Okuva 32:1-35 LGCB2014 - Bible AI

¹Abantu bwe baalaba nga Musa aluddeyo nnyo ku lusozi, ne bakuŋŋaanira awali Alooni, ne bamugamba nti, “Jjangu, otukolere bakatonda abanaatukulembera; kubanga Musa ono eyatuggya mu nsi yʼe Misiri, tetumanyi kimutuuseeko.”

²Alooni nʼabaddamu nti, “Mwambule empeta eza zaabu, bakyala bammwe, ne batabani bammwe, ne bawala bammwe ze bambadde ku matu gaabwe, muzindeetere.”

³Awo abantu bonna ne beenaanulako empeta zaabwe eza zaabu ezʼoku matu, ne bazireetera Alooni.

⁴ⓜ Alooni nʼazisaanuusa; zaabu eyavaamu nʼagibumbamu ennyana, ngʼagirongoosa nʼekyuma. Ne balyoka boogera nti, “Bano be bakatonda bo ggwe Isirayiri abaakuggya mu nsi yʼe Misiri!”

⁵Alooni bwe yalaba ebyo, nʼazimba ekyoto mu maaso gʼennyana, nʼalyoka alangirira nti, “Enkya tujja kukolera mukama embaga.”

⁶Awo enkeera, abantu ne bazuukuka mu makya, ne bawaayo ebiweebwayo ebyokebwa, ne baleeta nʼebiweebwayo olwʼemirembe; ne batuula ne balya era ne banywa, ne basituka ne bakola effujjo.

⁷Mukama nʼagamba Musa nti, “Serengeta, kubanga abantu bo be waggya mu nsi eyʼe Misiri boonoonye;

⁸bavudde mangu mu kkubo lye nabalagira; beekoledde ennyana ensaanuuse ne bagisinza, ne bagireetera ebiweebwayo, ne boogera nti, ‘Bano be bakatonda bo, ggwe Isirayiri, abaakuggya mu nsi yʼe Misiri!’ ”

⁹Mukama nʼagamba Musa nti, “Abantu bano mbalabye, era ndabye nga bakakanyavu.

¹⁰Kale, kaakano ndeka obusungu bwange bubabuubuukireko, mbazikirize; kyokka ggwe ndikufuula eggwanga ekkulu.”

¹¹Naye Musa ne yeegayirira Mukama Katonda we, nʼagamba nti, “Lwaki obusungu bwo bubuubuukira abantu bo be waggya mu nsi yʼe Misiri nʼobuyinza, awamu nʼomukono gwo ogwʼamaanyi?

¹²Lwaki okwogeza Abamisiri nti, ‘Yabatwala ngʼagenderedde kubakola kabi, abattire mu nsozi, abazikirize, bave ku nsi?’ Nyiigulukuka, obusungu obubuubuuka bukuveeko, oleme kuleeta bulabe ku bantu bo.

¹³Jjukira abaweereza bo Ibulayimu, ne Isaaka, ne Isirayiri, be walayirira ggwe kennyini, nʼobagamba nti, ‘Ndyaza bazzukulu bammwe ngʼemmunyeenye ezʼoku ggulu, era nʼensi eno gye mbasuubizza ndigiwa bazzukulu bammwe, era eribeera omugabo gwammwe ennaku zonna.’ ”

¹⁴Mukama akabi ke yali ategese okukola abantu be nʼatakaleeta.

¹⁵Awo Musa nʼaserengeta okuva ku lusozi ngʼakutte mu mikono gye ebipande ebibiri ebyʼEndagaano, nga biwandiikiddwako ku njuyi zombi.

¹⁶Ebipande byakolebwa Katonda, nʼebiwandiike ebyaliko byali bya Katonda, nga ye yabisala ku bipande ebyo.

¹⁷Yoswa bwe yawulira oluyoogaano lwʼabantu nga baleekaana, nʼagamba Musa nti, “Mu lusiisira eriyo okuyoogaana ngʼokwʼolutalo.”

¹⁸Naye nʼamuddamu nti, “Siwulira maloboozi galeekaana olwʼobuwanguzi, oba amaloboozi gʼokwaziirana olwʼokuwangulwa, naye maloboozi ga kuyimba ge mpulira.”

¹⁹Naye Musa bwe yasemberera olusiisira, nʼalengera ennyana, nʼalaba nʼamazina; obusungu bwe ne bubuubuuka, nʼasuula eri ebipande ebyali mu mikono gye, ne bimenyekera awo wansi wʼolusozi.

²⁰Nʼaddira ennyana gye baali bakoze nʼagyokya mu muliro nʼagisekulasekula, nʼagimerungulira ddala ngʼolufuufu; olufuufu nʼalumansa ku mazzi nʼagawa abaana ba Isirayiri ne baganywa.

²¹Awo Musa nʼagamba Alooni nti, “Abantu bano baakukoze ki, nʼobaleetera okwonoona ennyo bwe batyo?”

²²Alooni nʼamuddamu nti, “Tonnyiigira nnyo, mukama wange, naawe abantu bano obamanyi, ngʼemitima gyabwe bwe gyamanyiira okwonoona.

²³Baŋŋambye nti, ‘Tukolere bakatonda abanaatukulembera kubanga Musa ono eyatuggya mu nsi yʼe Misiri, tetumanyi kimutuuseeko.’

²⁴Nange kwe kubagamba nti, ‘Buli alina ebya zaabu abyeyambuleko,’ ne babimpa ne mbiteeka mu muliro, ne bivaamu ennyana eno.”

²⁵Awo Musa bwe yalaba ngʼabantu basasamadde, nga Alooni yali abalese ne basasamala, era ngʼabalabe baabwe babasekerera,

²⁶nʼayimirira mu mulyango gwʼolusiisira, nʼagamba nti, “Ani ali ku ludda lwa Mukama? Ajje wano we ndi.” Awo batabani ba Leevi bonna ne bakuŋŋaanira wʼali.

²⁷Nʼabagamba nti, “Bwʼati Mukama Katonda wa Isirayiri bwʼayogera nti, ‘Buli musajja yeesibe ekitala kye mu kiwato kye, muyiteeyite mu nsiisira okuva ku ludda olumu okutuuka ku ludda olulala, nga buli musajja atta muganda we ne mukwano gwe, ne muliraanwa we.’ ”

²⁸Abaleevi ne bakola nga Musa bwe yabalagira; era ku lunaku olwo abantu ngʼenkumi ssatu ne battibwa.

²⁹Awo Musa nʼagamba nti, “Mwawuddwa leero eri Mukama, bwe musse buli omu mutabani we, era ne muganda we; Mukama abawadde omukisa ku lunaku lwa leero.”

³⁰Enkeera Musa nʼagamba abantu nti, “Mwonoonye nnyo. Naye nze ka ŋŋende eri Mukama ndabe obanga nnaatangiririra ekibi kyammwe.”

³¹Bwʼatyo Musa nʼaddayo eri Mukama, nʼagamba nti, “Kitalo! Abantu bano nga boonoonye nnyo; bwe beekoledde bakatonda aba zaabu!

³²ⓝ Bwʼoba osiima basonyiwe ekibi kyabwe; naye bwe kitaba kityo, nkwegayirira onsangule mu kitabo kyo kyʼowandiise.”

³³Naye Mukama nʼagamba Musa nti, “Oyo yekka ankozeeko ekibi gwe ndisangula mu kitabo kyange.

³⁴Kaakano genda otwale abantu mu kifo ekyo kye nakutegeeza; era, laba, malayika wange ajja kukukulembera. Naye ekiseera nga kituuse okubabonereza ndibabonerereza ddala olwʼekibi kyabwe.”

³⁵Awo Mukama nʼaleetera abantu kawumpuli, kubanga beekolera ennyana, Alooni gye yababumbira.