Olubereberye 16:1-16 LGCB2014 - Bible AI

¹Salaayi mukyala wa Ibulaamu yali teyamuzaalira mwana;

²Salaayi nʼagamba Ibulaamu nti, “Laba Mukama tampadde mwana; weebake nʼomuweereza wange, oboolyawo nnyinza okufuna abaana mu ye.”

²Awo Ibulaamu nʼawulira eddoboozi lya Salaayi.[13]

³Bwʼatyo Ibulaamu bwe yali yaakamala emyaka kkumi mu nsi ya Kanani, Salaayi mukazi we nʼaddira Agali Omumisiri, omuweereza we nʼamuwa Ibulaamu abeere mukazi we.

⁴Ibulaamu ne yeegatta ne Agali, Agali nʼaba olubuto.

⁴Agali bwe yalaba ngʼali lubuto, nʼanyooma Salaayi, mugole we.

⁵Salaayi nʼagamba Ibulaamu nti, “Ekibi ekinkoleddwako kibeere ku ggwe. Nakuwa omuweereza wange mu kifuba kyo naye bwʼalabye ngʼali lubuto nʼannyooma. Mukama atulamule nze naawe!”

⁶Naye Ibulaamu nʼagamba Salaayi nti, “Laba, omuweereza wo ali mu buyinza bwo; mukole nga bwʼoyagala.” Awo Salaayi natandika okubonyaabonya Agali; Agali nʼadduka okuva wʼali.

⁷Malayika wa Mukama nʼamusanga ku nsulo yʼamazzi mu ddungu, ensulo yʼamazzi eri ku kkubo eriraga e Ssuuli.

⁸Nʼagamba nti, “Agali, omuweereza wa Salaayi, ovudde wa era ogenda wa?” Nʼamuddamu nti, “Nziruka mugole wange Salaayi.”

⁹Malayika wa Mukama nʼamugamba nti, “Ddayo eri mugole wo omugondere.”

¹⁰Era Malayika wa Mukama nʼamugamba nti, “Ezadde lyo ndiryaza waleme kubeerawo asobola kulibala.”

¹¹Ate malayika wa Mukama nʼamugamba nti, “Laba, olina omwana mu nda yo, aliba wabulenzi, olimutuuma Isimayiri, kubanga Mukama ategedde okubonaabona kwo.

¹²Aliba ngʼentulege, anaalwananga na buli muntu era na buli muntu anaalwananga naye, era anaabanga mu bulabe ne baganda be.”

¹³Awo nʼakoowoola erinnya lya Mukama eyayogera naye, nʼagamba nti, “Oli Katonda alaba”, kubanga yagamba nti, “Ndabidde ddala Katonda ne nsigala nga ndi mulamu nga maze okumulaba.”

¹⁴Oluzzi kye lwava luyitibwa Beerirakayiro, luli wakati wa Kadesi ne Beredi.

¹⁵ⓛ Awo Agali nʼazaalira Ibulaamu omwana owoobulenzi, Ibulaamu nʼatuuma mutabani wa Agali gwe yamuzaalira, erinnya Isimayiri.

¹⁶Ibulaamu yali wa myaka kinaana mu mukaaga Agali bwe yamuzaalira Isimayiri.