Olubereberye 12:1-20 LGCB2014 - Bible AI

¹ⓑ Awo Mukama nʼagamba Ibulaamu nti, “Vva mu nsi yannyo ne mu bantu bo ne mu nnyumba ya kitaawo ogende mu nsi gye ndikulaga.

²Nange ndikufuula eggwanga eddene, era ndikuwa omukisa, nʼerinnya lyo ne ndifuula kkulu, olyoke obeere mukisa.

³ⓒ Ndiwa omukisa abo abakusabira omukisa, era buli alikukolimira nange namukolimiranga; era mu ggwe amawanga gonna agʼomu nsi mwe galiweerwa omukisa.”

⁴Bwʼatyo Ibulaamu nʼagenda nga Mukama bwe yamugamba, ne Lutti nʼagenda wamu naye. Ibulaamu we yaviira mu Kalani yali aweza emyaka nsanvu mu etaano.

⁵Ibulaamu nʼatwala Salaayi mukazi we, ne Lutti mutabani wa muganda we ne byonna bye baalina bye baali bafunye, nʼabantu baabwe be baafunira mu Kalani, ne basitula okugenda mu Kanani, bwe batuuka mu nsi ya Kanani,

⁶Ibulaamu nʼayita mu nsi nʼatuuka mu kifo ekiyitibwa Sekemu awali emivule gya Mole. Mu biro ebyo Abakanani be baali mu nsi omwo.

⁷ⓓ Awo Mukama nʼalabikira Ibulaamu nʼagamba nti, “Ensi eno ndigiwa abo abaliva mu ggwe.” Awo Ibulaamu nʼazimbira eyo Mukama ekyoto eyamulabikira.

⁸Bwʼatyo nʼalaga ku lusozi ku luuyi olwʼebuvanjuba obwa Beseri, nʼasimba eweema ye nga Beseri ali ku luuyi olwʼebugwanjuba, ne Ayi ngali ku luuyi olwʼebuvanjuba, nʼazimbira eyo Mukama ekyoto, nʼakoowoola erinnya lya Mukama.

⁹Ibulaamu ne yeeyongera okutambula ngʼayolekera Negevu[8].

¹⁰Ne wagwa enjala mu nsi. Bwʼatyo Ibulaamu nʼaserengeta e Misiri[9] asengukireko eyo, kubanga enjala nnyingi eyali mu nsi.

¹¹Bwe yali anaatera okuyingira mu Misiri, nʼagamba Salaayi mukazi we nti, “Mmanyi ngʼoli mukazi mulungi era mubalagavu,

¹²era Abamisiri bwe balikulabako baligamba nti, ‘Ono ye mukazi we,’ kale balinzita, naye ggwe ne bakuleka.

¹³Ogambanga nti, Oli mwannyinaze ndyoke mbeere bulungi ku lulwo, nʼobulamu bwange buleme kubaako kabi, buwone ku lulwo.”

¹⁴Ibulaamu bwe yayingira mu Misiri, Abamisiri ne balaba Salaayi nga mukazi mulungi nnyo.

¹⁵Nʼabakungu ba Falaawo bwe baamulaba ne bamutendera Falaawo ne bamutwala mu lubiri lwa Falaawo.

¹⁶Ku lwa Salaayi, Falaawo nʼayisa bulungi Ibulaamu. Ibulaamu nʼaweebwa endiga, nʼente, nʼendogoyi, nʼabaweereza abasajja, nʼabaweereza abakazi, nʼendogoyi enkazi, nʼeŋŋamira.

¹⁷Naye Katonda nʼaleetera Falaawo nʼennyumba ye endwadde enkambwe olwa Salaayi mukazi wa Ibulaamu.

¹⁸Awo Falaawo nʼayita Ibulaamu nʼamugamba nti, “Kiki kino kyʼonkoze? Lwaki tewantegeeza nti Mukazi wo?

¹⁹Lwaki wagamba nti Mwannyoko, ne mmutwala okuba mukazi wange? Kale kaakano mukazi wo wuuno mmutwale mugende.”

²⁰Falaawo nʼalagira basajja be ebikwata ku Ibulaamu, ne bamusindiikiriza nʼava mu nsi ne mukazi we ne byonna bye yalina.