Olubereberye 14:1-24 LGCB2014 - Bible AI

¹Mu biro bya Amulafeeri kabaka wa Sinali,[10] ne Aliyooki kabaka wa Erasali, ne Kedolawomeeri kabaka wa Eramu ne Tidali kabaka wa Goyiyimu,

²bakabaka bano ne balumba ne balwana ne Bbeera kabaka wa Sodomu, ne Bbiruusa kabaka wa Ggomola, ne Sinaabu kabaka wa Aduma, ne Semebeeri kabaka wa Zeboyiyimu ne kabaka wa Bera, ye Zowaali.

³Bano bonna abooluvannyuma ne beegatta wamu mu kiwonvu kya Sidimu (yʼEnnyanja eyʼOmunnyo).

⁴Baamala emyaka kkumi nʼebiri nga baweereza Kedolawomeeri kabaka we Eramu, naye mu mwaka ogwʼekkumi nʼesatu ne bamujeemera.

⁵Mu mwaka ogwʼekkumi nʼena Kedolawomeeri ne bakabaka abaali naye ne balumba Abaleefa[11] mu Asuterosikalumayimu ne babawangula, nʼAbazuuzi mu Kaamu, nʼAbemi mu Savekiriyasayimu,

⁶nʼAbakooli mu nsi eyʼensozi eya Seyiri nʼokutuukira ddala Erupalaani okumpi nʼeddungu.

⁷Ate ne bakyuka ne bajja e Nuumisupaati, ye Kadesi ne bawangula ensi yonna eyʼAbamaleki nʼAbamoli abaabeeranga mu Kazazonutamali.

⁸Awo kabaka wa Sodomu ne kabaka wa Ggomola, ne kabaka wa Aduma, ne kabaka wa Zeboyiyimu ne kabaka wa Bera, ye Zowaali ne beegatta mu lutalo mu kiwonvu kyʼe Sidimu

⁹okulwanyisa Kedolawomeeri kabaka wa Eramu, ne Tidali kabaka wa Goyiyimu ne Amulafeeri kabaka wa Sinali awamu ne Aliyooki kabaka wa Erasali, bakabaka bana nga balwanyisa bakabaka bataano.

¹⁰Ekiwonvu kyʼe Sidimu kyali kijjudde ebinnya ebirimu kolaasi; bakabaka bʼe Sodomu ne Ggomola bwe baddukanga ngʼabamu babigwamu, nʼabalala ne baddukira ku nsozi.

¹¹Awo bakabaka abana ne batwala ebintu byonna ebyali mu Sodomu ne Ggomola, nʼemmere yaabwe yonna gye baalina ne bagenda.

¹²Era ne batwala ne Lutti, mutabani wa muganda wa Ibulaamu eyali mu Sodomu, nʼebintu bye ne bagenda nabyo kubanga naye yali abeera mu Sodomu.

¹³Awo Omwamoli omu eyali abadduseeko nʼajja nʼategeeza Ibulaamu Omwebbulaniya, eyali abeera okumpi nʼemivule gya Mamule, muganda wa Esukoli ne Aneri abaalina endagaano ne Ibulaamu.

¹⁴Ibulaamu bwe yawulira nti muganda we atwalibbwa nga munyage, nʼakulembera basajja be abatendeke, abazaalirwa mu nnyumba ye, ebikumi bisatu mu kkumi na munaana, ne bawondera abaatwala Lutti okutuuka e Ddaani.

¹⁵Mu kiro nʼayawulamu eggye lye, nʼabalumba, ye nʼabaddu be ne bagoberera abantu bali okutuuka e Kkoba, ku luuyi olwʼobukiikakkono obwa Damasiko.

¹⁶Awo nʼakomyawo ebintu byonna, era nʼakomyawo ne muganda we Lutti nʼebintu bye nʼabakazi nʼabantu bonna.

¹⁷Ibulaamu bwe yakomawo ngʼamaze okuwangula Kedolawomeeri ne bakabaka abaali naye, kabaka wa Sodomu nʼafuluma okumusisinkana mu kiwonvu kyʼe Save (kye kiwonvu kya kabaka).

¹⁸ⓔ Ne Merukizeddeeki kabaka wa Ssaalemi[12] eyali kabona wa Katonda Ali Waggulu Ennyo nʼaleeta omugaati ne wayini.

¹⁹Nʼasabira Ibulaamu omukisa ngʼagamba nti,

¹⁹“Katonda Ali Waggulu Ennyo Omutonzi wʼeggulu nʼensi awe Ibulaamu omukisa.

²⁰Era Katonda Ali Waggulu Ennyo agulumizibwe agabudde abalabe bo mu mikono gyo.”

²⁰Awo Ibulaamu nʼamuwa ekitundu ekyʼekkumi ekya buli kimu.

²¹Ne kabaka wa Sodomu nʼagamba Ibulaamu nti, “Mpa abantu, gwe otwale ebintu.”

²²Naye Ibulaamu nʼaddamu kabaka wa Sodomu nti, “Ndayira Mukama Katonda Ali Waggulu Ennyo, Omutonzi wʼeggulu nʼensi,

²³sijja kutwala wadde akawuzi oba akakoba akasiba engatto, oba ekintu kyonna ekikyo, oleme okugamba nti, ‘Ngaggawazza Ibulaamu.’

²⁴Sijja kubaako kye ntwala; okuggyako ebyo abavubuka bye balidde, nʼomugabo gwʼabasajja abaagenda nange; leka Aneri ne Esukoli ne Mamule bo batwale omugabo gwabwe.”