Okuva 7:1-25 LGCB2014 - Bible AI

¹Awo Mukama nʼagamba Musa nti, “Laba, nkufudde nga Katonda awali Falaawo, ne muganda wo Alooni yʼajja okubeera nnabbi wo.

²Ojjanga kwogera bye nkulagira, ne muganda wo Alooni ayogere ne Falaawo asobole okuleka abaana ba Isirayiri bave mu nsi ye.

³ⓡ Naye ndikakanyaza omutima gwa Falaawo; ne bwe ndikolera ebyamagero ebingi ennyo mu nsi yʼe Misiri,

⁴tagenda kubawuliriza. Ndirumba Misiri nʼamaanyi, ne ngisalira omusango, ne ndyoka nzigyayo abantu bange Abayisirayiri bonna.

⁵Era Abamisiri balitegeera nti Nze Mukama, bwe ndirumba Misiri nʼamaanyi ne nzigyayo Abayisirayiri.”

⁶Awo Musa ne Alooni ne bakola nga Mukama bwe yabalagira.

⁷We baayogerera ne Falaawo, Musa yali aweza emyaka kinaana egyʼobukulu, ne Alooni ngʼaweza emyaka kinaana mu esatu.

⁸Mukama nʼagamba Musa ne Alooni nti,

⁹“Falaawo bwʼanaabagamba nti, ‘Mukoleeyo ekyamagero,’ nga ggwe ogamba Alooni nti, ‘Ddira omuggo gwo ogusuule wansi awali Falaawo,’ era gunaafuuka omusota.”

¹⁰Awo Musa ne Alooni ne bagenda ewa Falaawo, ne bakola nga Mukama bwe yabalagira. Alooni nʼasuula omuggo gwe wansi awali Falaawo nʼabaweereza be, ne gufuuka omusota.

¹¹Falaawo naye nʼatumya basajja be abagezigezi, nʼabalogo; abakujjukujju abo Abamisiri ne bakola ekintu kye kimu mu magezi gaabwe agʼekyama.

¹²Kubanga nabo baasuula wansi emiggo gyabwe, ne gifuuka emisota; naye omuggo gwa Alooni ne gumira emiggo gyabwe.

¹³Naye era omutima gwa Falaawo ne gukakanyala, nga Mukama bwe yali agambye.

¹⁴Awo Mukama nʼagamba Musa nti, “Omutima gwa Falaawo gukakanyadde, era agaanye okuleka abantu okugenda.

¹⁵Mu makya genda eri Falaawo ngʼafuluma okulaga ku mazzi,[9] omulindirire ku lubalama lwʼomugga. Era twala nʼomuggo ogwafuuka omusota.

¹⁶Olyoke omugambe nti, ‘Mukama Katonda wa Abaebbulaniya yantuma gyʼoli ngʼagamba nti, Leka abantu bange bajje mu ddungu bansinze; naye, laba, nʼokutuusa leero okyagaanyi okuŋŋondera.’

¹⁷ⓢ Bwʼati bwʼayogera Mukama nti, ‘Ku kino kwʼolitegeerera nga nze Mukama: laba ndikuba ku mazzi agali mu mugga, nʼomuggo oguli mu mukono gwange, era galifuuka musaayi,

¹⁸nʼebyennyanja ebiri mu mugga birifa, nʼomugga guliwunya; era nʼAbamisiri nga tebakyayagala kunywa ku mazzi gaagwo.’ ”

¹⁹Mukama nʼagamba Musa nti, “Tegeeza Alooni nti, ‘Twala omuggo gwo ogwolekeze amazzi gonna mu Misiri: ku migga gyabwe, nʼemikutu gyabwe, nʼobuyanja bwabwe, nʼebidiba byabwe, byonna bifuuke musaayi. Era wagenda kubeerawo omusaayi mu nsi yonna eyʼe Misiri: mu ntiba ezʼemiti ne mu matogero agʼamayinja.’ ”

²⁰Awo Musa ne Alooni ne bakola nga Mukama bwe yabalagira. Alooni nʼaddira omuggo gwe nʼakuba ku mazzi agʼomu mugga, nga Falaawo nʼabaweereza be balaba; amazzi gonna agʼomu mugga ne gafuuka omusaayi.

²¹Era nʼebyennyanja byonna mu mugga Kiyira ne bifa. Omugga ne guwunya, Abamisiri nga tebakyasobola kunywa mazzi ga mu mugga Kiyira; omusaayi ne gubuna wonna mu nsi yʼe Misiri.

²²Abalogo abʼomu Misiri nabo ne bakola bwe batyo mu magezi gaabwe agʼekyama. Omutima gwa Falaawo ne gweyongera okukakanyala, ebya Musa ne Alooni nʼatabiwuliriza era nga Mukama bwe yali agambye;

²³nʼakyuka ne yeddirayo mu lubiri lwe, nga byonna ebibaddewo tabissizzaako mwoyo.

²⁴Abamisiri bonna ne basimaasima okumpi nʼomugga nga banoonya amazzi agʼokunywa, kubanga amazzi gʼomu mugga nga tegakyanyweka.

²⁵Awo ne wayitawo ennaku musanvu okuva ku lunaku Mukama lwe yakubirako omugga.