Okuva 6:1-30 LGCB2014 - Bible AI

¹Awo Mukama nʼaddamu Musa nti, “Kaakano ojja kulaba kye nnaakola Falaawo. Kubanga alibaleka ne bagenda olwʼamaanyi, era olwʼamaanyi alibagoba mu nsi ye.”

²ⓟ Katonda nʼagamba Musa nti, “NZE MUKAMA.

³ⓠ Nalabikira Ibulayimu, ne Isaaka ne Yakobo nga Katonda Ayinzabyonna; kyokka saabategeeza linnya lyange nti NZE MUKAMA.

⁴Era nabasuubiza mu ndagaano yange okubawa ensi ya Kanani, gye baabeerangamu ngʼabagwira abatambuze.

⁵Kaakano mpulidde okusinda kwʼabaana ba Isirayiri abatuntuzibwa Abamisiri mu buddu, ne nzijukira endagaano yange.

⁶“Noolwekyo tegeeza abaana ba Isirayiri nti ‘Nze Mukama. Ndibatikkulako emigugu gyʼAbamisiri, era ndibawonya obuddu, ne mbanunula nʼomukono gwange ogwʼamaanyi nga nsalira Abamisiri omusango.

⁷Ndibafuula abantu bange, era nnaabeeranga Katonda wammwe, era mulitegeera nga nze Mukama Katonda wammwe abawonyezza ebizibu byʼAbamisiri.

⁸Ndibaleeta mu nsi gye nalayira okuwa Ibulayimu ne Isaaka ne Yakobo; ndigibawa nʼefuuka yammwe. Nze Mukama.’ ”

⁹Musa nʼategeeza abaana ba Isirayiri ebigambo ebyo. Naye tebaamuwuliriza, kubanga emitima gyali gibennyise, nga nʼokutuntuzibwa kubayitiridde.

¹⁰Awo Mukama nʼagamba Musa nti,

¹¹“Genda otegeeze Falaawo kabaka wʼe Misiri aleke abaana ba Isirayiri bave mu nsi ye.”

¹²Naye Musa nʼaddamu Mukama nti, “Laba, abaana ba Isirayiri bagaanyi okumpuliriza, kale Falaawo anampuliriza atya nze atayogera bulungi?”

¹³Naye Mukama nʼayogera ne Musa ne Alooni, nʼabalagira bategeeze abaana ba Isirayiri ne Falaawo nti, Mukama abalagidde okuggya abaana ba Isirayiri mu nsi yʼe Misiri.

¹⁴Gano ge mannya aga bajjajjaabwe abʼomu bika byabwe: Batabani ba Lewubeeni, mutabani wa Isirayiri omubereberye, be bano: Kanoki ne Palu, Kezulooni ne Kalumi,

¹⁵Batabani ba Simyoni: Yamweri ne Yamini, ne Okadi, Yakini ne Zokali, Sawuli (omwana wʼomukyala Omukanani).

¹⁶Gano ge mannya ga batabani ba Leevi ngʼemirembe bwe giri: Gerusoni ne Kokasi ne Merali. Leevi yawangaala emyaka kikumi mu asatu mu musanvu.

¹⁷Batabani ba Gerusoni be bano mu bika byabwe: Libuni ne Simeeyi.

¹⁸Bano be batabani ba Kokasi: Amulaani ne Izukali, Kebbulooni ne Wuziyeeri. Kokasi yawangaala emyaka kikumi mu asatu mu esatu.

¹⁹Bano be batabani ba Merali: Makuli ne Musi. Abo be bʼomu bika bya Leevi ngʼemirembe gyabwe bwe gyali.

²⁰Amulaamu nʼawasa senga we Yokebedi; nʼamuzaalira: Alooni ne Musa. Amulaamu nʼawangaala emyaka kikumi mu asatu mu musanvu.

²¹Bano be baana ba Izukali: Koola ne Nefega ne Zikiri.

²²Abaana ba Wuziyeeri be bano: Misayeri ne Erizafani ne Sisiri.

²³Alooni nʼawasa Eriseba, muwala wa Aminadaabu era nga ye mwannyina wa Nakayisoni. Yamuzaalira abaana bano: Nadabu ne Abiku, Eriyazaali ne Isamaali.

²⁴Bano be baana ba Koola: Asira ne Erukaana, ne Abiyasaafu. Abo be bʼomu kika kya Abakoola.

²⁵Eriyazaali, mutabani wa Alooni, yawasa omu ku bawala ba Putiyeeri, nʼamuzaalira Finekaasi. Ago ge mannya gʼabakulu bʼebika byʼAbaleevi, nʼennyumba zaabwe mu bika ebyo.

²⁶Abo ye Alooni ne Musa Mukama be yalagira nti, “Muggyeeyo abaana ba Isirayiri bonna mu nsi yʼe Misiri.”

²⁷Be bo abaayogera ne Falaawo, kabaka wʼe Misiri, ku byʼokuggyayo abaana ba Isirayiri mu Misiri. Ye Musa oyo, ne Alooni oyo.

²⁸Ku lunaku olwo Mukama kwe yayogerera ne Musa mu nsi yʼe Misiri,

²⁹Mukama yagamba Musa nti, “Nze Mukama. Tegeeza Falaawo, kabaka wʼe Misiri, buli kimu kyonna kye nkugamba.”

³⁰Naye Musa nʼaddamu Mukama nti, “Nze atamanyi kwogera bulungi, Falaawo anampuliriza atya?”