Okuva 4:1-31 LGCB2014 - Bible AI

¹Musa nʼaddamu nti, “Tebagenda kunzikiriza, wadde okuwuliriza ebyo bye mbagamba: kubanga bagenda kwogera nti, Mukama takulabikiranga.”

²ⓜ Awo Mukama nʼamubuuza nti, “Ekyo kiki ekiri mu ngalo zo?” Nʼaddamu nti, “Muggo.”

³Mukama Katonda nʼamugamba nti, “Gusuule wansi.” Musa nʼagusuula wansi; ne gufuuka omusota, nʼagudduka!

⁴Mukama nʼagamba Musa nti, “Golola omukono gwo ogukwate akawuuwo ogusitule.” Nʼagolola omukono gwe nʼagukwata, ne gufuuka omuggo mu mukono gwe.

⁵Mukama nʼamugamba nti, “Bwʼolikola bwʼotyo bagenda kukukkiriza, era balitegeera nga Mukama Katonda wa bajjajjaabwe, Katonda wa Ibulayimu, era Katonda wa Isaaka, era Katonda wa Yakobo, yakulabikira.”

⁶ⓝ Mukama nʼamugamba nate nti, “Yingiza omukono gwo munda mu kyambalo kyo.” Nʼayingiza omukono gwe munda mu kyambalo kye: bwe yaguggyaayo, laba, nga gujjudde ebigenge nga gutukula ngʼomuzira.

⁷Ate nʼamugamba nti, “Zzaayo omukono gwo munda mu kyambalo kyo.” Musa nʼazzaayo omukono gwe mu kyambalo kye. Bwe yaguggyaayo, laba nga gufuuse mulamu ngʼomubiri gwe ogwa bulijjo.

⁸Katonda nʼagamba Musa nti, “Bwe batalikukkiririza ku kabonero akasoose, balikukkiririza ku kabonero akookubiri.

⁹Bwe bagaananga okukukkiriza nga bamaze okulaba obubonero obwo bwombi, osenanga amazzi mu mugga nʼogayiwa ku lukalu; amazzi ago gʼolisena mu mugga, galifuuka omusaayi ngʼogayiye ku lukalu.”

¹⁰Awo Musa nʼagamba Mukama nti, “Ayi Mukama wange, siri mwogezi mulungi okuva edda nʼedda, wadde ne mu kiseera kino ggwe kaayogerera nange, omuddu wo; njogera nnembeggerera ate nga bwe nnaanaagira.”

¹¹Mukama nʼamuddamu nti, “Ani yakola akamwa kʼomuntu? Ani yatonda bakasiru, ne bakiggala, nʼabatunula, ne bamuzibe? Si nze, Mukama?”

¹²“Kaakano, genda! Nnaakuyambanga ngʼoyogera, era nnaakuyigirizanga byʼonooyogeranga.”

¹³Naye Musa nʼagamba nti, “Mukama wange, nkwegayiridde tuma omuntu omulala.”

¹⁴Mukama nʼasunguwalira nnyo Musa, nʼamugamba nti, “Muganda wo Alooni Omuleevi, taliiwo? Mmanyi nga mwogezi mulungi; era, laba, ajja gyʼoli, era bwʼanaakulabako ajja kusanyuka mu mutima gwe.

¹⁵Ggwe ojja kwogeranga naye, nze nnaakutegeezanga kyʼonoomugambanga, nange nʼabayambanga mwembi, ne mbayigiriza ekyʼokukola.

¹⁶Yʼanaakwogereranga eri abantu, ngʼabategeeza bye wandiyogedde; ggwe nʼoba nga Katonda gyʼali, ngʼomutegeezanga byʼanaayogeranga.

¹⁷Era oligenda nʼomuggo guno, ngʼogukutte mu mukono gwo; gwʼonookozesanga ebyamagero.”

¹⁸Awo Musa nʼaddayo eri Yesero, kitaawe wa mukazi we nʼamugamba nti, “Nkusaba onzikirize ŋŋende ndabe obanga baganda bange e Misiri bakyali balamu.” Yesero nʼaddamu Musa nti, “Genda mirembe.”

¹⁹Awo Mukama nʼayogera ne Musa e Midiyaani nti, “Genda, oddeyo e Misiri kubanga abantu bonna abaali baagala okukutta, baafa.”

²⁰Musa nʼaddira mukyala we nʼabaana be, nʼabassa ku ndogoyi, nʼasitula okuddayo mu nsi yʼe Misiri, ngʼakutte omuggo gwa Katonda mu ngalo ze.

²¹Mukama nʼagamba Musa nti, “Bwʼoddangayo e Misiri, okoleranga ebyamagero ebyo byonna bye nkulaze, awali Falaawo. Nze ndikakanyaza omutima gwe, abantu bange aleme okubakkiriza okugenda.

²²Falaawo omugambanga bwʼoti nti, Mukama agambye nti, ‘Isirayiri mutabani wange, ye mwana wange omubereberye;

²³ⓞ Era nkulagira oleke omwana wange agende ampeereze; naye singa ogaana okumuleka okugenda, laba, nditta mutabani wo omubereberye.’”

²⁴Awo bwe baali bagenda nga batuuse ku nnyumba yʼabagenyi, Mukama nʼamulabikira, nʼayagala okumutta.

²⁵Naye Zipola nʼaddira ejjinja eryogi, nʼakomola omwana we, ekikuta nʼakisuula ku bigere bya Musa, nʼamugamba nti, “Oli baze wa musaayi!”

²⁶Awo Katonda nʼamuleka. Mu kaseera ako Zipola we yayogerera ku kukomola nti, “Baze wange ngʼosaabye omusaayi!”

²⁷Awo Mukama nʼagamba Alooni nti, “Genda mu ddungu, osisinkane Musa. Nʼagenda, nʼamusanga ku lusozi lwa Katonda, ne bagwaŋŋana mu bifuba.”

²⁸Musa nʼabuulira Alooni ebigambo byonna Mukama bye yali amutumye okwogera, nʼobubonero bwonna obwʼebyamagero bwe yamulagira okukola.

²⁹Musa ne Alooni ne bagenda, ne bakuŋŋaanya abakulu abakulembeze bʼabaana ba Isirayiri;

³⁰Alooni nʼabategeeza byonna Mukama bye yagamba Musa; era nʼabakolera nʼobubonero,

³¹ne bakkiriza. Era bwe baawulira nga Katonda yakyalira abaana ba Isirayiri, nʼalaba okubonaabona kwabwe, ne bakoteka emitwe gyabwe ne basinza.