Okuva 31:1-18 LGCB2014 - Bible AI

¹Awo Mukama nʼagamba Musa nti,

²“Laba, nnonze Bezaaleeri mutabani wa Uli, muzzukulu wa Kuuli, owʼomu kika kya Yuda;

³era mmujjuzza Omwoyo wa Katonda, nʼokumanya, nʼobusobozi nʼamagezi mu kukola ebitali bimu ebyemikono

⁴okutetenkanya ebintu ebinaakolebwa mu zaabu ne ffeeza nʼekikomo, nga bwe binaafaanana,

⁵okwola amayinja nʼokugategeka, nʼokwola emiti, era nʼokukola byonna ebyemikono ebya buli ngeri.

⁶Ate mmulondeddeko Okoliyaabu mutabani wa Akisamaki, owʼomu kika kya Ddaani, okumuyamba. Era abakola ebyemikono mbawadde amagezi okukola bino byonna bye nkulagidde:

⁷Eweema ya Mukama Omukuŋŋaanirwa, nʼEssanduuko eyʼEndagaano nʼekibikkako ekyʼentebe eyʼokusaasira, awamu nʼebikozesebwa byonna mu Weema ya Mukama,

⁸emmeeza nʼebigenderako, ekikondo ekya zaabu omuka ekyʼettaala nʼebigenderako, nʼekyoto ekyʼobubaane,

⁹nʼekyoto ekyʼebiweebwayo ebyokebwa nʼebigenderako, nʼebbensani ne kwʼetuula;

¹⁰nʼebyambalo ebyalukibwa obulungi, ebyambalo ebitukuvu ebya Alooni, kabona, nʼebyambalo bya batabani be bye baweererezaamu mu bwakabona;

¹¹nʼamafuta agʼokufukibwa, nʼebyakaloosa akalungi akʼomu Kifo Ekitukuvu. Byonna babikole nga bwe nakulagira.”

¹²Awo Mukama nʼagamba Musa nti,

¹³“Tegeeza abaana ba Isirayiri nti, Munaateekwanga okukuuma Ssabbiiti zange, kubanga ako ke kabonero akanaabeeranga wakati wammwe nange mu mirembe gyammwe gyonna, mulyoke mumanye nga Nze Mukama, Nze mbatukuza.

¹⁴“ ‘Munaakuumanga Ssabbiiti, kubanga lunaku lutukuvu. Buli anaaluweebuulanga waakufa; ne buli anaakolanga omulimu gwonna ku lunaku olwo waakuggibwa mu bantu be, attibwe.

¹⁵ⓛ Emirimu ginaakolwanga mu nnaku mukaaga, naye olunaku olwʼomusanvu ye Ssabbiiti eyʼokuwummula, lunaku lwa Mukama lutukuvu. Buli anaakolanga omulimu ku lunaku lwa Ssabbiiti wa kuttibwa.

¹⁶Noolwekyo abaana ba Isirayiri banaakumanga olunaku lwa Ssabbiiti, nga balujjukira mu mirembe gyabwe gyonna, ngʼendagaano etaggwaawo.

¹⁷Kanaabeeranga kabonero wakati wange nʼabaana ba Isirayiri emirembe gyonna, akalaga nti Katonda yakola eggulu nʼensi mu nnaku mukaaga, ne ku lunaku olwʼomusanvu nʼalekeraawo okukola, nʼawummula.’ ”

¹⁸Awo Mukama bwe yamaliriza okwogera ne Musa ku lusozi Sinaayi, nʼawa Musa ebipande bibiri ebyʼamayinja, ebyʼEndagaano Katonda gye yawandiika nʼengalo ye, ye kennyini.