Olubereberye 18:1-33 LGCB2014 - Bible AI

¹Awo Mukama nʼalabikira Ibulayimu mu mivule gya Mamule, mu ttuntu ngʼatudde mu mulyango gwa weema ye.

²ⓠ Bwe yasitula amaaso ge nʼalaba, era laba, abasajja basatu nga bayimiridde mu maaso ge. Bwe yabalaba, nʼadduka okuva mu mulyango gwa weema ye, okubasisinkana nʼagwa wansi,

³nʼagamba nti, “Mukama wange obanga ndabye ekisa mu maaso go, toyita ku muddu wo.

⁴Leka tuleete otuzzi munaabe ku bigere, muwummuleko wano wansi wʼomuti,

⁵nga bwe ndeeta omugaati mulyeko muddemu amaanyi, mulyoke mugende, anti muzze eri muddu wammwe.”

⁵Ne bamugamba nti, “Kola nga bwʼogambye.”

⁶Ibulayimu nʼayanguwa okugenda eri Saala, nʼamugamba nti, “Teekateeka mangu kilo kkumi na mukaaga ezʼobutta okande ofumbire mangu abagenyi emmere.”

⁷Ibulayimu nʼagenda bunnambiro mu kisibo nʼaggyamu ennyana, ento era ennungi nʼagiwa omuddu eyayanguwa okugifumba.

⁸Awo nʼaddira omuzigo nʼamata nʼennyana eyafumbibwa nʼabiteeka mu maaso gaabwe; nʼayimirira we baali, wansi wʼomuti nga balya.

⁹Ne bamubuuza nti, “Saala mukyala wo ali ludda wa?” Nʼaddamu nti, “Ali mu weema.”

¹⁰ⓡ Mukama nʼamugamba nti, “Ddala ndikomawo gyʼoli mu kiseera nga kino, era Saala mukazi wo alizaala omwana owoobulenzi.” Ne Saala yali awuliriza ngʼali mu mulyango gwa weema emabega we.

¹¹Mu kiseera kino Ibulayimu ne Saala baali bakaddiye nnyo nga Saala takyali na mu nsonga zʼabakazi.

¹²ⓢ Awo Saala nʼasekera muli ngʼagamba nti, “Nga nkaddiye, nga ne baze akaddiye, ndisanyusibwa?”

¹³Mukama nʼabuuza Ibulayimu nti, “Lwaki Saala asese ngʼagamba nti, ‘Ndiyinza okuzaala omwana nga nkaddiye?’

¹⁴ⓣ Waliwo ekirema Mukama? Omwaka ogujja, mu kiseera kyennyini, ndikomawo gyʼoli, ne Saala alizaala omwana owoobulenzi.”

¹⁵Naye Saala ne yeegaana ngʼagamba nti, “Si sese,” kubanga yali atidde. Nʼamuddamu nti, “Nedda osese.”

¹⁶Awo abasajja bwe bavaayo ne bagenda, ne boolekera oluuyi lwa Sodomu[14]; Ibulayimu nʼabawerekerako.

¹⁷Mukama nʼagamba mu mutima gwe nti, “Ibulayimu namukweka kye ŋŋenda okukola?

¹⁸Ibulayimu agenda kufuuka eggwanga eddene, eryʼamaanyi, era mu ye, amawanga gonna mwe galiweerwa omukisa.

¹⁹Mmulonze alagire abaana be nʼabantu be abaliddawo okukwatanga ekkubo lya Mukama nga bakola ebyʼobutuukirivu era nga ba mazima, Mukama alyoke atuukirize ekyo kye yasuubiza Ibulayimu.”

²⁰Awo Mukama nʼagamba nti, “Olwʼokunkaabirira okusukkiridde olwʼebibi bya Sodomu ne Ggomola ebingi ennyo,

²¹nzija kukka ndabe obanga ddala bakozi ba bibi ngʼokunkaabirira olwʼebibi byabwe okutuuse gye ndi bwe kuli, era obanga si bwe kiri nnaamanya.”

²²Awo abasajja ne bakyuka okuva awo, ne batambula okwolekera Sodomu; naye Ibulayimu nʼasigala ngʼakyayimiridde mu maaso ga Mukama.

²³Awo Ibulayimu nʼamusemberera nʼagamba nti, “Ddala olizikiriza abatuukirivu awamu nʼababi?

²⁴Singa mu kibuga mulimu abatuukirivu amakumi ataano onookizikiriza nʼotokisonyiwa olwʼabatuukirivu amakumi ataano abakirimu?

²⁵Kireme okuba gyʼoli okukola ekintu bwe kityo, okutta abatuukirivu awamu nʼababi, abatuukirivu ne benkana nʼababi! Kireme kuba bwe kityo! Omulamuzi owʼensi yonna teyandisaanye akole kituufu?”

²⁶Mukama nʼagamba nti, “Bwe nnaasanga mu Sodomu abatuukirivu amakumi ataano mu kibuga omwo nzija kusonyiwa ekibuga kyonna ku lwabwe.”

²⁷Ibulayimu nʼaddamu nti, “Laba nnyinziza okwogera ne Mukama, nze ani, nze enfuufu nʼevvu!

²⁸Singa abatuukirivu babulako bataano okuwera amakumi ataano, onoozikiriza ekibuga kubanga kubulako bataano?”

²⁸Nʼamuddamu nti, “Sijja kukizikiriza, bwe nnaasangamu abatuukirivu amakumi ana mu abataano abampulira.”

²⁹Ate Ibulayimu nʼamugamba nti, “Singa musangibwamu amakumi ana.” Mukama nʼamuddamu nti, “Ku lwʼamakumi ana sijja kukizikiriza.”

³⁰Ate nʼagamba nti, “Kale nno Mukama aleme okunsunguwalira, nange nnaayogera. Singa musangibwamu amakumi asatu.” Nʼaddamu nti, “Sijja kukizikiriza singa musangibwamu amakumi asatu.”

³¹Nʼagamba nti, “Laba ŋŋumye ne njogera ne Mukama. Singa musangibwamu amakumi abiri.” Nʼagamba nti, “Ku lwʼamakumi abiri sijja kukizikiriza.”

³²Ate nʼagamba nti, “Kale Mukama aleme okukwatibwa obusungu, nnaayongera okwogera, naye luno lwokka. Singa kkumi lye linaasangibwamu.” Nʼaddamu nti, “Ku lwʼabo ekkumi sijja kukizikiriza.”

³³Mukama bwe yamala okwogera ne Ibulayimu nʼagenda, ne Ibulayimu nʼaddayo ewuwe.