Okuva 9:1-35 LGCB2014 - Bible AI

¹Awo Mukama nʼagamba Musa nti, “Genda ewa Falaawo omugambe nti, Mukama Katonda wa Abaebbulaniya agambye nti, ‘Leka abantu bange bagende, bansinze.

²Singa ogaana okubakkiriza okugenda, nʼoyongera okubakuumira wano,

³Mukama ajja kusindika nsotoka omukambwe ennyo mu magana go agali mu malundiro, ne mu mbalaasi ne mu ndogoyi, ne mu ŋŋamira, ne mu zisseddume zʼente ne mu ndiga.

⁴Naye Mukama ajja kwawulamu amagana aga Isirayiri nʼaga Misiri, waleme kubaawo nsolo nʼemu efa mu magana agʼabaana ba Isirayiri.’ ”

⁵Mukama nʼalonda ekiseera, nʼagamba nti, “Enkya Mukama wʼanaakolera ekintu kino mu nsi eno.”

⁶Era enkeera Mukama nʼakola ekikolwa ekyo: amagana aga Misiri gonna ne gafa, naye ne wataba nsolo nʼemu ku magana agʼabaana ba Isirayiri eyafa.

⁷Falaawo nʼatuma abantu okwetegereza, ne basanga nga tewali wadde ensolo nʼemu eyʼabaana ba Isirayiri eyali efudde. Naye era omutima gwa Falaawo ne gusigala nga gukyakakanyadde, Abayisirayiri nʼatabakkiriza kugenda.

⁸Awo Mukama nʼagamba Musa ne Alooni nti, “Muyoole mu kyokero embatu zʼomunyale, Musa agumanse waggulu mu bbanga nga ne Falaawo alaba.

⁹Gujja kufuuka nfuufu mu nsi yonna eyʼe Misiri, guleete amayute ku bantu ne ku nsolo aganaatulikamu amabwa mu nsi yonna eyʼe Misiri.”

¹⁰ⓤ Bwe batyo ne bayoola omunyale mu kyokero, ne bagenda bayimirira mu maaso ga Falaawo. Musa nʼamansa evvu waggulu mu bbanga, ne lifuuka amayute, ne gatulikamu amabwa ku bantu ne ku nsolo.

¹¹Abalogo ne batasobola kuyimirira mu maaso ga Musa olwʼamayute;[10] kubanga amayute gaakwata abalogo nʼAbamisiri bonna.

¹²Naye Mukama nʼakakanyaza omutima gwa Falaawo, nʼatawuliriza Musa ne Alooni, era nga Mukama bwe yagamba Musa.

¹³Awo Mukama nʼagamba Musa nti, “Ozuukuka mu makya nnyo, nʼogenda oyolekera Falaawo, nʼomugamba nti, Mukama Katonda wa Abaebbulaniya agamba bwʼati nti, ‘Leka abantu bange bagende, bampeereze.

¹⁴Kubanga ku mulundi guno nzija kukusindikira kawumpuli ku ggwe kennyini, ne ku baweereza bo, ne ku bakungu bo, olyoke otegeere nga tewali ali nga nze mu nsi yonna.

¹⁵Kubanga nandiyinzizza okugolola omukono gwange ne nkusindikira olumbe, ggwe nʼabantu bo, ne lubamalawo ku nsi.

¹⁶ⓥ Naye olwʼensonga eno kyennava nkuleka nʼobeera mulamu, ndyoke njolese amaanyi gange, era nʼerinnya lyange liryoke litegeezebwe mu nsi yonna.

¹⁷Kyokka okyekulumbaliza ku bantu bange nʼotobakkiriza kugenda,

¹⁸noolwekyo, enkya obudde nga bwe buti, nzija kusindika kibuyaga owʼomuzira ogwʼamayinja ogutagwangako mu Misiri kasookedde ensi eyo ebaawo.

¹⁹Kale, lagira bayingize amagana go agʼente, nʼebisolo byonna ebiri mu ddundiro, kubanga omuzira gujja kukuba buli muntu ali ebweru era ajja kufa; ne buli nsolo yonna eneebeera ebweru mu ddundiro gujja kugikuba efe.’ ”

²⁰Abakungu ba Falaawo abaali batya ekigambo kya Mukama, ne banguwa ne bayingiza abaddu baabwe nʼamagana gaabwe.

²¹Naye abo abatassaayo mwoyo ku kigambo kya Mukama ne baleka abaddu baabwe nʼamagana gaabwe ebweru.

²²Awo Mukama nʼagamba Musa nti, “Golola omukono gwo eri eggulu, omuzira gugwe ku nsi yonna eyʼe Misiri: gukube abantu, nʼensolo, ne buli kimera kyonna ekiri mu nnimiro mu Misiri.”

²³Musa nʼayolekeza omuggo gwe eri eggulu; Mukama nʼasindika okubwatuka nʼomuzira; laddu ne yakira ku ttaka. Bwʼatyo Mukama nʼatonnyesa omuzira ku nsi yʼe Misiri.

²⁴Omuzira ne gugwa, nʼokumyansa ne kwetabika nʼomuzira awatali kusalako, ne guba mungi nnyo, nga tegugwangako bwe gutyo kasookedde ensi ya Misiri efuuka ggwanga.

²⁵Omuzira gwakuba buli kintu kyonna ekyali ebweru mu nnimiro mu nsi yonna eyʼe Misiri: abantu nʼensolo; era omuzira ne gukuba buli kimera kyonna mu nnimiro, ne gusensebula emiti gyonna ku ttale.

²⁶Ekitundu kyokka ekitaatuukwamu muzira, kye kya Goseni, abaana ba Isirayiri gye baabeeranga.

²⁷Awo Falaawo nʼatumya Musa ne Alooni, nʼabagamba nti, “Leero luno nnyonoonye; Mukama ye mutuufu, naye nze nʼabantu bange ffe bakyamu.

²⁸Weegayirire Mukama; kubanga omuzira nʼokubwatuka bitwetamizza. Nzija kubaleka mugende; siraba kyemuva mweyongera kubeera wano.”

²⁹Musa nʼaddamu nti, “Olunaafuluma mu kibuga, nnaagolola emikono gyange waggulu eri Mukama ne mmusaba. Okubwatuka kunaasirika, nʼomuzira gunaalekera awo okugwa; olyoke otegeere ngʼensi eno Mukama ye nannyini yo.

³⁰Kyokka mmanyi nga ggwe nʼabakungu bo temunnatya Mukama Katonda.”

³¹(Obugoogwa ne sayiri byakubwa ne bizikirizibwa, kubanga sayiri yali ayengera nga nʼobugoogwa bumulisizza.

³²Naye eŋŋaano, yo teyayonoonebwa kubanga yali tennamera.)

³³Musa nʼava mu kibuga ewa Falaawo, nʼawanika emikono gye eri Mukama ngʼamusaba; okubwatuka nʼomuzira ne bisirika, era nʼenkuba nʼekya.

³⁴Naye Falaawo bwe yalaba enkuba, nʼomuzira, nʼokubwatuka nga birekeddaawo, ate ne yeeyongera okusobya; ye nʼabakungu be ne bakakanyaza emitima gyabwe.

³⁵Omutima gwa Falaawo bwe gutyo ne gukakanyala; nʼataleka baana ba Isirayiri kugenda, era nga Mukama bwe yayogerera mu Musa.