Okuva 40:1-38 LGCB2014 - Bible AI

¹Awo Mukama nʼagamba Musa nti,

²“Ku lunaku olwʼolubereberye olwʼomwezi ogwʼolubereberye kwʼolisimbira Eweema ya Mukama, eweema eyʼOkusisinkanirangamu.

³Essanduuko eyʼEndagaano oligiyingiza mu Weema; Essanduuko nʼolyoka ogisiikiriza nʼeggigi.

⁴Oliyingiza emmeeza, nʼotegeka bulungi byonna ebigikolerwako. Oliyingiza ekikondo kyʼettaala era nʼotegekako ettaala zaakwo nʼozikoleeza.

⁵Era oliteeka ekyoto ekya zaabu ekyʼokwoterezangako obubaane mu maaso gʼEssanduuko eyʼEndagaano, nʼossaawo olutimbe mu mulyango gwʼEweema ya Mukama.

⁶“Ekyoto ekyʼekiweebwayo ekyokebwa olikissa mu maaso gʼomulyango ogwa Weema ya Mukama, weema eyʼOkusisinkanirangamu,

⁷olyoke oteeke ebbensani wakati wa Weema ya Mukama eyʼOkusisinkanirangamu nʼekyoto, mu bbensani oteekemu amazzi.

⁸Olikola oluggya okwebungulula Weema ya Mukama, nʼossaawo olutimbe mu mulyango oguyingira mu luggya.

⁹“Oliddira amafuta agʼokwawula nʼogamansa ku Weema ya Mukama ne byonna ebigirimu, olyoke oyawule Eweema ya Mukama nʼebigirimu byonna, ebeere ntukuvu.

¹⁰Olimansira amafuta ku kyoto ekyʼebiweebwayo ebyokebwa nʼebikozesebwako byonna, nʼoyawula ekyoto, bwe kityo ekyoto kiribeera kitukuvu nnyo.

¹¹Era nʼebbensani oligimansirako amafuta, ne kwʼetuula, nʼogyawula, nʼogitukuza.

¹²“Olireeta Alooni ne batabani be ku mulyango gwʼEweema ya Mukama eyʼOkukuŋŋaanirangamu, nʼobanaaza nʼamazzi,

¹³nʼoyambaza Alooni ebyambalo ebitukuvu nʼomusiigako amafuta nʼomwawula, alyoke ampeereze nga kabona.

¹⁴Olireeta ne batabani be nʼobambaza ekkanzu eyʼobwakabona,

¹⁵nʼobasiigako amafuta, nga bwe wasiize ku kitaabwe, balyoke bampeereze nga bakabona: era okusiigibwako amafuta okwo kulibafuula bakabona ebbanga lyonna mu mirembe gyabwe.”

¹⁶Musa bwʼatyo nʼakola ebyo byonna nga Mukama bwe yamulagira.

¹⁷Awo ku lunaku olusooka mu mwezi ogwʼolubereberye, mu mwaka ogwokubiri, Eweema ya Mukama nʼesimbibwa.

¹⁸Musa nʼasimba Eweema ya Mukama; nʼateekateeka ebya wansi mwʼetuula, nʼategeka olukangaga lwayo, nʼasimba empagi zaayo;

¹⁹nʼassaako ekibikka ku Weema ya Mukama, nga Mukama bwe yamulagira.

²⁰Nʼaddira Endagaano, eyʼebipande ebyʼamayinja okwasalibwa Amateeka Ekkumi, nʼagiteeka munda mu Ssanduuko eyʼEndagaano, nʼassa emisituliro ku Ssanduuko eyʼEndagaano, nʼassaako kungulu ekisaanikira, ye ntebe eyʼokusaasira;

²¹nʼayingiza Essanduuko eyʼEndagaano munda mu Weema ya Mukama, nʼatimbawo eggigi, nʼasiikiriza Essanduuko eyʼEndagaano, nga Mukama bwe yalagira Musa.

²²Nʼayingiza emmeeza mu Weema ya Mukama eyʼOkusisinkanirangamu, nʼagiteeka ku ludda olwʼObukiikakkono olwa Weema ya Mukama, wabweru wʼeggigi,

²³nʼassaako emigaati ngʼagitegese bulungi awali Mukama, nga Mukama bwe yalagira Musa.

²⁴Nʼassa ekikondo kyʼettaala mu Weema ya Mukama eyʼOkusisinkanirangamu ku ludda olwʼObukiikaddyo obwʼEweema ya Mukama, okwolekera emmeeza,

²⁵nʼategeka ettaala awali Mukama, nga Mukama bwe yalagira Musa.

²⁶Nʼayingiza ekyoto ekya zaabu mu Weema ya Mukama eyʼOkusisinkanirangamu mu maaso gʼeggigi,

²⁷nʼayokerako obubaane obwa kawoowo, nga Mukama bwe yalagira Musa.

²⁸Nʼateeka olutimbe olwʼomu mulyango gwʼEweema ya Mukama mu kifo kyalwo.

²⁹Nʼateeka ekyoto ekyʼebiweebwayo ebyokebwa ku mulyango gwʼEweema ya Mukama, weema eyʼOkusisinkanirangamu, nʼaweerayo okwo ekiweebwayo ekyokebwa ekyʼobuwunga, nga Mukama bwe yalagira Musa.

³⁰Nʼatereeza ebbensani wakati wa Weema ya Mukama eyʼOkusisinkanirangamu nʼekyoto, nʼassaamu amazzi agʼokunaaba;

³¹Musa ne Alooni ne batabani ba Alooni mwe baanaabiranga engalo zaabwe nʼebigere byabwe.

³²Buli lwe baayingiranga mu Weema ya Mukama eyʼOkusisinkanirangamu, ne buli lwe baasembereranga ekyoto nga banaaba, nga Mukama bwe yalagira Musa.

³³Nʼakola oluggya okwebungulula Weema ya Mukama nʼekyoto, nʼassaawo olutimbe mu mulyango oguyingira mu luggya. Bwʼatyo Musa omulimu nʼagumaliriza.

³⁴ⓥ Awo ekire ne kibuutikira Eweema ya Mukama eyʼOkukuŋŋaanirangamu, yonna nʼejjula ekitiibwa kya Mukama.

³⁵Musa nʼatasobola kuyingira mu Weema ya Mukama Omukuŋŋaanirwa, kubanga ekire kyagibuutikira, nʼekitiibwa kya Mukama ne kijijjula.

³⁶Mu lugendo lwabwe lwonna, ekire bwe kyaggyibwanga ku Weema ya Mukama, olwo abaana ba Isirayiri nga basitula nga batambula;

³⁷naye ekire bwe kitaggyibwangako ku Weema ya Mukama, olwo nga tebasitula kutambula okutuusa ku lunaku lwe kyaggyibwangako.

³⁸Ekire kya Mukama kyabeeranga ku Weema ya Mukama emisana, ate ekiro nga mu kire ekyo mubaamu muliro, ngʼabaana ba Isirayiri bonna ebyo babiraba mu lugendo lwabwe lwonna.