Okuva 5:1-23 LGCB2014 - Bible AI

¹Oluvannyuma lwʼebyo, Musa ne Alooni ne bajja eri Falaawo, ne bamugamba nti, “Tutumiddwa Mukama Katonda wa Isirayiri ngʼakugamba nti, ‘Leka abantu bange bagende, bankolere embaga mu ddungu.’”

²Naye Falaawo nʼabaddamu nti, “Mukama ye ani, mmugondere, nzikirize Abayisirayiri, sijja kubakkiriza kugenda.”

³Ne bamugamba nti, “Katonda wʼAbaebbulaniya yatulabikira. Tukusaba otuleke tugende olugendo lwa nnaku ssatu mu ddungu, tuweeyo ssaddaaka eri Mukama Katonda waffe;[6] aleme kututta ne kawumpuli, oba nʼekitala.”

⁴Naye kabaka wʼe Misiri nʼabagamba nti, “Mmwe Musa ne Alooni, lwaki mwagala okuggya abantu ku mirimu gyabwe? Muddeeyo mangu ku mirimu gyammwe.”

⁵Falaawo nʼayongera nʼagamba nti, “Kale, mulabe abantu nga bwe beeyongedde obungi mu ggwanga ate mmwe mubaziyiza kukola.”

⁶Ku lunaku olwo lwennyini Falaawo nʼalagira abagabi bʼemirimu ne bannampala bʼabantu[7] nti,

⁷“Mulekeraawo okuwanga abantu essubi eryʼokukozesa mu kubumba amatoffaali; mubaleke bagende beenoonyezenga essubi lyabwe.[8]

⁸Naye mubalagire babumbenga obungi bwʼamatoffaali bwe bumu nga ge babadde babumba; temukendeezanga ku muwendo ogwabasalirwa. Bagayaavu; era kyebava bankaabirira nti, ‘Tuleke tugende tuweeyo ssaddaaka eri Katonda waffe.’

⁹Abasajja mubongereko ku mirimu gye mubasalira, bakole nnyo, balyoke baleme na kufa ku ebyo bye babalimbalimba.”

¹⁰Awo abakozesa ne bannampala ne bagenda ne bategeeza abantu nti, “Falaawo agambye bwʼati nti, ‘Sijja kwongera kubawanga ssubi.

¹¹Mugende mwenoonyeze essubi yonna gye musobola okuliraba; kyokka emirimu gyammwe tegijja kukendeezebwako nʼakatono.’ ”

¹²Bwe batyo abantu ne basaasaanira Misiri yonna okukuŋŋaanya obukonge bwʼessubi lyʼeŋŋaano bakozese obwo mu kifo kyʼessubi.

¹³Abakozesa ne babakuluusanyanga nga babalagira nti, “Emirimu gyammwe egibasalirwa buli lunaku, mugituukirize nga bwe mwakolanga ngʼessubi likyabaweebwa.”

¹⁴Bannampala Abayisirayiri, abaalondebwa abakozesa ba Falaawo, ne bakubibwanga nga bwe babuuzibwa nti, “Lwaki omuwendo gwʼamatoffaali ogwa jjo nʼogwa leero ogwabasalirwa temugutuukirizza nga bwe mwakolanga edda?”

¹⁵Awo bannampala Abayisirayiri ne bajja ne bajulira ewa Falaawo, ne bamugamba nti, “Ffe abaddu bo, lwaki otuyisizza bwʼoti?

¹⁶Abaddu bo tetuweebwa ssubi, kyokka tulagirwa nti, ‘Mubumbe amatoffaali!’ Abaddu bo tukubibwa, so ngʼomusango guli mu bantu bo.”

¹⁷Falaawo nʼabaddamu nti, “Muli bagayaavu bugayaavu kyokka. Kyemuva mundeeberera nti, ‘Tuleke tugende tuweeyo ssaddaaka eri Mukama.’

¹⁸Kale, mugende mukole! Temujja kuweebwa ssubi, naye muteekwa okubumba omuwendo gwʼamatoffaali omujjuvu nga bwe gwabasalirwa.”

¹⁹Bannampala Abayisirayiri ne bategeera ngʼakacwano kabatuukiridde, bwe baagambibwa nti, “Omuwendo gwʼamatoffaali ogwabasalirwa okubumbanga buli lunaku tegujja kukendeezebwako.”

²⁰Bwe baava ewa Falaawo, baasanga Musa ne Alooni nga babalindiridde.

²¹Bannampala ne babagamba nti, “Mukama abatunuulire era asalewo; kubanga mutufudde ekyenyinyalwa ewa Falaawo nʼabaweereza be, era mubakwasizza ekitala okututta.”

²²Awo Musa nʼakomawo awali Mukama, nʼayogera nti, “Ayi Mukama, abantu bano lwaki obaleetedde emitawaana? Eyo yʼensonga kyewava ontuma?

²³Kubanga kasookedde ŋŋenda ne njogera ne Falaawo mu linnya lyo, abantu bo abataddeko ebizibu bingi; era abantu bo tobawonyezza nʼakatono.”