Okuva 8:1-32 LGCB2014 - Bible AI

¹Awo Mukama nʼagamba Musa nti, “Ggenda ewa Falaawo omugambe nti, ‘Mukama agambye bwʼati nti, “Leka abantu bange bagende, balyoke bansinze.

²Naye bwʼonoogaana nʼotabakkiriza kugenda, laba, nnaasindika ebikere ne bijjula ensi yo yonna.

³Omugga gulivaamu ebikere enkumu ennyo ebirituuka ne mu lubiri lwo. Biriyingira mu kisenge kyo mwʼosula, ne ku kitanda kyo. Biriyingira mu nnyumba zʼabaweereza bo ne mu zʼabantu bo. Biriyingira ne mu byoto omufumbirwa.

⁴Ebikere birikuwalampa ne bikutambulirako ne ku bakungu bo bonna ne ku bantu bo.” ’ ”

⁵Mukama nʼagamba Musa nti, “Tegeeza Alooni nti, ‘Golola omukono gwo oyolekeze omuggo gwo eri emigga, nʼeri emikutu gyʼamazzi, nʼeri ebidiba, osobozese ebikere okubuna ensi yonna eyʼe Misiri.’ ”

⁶Bwʼatyo Alooni nʼagolola omukono gwe ku mazzi gonna agʼomu Misiri; ebikere ne bivaayo ne bijjula ensi yonna eyʼe Misiri.

⁷Abalogo nabo ne bakola bwe batyo mu magezi gaabwe agʼekyama, nabo ne baleeta ebikere mu nsi eyʼe Misiri.

⁸Awo Falaawo nʼatumya Musa ne Alooni nʼabagamba nti, “Mwegayirire Mukama anziggyeeko ebikere bino era ne ku bantu bange, ndyoke nange ndeke abantu bammwe bagende baweeyo ssaddaaka eri Mukama.”

⁹Musa nʼaddamu Falaawo nti, “Weerondere ekiseera nga bwʼosiima, wʼoyagalira neegayirire Mukama ku lulwo ne ku lwʼabaweereza bo, ne ku lwʼabantu bo, ebikere ebikuliko nʼebiri mu nnyumba zo bizikirizibwe, bisigale mu mugga Kiyira mwokka.”

¹⁰Falaawo nʼagamba nti, “Enkya.” Musa nʼagamba nti, “Kijja kubeera nga bwʼogambye, olyoke otegeere nga bwe watali nʼomu afaanana nga Mukama Katonda waffe.

¹¹Ebikere bijja kukuviira, bive ne mu mayumba go, biviire nʼabaweereza bo nʼabantu bo; bijja kusigala mu mugga mwokka.”

¹²Awo Musa ne Alooni ne bava ewa Falaawo. Musa ne yeegayirira Mukama olwʼebikere Mukama bye yali aleetedde Falaawo.

¹³Mukama nʼakolera Musa kye yamusaba. Ebikere ne bifiira mu mayumba, ne mu mpya mu byalo, ne mu nnimiro.

¹⁴Ne bikuŋŋaanyizibwa entuumo nʼentuumo; ensi nʼejjula ekivundu.

¹⁵Naye Falaawo bwe yalaba nga waliwo wassiza ku mukka, nʼakakanyaza omutima gwe, ebya Musa ne Alooni nʼalekera awo okubiwuliriza, era nga Mukama bwe yali agambye.

¹⁶Awo Mukama nʼayogera ne Musa nti, “Gamba Alooni bwʼoti nti, ‘Golola omuggo gwo, okube ku nfuufu eri ku ttaka, eryoke efuuke ensekere mu nsi yonna eyʼe Misiri.’”

¹⁷Ne bakola nga Mukama bwʼabagambye; Alooni nʼagolola omukono gwe ogwali gukute omuggo, nʼakuba ku nfuufu ku ttaka, ne muvaamu ensekere ne zitambulira ku bantu ne ku nsolo; enfuufu yonna mu nsi yʼe Misiri nʼefuuka nsekere.

¹⁸Abalogo nabo ne bagezaako mu magezi gaabwe agʼekyama okufuusa ensekere, naye ne balemwa. Ensekere ne ziteevuunya ku bantu ne ku nsolo.

¹⁹ⓣ Abalogo ne bagamba Falaawo nti, “Engalo ya Katonda bino yʼebikoze.” Naye omutima gwa Falaawo ne gukakanyala, nʼatabawuliriza, nga Mukama bwe yali agambye.

²⁰Awo Mukama nʼagamba Musa nti, “Keera mu makya nnyo, ogende osisinkane Falaawo ngʼaserengeta ku mazzi omugambe nti, ‘Mukama agambye bwʼati nti, Leka abantu bange bagende, bansinze.

²¹Naye abantu bange bwʼotoobakkirize kugenda, laba, ndireeta ebikuukuulu byʼensowera, ku ggwe ne ku baweereza bo, ne ku bantu bo, ne mu nnyumba zammwe. Ensowera zirijjula mu mayumba ga Bamisiri ne ku ttaka kwe gaazimbibwa.

²²“ ‘Naye ku lunaku olwo, ekitundu Goseni abantu bange gye babeera ndikiyisa mu ngeri ya njawulo; kubanga yo teribaayo bikuukuulu bya nsowera nʼakatono, olyoke otegeere nga nze, Mukama, ndi wano wakati mu nsi.

²³Nzija kussaawo enjawulo wakati wʼabantu bange nʼabantu bo. Ekyamagero kino kijja kubaawo enkeera.’ ”

²⁴Mukama nʼakola bwʼatyo. Ebikuukuulu byʼensowera ne byeyiwa mu lubiri lwa Falaawo, mu nnyumba ye, ne mu mayumba gʼabaweereza be, ne mu nsi yonna eyʼe Misiri: ensi nʼeyonooneka olwʼebikuukuulu byʼensowera.

²⁵Awo Falaawo nʼatumira Musa ne Alooni, nʼabagamba nti, “Kale, muweereeyo wano mu nsi eno ssaddaaka eri Katonda wammwe.”

²⁶Naye Musa nʼaddamu nti, “Ekyo bwe tukikola, tekijja kuba kituufu. Kubanga ssaddaaka ze tuwaayo eri Mukama Katonda waffe, Abamisiri tebajja kuzaagala. Kale singa tuddira ssaddaaka Abamisiri ze bakyawa ennyo bwe batyo, ne tuziwaayo nga balaba, tebajja kutukuba amayinja?

²⁷Kitugwanira tutambule olugendo lwa nnaku ssatu mu ddungu, tuweeyo ssaddaaka eri Mukama Katonda waffe nga bwʼanaatulagira.”

²⁸Falaawo nʼagamba nti, “Nzija kubaleka mugende muweeyo ssaddaaka eri Mukama Katonda wammwe mu ddungu, kyokka temugenda ewala ennyo. Kale munsabire.”

²⁹Musa nʼaddamu nti, “Bwe nnaaba nakava wano wʼoli nzija kusaba Mukama, enkya ensowera ziviire Falaawo nʼabakungu be awamu nʼabantu be. Naye kirungi Falaawo aleme nate kulimbalimba, nʼatakkiriza bantu kugenda kuwaayo ssaddaaka eri Mukama.”

³⁰Musa nʼavaayo ewa Falaawo, nʼasaba Mukama.

³¹Mukama nʼakola nga Musa bwe yamusaba, nʼaggyawo ebikuukuulu byʼensowera ewa Falaawo ne mu baweereza be, ne mu bantu be; ne watasigala nsowera nʼemu.

³²Kyokka ne ku mulundi guno, Falaawo yakakanyaza omutima gwe, abantu nʼatabakkiriza kugenda.