1Yazimba ekyoto ekyʼekiweebwayo ekyokebwa mu miti gyʼakasiya, mita emu ne desimoolo ssatu obugulumivu, ne mita bbiri ne desimoolo ssatu obuwanvu, ate obugazi mita bbiri ne desimoolo ssatu.
2Ku nsonda zaakyo ennya yakolerako amayembe; ngʼekyoto nʼamayembe yabibajja bumu mu nduli yʼomuti emu. Ekyoto kyonna nʼalyoka akibikkako ekikomo.
3Ate nʼakola ebyʼokukozesa ku kyoto: ensaka, nʼebisena evvu, nʼebbensani, nʼewuuma zʼennyama, ne fulampeni. Ebyo byonna yabikola mu kikomo.
4Ekyoto yakikolera ekitindiro ekyʼobutimba obwʼekikomo, nʼakireebeeseza ku mukiikiro gwʼekyoto, nʼakissa mu kyoto okutuuka mu makkati gaakyo.
5Nʼakola empeta nnya ku nsonda ennya ezʼekitindiro kyʼekikomo nga ze zʼokuwanirira emisituliro.
6Emisituliro gino yagibajja mu muti gwa akasiya, nʼagibikkako ekikomo.
7Nʼasonseka emisituliro egyo ngʼagiyisa mu mpeta mu mbiriizi zʼekyoto, gikozesebwenga ngʼekyoto kisitulwa. Yakikola nʼembaawo nga wakati kya muwulukwa.
8Nʼakola ebbensani eyʼekikomo nʼakameeza kaayo, bye yaweesa okuva mu ndabirwamu ezʼekikomo ezaagabwa abakazi abaaweerezanga ku mulyango gwʼEweema ya Mukama eyʼOkukuŋŋaanirangamu.
9Ekyaddirira, yakola oluggya. Ku luuyi olwʼobukiikaddyo, oluggya lwali obuwanvu mita amakumi ana mu mukaaga, nga lulina amagigi aga linena omulungi omulebevu alangiddwa,
10nʼebikondo amakumi abiri, nʼentobo mwe bituula ezʼekikomo amakumi abiri, nga kuliko amalobo aga ffeeza nʼemikiikiro egya ffeeza.
11Ne ku luuyi olwʼobukiikakkono oluggya lwali obuwanvu mita ana mu mukaaga, nʼebikondo amakumi abiri, nʼebikolo byabyo mwe bituula ebyʼekikomo amakumi abiri, nga ku bikondo kuliko amalobo aga ffeeza nʼemikiikiro gyako gyali gya ffeeza.
12Ku luuyi olwʼebugwanjuba oluggya lwali lwa mita amakumi abiri mu bbiri, ne desimoolo ttaano nga luliko entimbe, nʼebikondo kkumi, nʼentobo kkumi; nʼamalobo nʼemikiikiro nga bya ffeeza.
13Ne ku luuyi olwʼebuvanjuba oluggya lwali obugazi mita amakumi abiri mu bbiri nʼobutundu butaano.
14Ku ludda olumu olwʼomulyango kwaliko amagigi obuwanvu mita mukaaga nʼobutundu munaana, nʼebikondo bisatu nʼentobo zaabyo ssatu.
15Ne ku ludda olulala olwʼomulyango nakwo kwaliko entimbe obuwanvu mita mukaaga nʼobutundu munaana, era nʼebikondo bisatu nʼentobo zaabyo ssatu.
16Entimbe zonna okwebungulula oluggya zaali za linena omulungi omulebevu alangiddwa.
17Entobo zʼebikondo zaali za kikomo, naye amalobo nʼemikiikiro gyako nga bya ffeeza, ne ku mitwe gyabyo nga kubikkiddwako ffeeza; bwe bityo ebikondo byonna ebyʼomu luggya byaliko emikiikiro gya ffeeza.
18Olutimbe olwʼomu mulyango gwʼoluggya lwakolebwa mu linena omulungi omulebevu alangiddwa obulungi, nga lutungiddwamu amajjolobera mu wuzi eza bbululu, ne kakobe ne myufu. Lwali luweza obuwanvu mita mwenda nʼobugulumivu mita bbiri nʼobutundu busatu, ngʼentimbe ezʼoluggya bwe zaali.
19Lwalina empagi nnya, nʼentobo zaazo nnya nga za kikomo, nʼamalobo gaazo nʼemikiikiro nga bya ffeeza, ne kungulu kwonna ne kubikkibwako ffeeza.
20Enkondo zonna ezʼEweema ya Mukama nʼokwebungulula oluggya zaali za kikomo.
21Bino bye bintu byonna ebyakozesebwa ku Weema, Eweema ya Mukama eyʼObujulizi, nga Musa bwe yalagira okubibala bikozesebwe Abaleevi nga balabirirwa Isamaali mutabani wa Alooni kabona.
22Bezaaleeri, mutabani wa Uli muzzukulu wa Kuuli, owʼomu kika kya Yuda, nʼakola ebyo byonna Mukama bye yalagira Musa;
23baakolera wamu ne Okoliyaabu, mutabani wa Akisamaki owʼomu kika kya Ddaani, eyali omukugu ennyo mu kwola ne mu kutetenkanya, nʼokutunga amajjolobera mu linena ennungi endebevu ennange nʼewuzi eza bbululu ne kakobe ne myufu.
24Zaabu yenna eyali aweereddwayo eri Mukama, eyakozesebwa mu kuzimba ekifo ekitukuvu, yali nga ttani emu, ngʼokupima kwʼAwatukuvu okutongole bwe kuli.
25
26Noolwekyo, buli muntu yawangayo gulaamu ttaano ne desimoolo ttaano ngʼokupima kwʼAwatukuvu okutongole bwe kuli ngʼaweebwayo abo abaabalibwa nga bava ku myaka egyʼobukulu amakumi abiri nʼokweyongerayo, bonna baawera abasajja obusiriivu mukaaga mu enkumi ssatu mu bitaano mu ataano.
27Ffeeza owʼobuzito bwa kilo enkumi ssatu mu ebikumi bina ye yasaanuusibwa okukolamu entobo ekikumi ezʼAwatukuvu nʼeggigi: noolwekyo, nga buli kilo amakumi asatu mu nnya zikola entobo emu.
28Kilo amakumi asatu ezaasigalawo zaakolwamu amalobo agʼoku bikondo nʼemikiikiro gyabyo, nʼokubikka ku mitwe gyʼebikondo.
29Ekikomo ekyaweebwayo eri Mukama kyali kilo enkumi bbiri mu ebikumi bina.
30Omwo Bezaaleeri mwe yakola ekituurwamu ekyʼomulyango gwʼEweema ya Mukama eyʼOkukuŋŋaanirangamu, nʼekyoto ekyʼekikomo, nʼekitindiro ekyʼobutimba ekyʼekikomo, nʼebikozesebwa ebirala byonna ebyʼekyoto,
31nʼekituurwamu okwebungulula oluggya, nʼekituurwamu ekyʼomulyango omunene ogwʼoluggya, nʼenkondo zonna ezʼEweema ya Mukama, nʼenkondo zonna okwebungulula oluggya.