Olubereberye 15:1-21 LGCB2014 - Bible AI

¹Ebyo nga biwedde, ekigambo kya Mukama ne kijjira Ibulaamu mu kwolesebwa nti, “Totya Ibulaamu, Nze ngabo yo era empeera yo ennene ennyo.”

²Naye Ibulaamu nʼaddamu nti, “Kiki kyʼolimpa Ayi Mukama Katonda, kubanga sirina mwana, nʼomusika wʼennyumba yange ye Eryeza owʼomu Ddamasiko?”

³Ibulaamu ne yeeyongera nʼagamba nti, “Laba tompadde mwana; omuddu eyazaalibwa mu nnyumba yange ye musika wange.”

⁴Laba ekigambo kya Mukama ne kimujjira nti, “Omusajja oyo tagenda kuba musika wo; mutabani wo, yʼaliba omusika wo.”

⁵ⓕ Nʼamufulumya ebweru nʼamugamba nti, “Tunuulira eggulu, obale emunyeenye, obanga osobola okuzibala.” Awo nʼamugamba nti, “Nʼezzadde lyo bwe liriba bwe lityo.”

⁶ⓖ Ibulaamu nʼakkiriza Mukama, nʼakimubalira okuba obutuukirivu.

⁷Nʼamugamba nti, “Nze Mukama eyakuggya mu Uli ensi eyʼAbakaludaaya, nkuwe ensi eno ebeere yiyo.”

⁸Ibulaamu nʼaddamu nti, “Ayi Mukama nnaamanya ntya nti eriba yange?”

⁹Mukama nʼamuddamu nti, “Ndeetera ennyana eyaakamala emyaka esatu, embuzi eyʼemyaka esatu, endiga ensajja eyʼemyaka esatu, kaamukuukulu nʼejjiba.”

¹⁰Ibulaamu nʼabireeta byonna nʼabisalamu wakati nʼateeka buli kitundu kungulu ku kinnaakyo, naye ebinyonyi byo teyabisalamu bitundu nga biri.

¹¹Ensega bwe zajja okubirya, Ibulaamu nʼazigoba.

¹²ⓗ Enjuba yali egwa, Ibulaamu ne yeebaka otulo tungi; era laba, ekizikiza ekingi ekyʼamaanyi ne kimubuutikira.

¹³ⓘ Awo Mukama nʼagamba Ibulaamu nti, “Manyira ddala nti ezzadde lyo baliba batambuze mu nsi eteri yaabwe, era baliba baddu eyo, balibonyaabonyezebwa eyo okumala emyaka ebikumi bina.

¹⁴ⓙ Naye ndibonereza eggwanga lye balikolera nʼoluvannyuma balivaayo nʼobugagga bungi.

¹⁵Naye ggwe oligenda mirembe eri bajjajjaabo; oliziikibwa ngʼowangaalidde ddala nnyo.

¹⁶Era balikomawo wano mu mulembe ogwokuna; kubanga obutali butuukirivu bwʼOmwamoli tebunnayitirira.”

¹⁷Enjuba bwe yagwa ngʼekizikiza kikutte, laba, ensuwa eyaka omuliro era enyooka omukka nʼekimulisa ne biyita wakati wʼebitundu bino.

¹⁸ⓚ Ku lunaku olwo Mukama nʼakola endagaano ne Ibulaamu ngʼagamba nti, “Ezadde lyo ndiwa ensi eno, okuva ku mugga ogwʼe Misiri okutuuka ku mugga omunene, omugga Fulaati:

¹⁹Omukeeni, nʼOmukenizi, nʼOmukadumoni,

²⁰nʼOmukiiti, nʼOmuperizi, nʼAbaleefa,

²¹nʼOmwamoli, nʼOmukanani, nʼOmugirugaasi nʼOmuyebusi, mbagabula mu mukono gwo.”