Malayika wa Mukama nʼamulabikira ngʼasinziira mu muliro ogwaka, mu makkati gʼekisaka. Musa nʼatunuulira ekisaka, nʼalaba nga kyaka naye nga tekisiriira.

³Musa nʼayogera mu mwoyo gwe nti, “Leka nneetoolooleko neetegereze ekintu kino ekitali kya bulijjo, ekyʼekitalo, ekireetedde ekisaka obutasiriira.”

⁴Mukama bwe yalaba nga Musa agenze okwetegereza, Katonda nʼamuyita ngʼasinziira mu kisaka wakati nti, “Musa, Musa!” Musa nʼayitaba nti, “Nze nzuuno.”

⁵ⓗ Katonda nʼamugamba nti, “Teweeyongera kusembera. Ggyamu engatto zo, kubanga ekifo wʼoyimiridde kitukuvu.”

⁶Ne yeeyongera nʼamugamba nti, “Nze Katonda wa kitaawo, era nze Katonda wa Ibulayimu, nze Katonda wa Isaaka, era nze Katonda wa Yakobo.” Musa bwe yawulira ebyo nʼakweka amaaso ge, kubanga yatya okutunuulira Katonda.

⁷ⓘ Awo Mukama Katonda nʼayogera nti, “Ndabidde ddala okubonaabona kwʼabantu bange abali mu Misiri. Mpulidde ebiwoobe byabwe olwʼabo ababatuntuza ngʼabaddu; era ntegedde okubonaabona kwabwe.

⁸Kyenvudde nzika, mbawonye effugabbi eryʼAbamisiri, era mbaggye mu nsi eyo, mbaleete mu nsi ennungi era engazi, yʼensi ekulukuta amata nʼomubisi gwʼenjuki; kaakano mwe muli Abakanani, nʼAbakiiti, nʼAbamoli, nʼAbaperezi, nʼAbakiivi nʼAbayebusi.

⁹Kale mpulidde okukaaba kwʼabaana ba Isirayiri, era ndabye ngʼAbamisiri bwe bababonyaabonya.

¹⁰ⓙ Noolwekyo, jjangu nkutume ewa Falaawo, oggyeyo abantu bange abaana ba Isirayiri mu Misiri.”

¹¹Naye Musa nʼagamba Katonda nti, “Nange nze ani agenda ewa Falaawo nziggyeyo abaana ba Isirayiri mu Misiri?”

¹²Katonda nʼamuddamu nti, “Ddala, nnaabeeranga naawe. Era kino kye kikakasa nti Nze nkutumye: Bwʼolimala okuggya abantu abo mu Misiri, mulisinziza Katonda ku lusozi luno.”

¹³Awo Musa nʼabuuza Katonda nti, “Bwe ndituuka mu baana ba Isirayiri ne mbategeeza nti, ‘Katonda wa bajjajjammwe antumye gye muli;’ nabo ne bambuuza nti, ‘Erinnya lye ye ani?’ Ndibaddamu ntya?”

¹⁴ⓚ Katonda nʼagamba Musa nti, “NDI NGA BWE NDI,” nʼayongera nti, “Bwʼotyo bwʼonootegeeza abaana ba Isirayiri nti, ‘NDI yʼantumye gye muli.’”

¹⁵Katonda nʼayongera nʼagamba Musa nti, “Tegeeza abaana ba Isirayiri nti, ‘MUKAMA, Katonda wa bajjajjammwe: Katonda wa Ibulayimu, era Katonda wa Isaaka, era nga ye Katonda wa Yakobo, yʼantumye gye muli.’ Eryo lye linnya lyange eryʼolubeerera, era lye linnya lye nnajjuukirirwangako mu buli mulembe ogunaddiriranga gunnaagwo.

¹⁶“Genda okuŋŋaanye abakadde ba Isirayiri, obategeeze nti, ‘Mukama, Katonda wa bajjajjammwe, Katonda wa Ibulayimu, era owa Isaaka, era owa Yakobo, yandabikira, nʼaŋŋamba nti, Ntunuulidde abantu bange, ne ndaba ebibakolebwa mu Misiri.

¹⁷Kyenvudde nsuubiza okubaggya mu kubonaabona kwe balimu mu Misiri, mbaleete mu nsi yʼAbakanani, nʼAbakiiti, nʼAbamoli, nʼAbaperezi, nʼAbakiivi, nʼAbayebusi; yʼensi ekulukuta amata nʼomubisi gwʼenjuki.’

¹⁸“Abakadde ba Isirayiri bagenda kuwuliriza byʼogamba. Kale, ggwe nʼabakadde ba Isirayiri muligenda eri kabaka wa Misiri ne mumugamba nti, ‘Mukama, Katonda wʼAbaebbulaniya yeeraga gye tuli. Tukkirize tugende mu ddungu, olugendo lwa nnaku ssatu, tuweeyo ssaddaaka eri Mukama Katonda waffe.’

¹⁹Naye mmanyi nga kabaka wʼe Misiri talibakkiriza kugenda, wabula ngʼawalirizibbwa nʼamaanyi mangi.

²⁰Kyendiva nkozesa amaanyi gange, ne mbonereza Misiri nʼebyamagero bye ndikolera mu nsi omwo; nʼoluvannyuma alibakkiriza ne mugenda.

²¹ⓛ “Era Abamisiri ndibaagazisa abantu abo; bwe mutyo bwe muliba musitula, temulivaayo ngalo nsa.

²²Buli mukazi Omuyisirayiri alisaba omukazi Omumisiri muliraanwa we, nʼoyo bwe basula mu nju emu, ebitemagana ebya ffeeza nʼebya zaabu, nʼengoye ezʼokwambala. Ebyo byonna mulibyambaza batabani bammwe ne bawala bammwe; Abamisiri ne muleka nga mubakalizza.”