Olubereberye 19:1-38 LGCB2014 - Bible AI

¹Bamalayika ababiri ne batuuka mu Sodomu akawungeezi; Lutti yali atudde mu mulyango gwa Sodomu. Lutti bwe yabalaba nʼagolokoka okubasisinkana, nʼavuunama,

²nʼagamba nti, “Bakama bange mukyame mu nnyumba yʼomuddu wammwe munaabe ku bigere, mbegayiridde nʼokusula musule. Munaazuukuka mangu ku makya ne mukwata ekkubo lyammwe.”

²Ne bagamba nti, “Nedda tunaasula mu luguudo.”

³Naye nʼabawaliriza nnyo; awo ne bakyama ne bajja gyʼali ne bayingira mu nnyumba ye, nʼabategekera ekijjulo nʼemigaati egitali mizimbulukuse ne balya.

⁴Naye nga tebannaba kugenda kwebaka, abasajja abʼomu kibuga, abasajja ba Sodomu, abakulu nʼabato, abantu bonna ne beetooloola ennyumba;

⁵ⓤ ne bayita Lutti nga bagamba nti, “Abasajja abazze gyʼoli ekiro kino bali ludda wa? Batufulumize twebake nabo.”

⁶Lutti nʼafuluma gye bali, nʼaggalawo oluggi,

⁷nʼabagamba nti, “Baganda bange mbasaba temukola kibi kifaanana bwe kityo.

⁸Laba, nnina bawala bange embeerera babiri, ka mbabafulumize, mu bakole kye mwagala; naye temubaako kye mukola basajja bano, bagenyi bange era nze mbalabirira.”

⁹Naye ne bamugamba nti, “Tuviire! Omusajja omugwira ono, ate kati yʼatulagira ekyʼokukola! Nedda, tujja kukukolako nʼokusinga abagenyi bo.” Awo ne banyigiriza nnyo Lutti, era kaabula kata bamenye nʼoluggi.

¹⁰Naye abasajja ababiri abaali mu nnyumba ne bagolola emikono gyabwe ne bakwata Lutti ne bamuyingiza mu nnyumba ne baggalawo oluggi.

¹¹ⓥ Ne baziba amaaso gʼabasajja abaali ebweru ku luggi lwʼennyumba, abato nʼabakulu, ne bakoowa nga bawammanta oluggi.

¹²Awo abasajja bali ababiri ne babuuza Lutti nti, “Olina abantu bo abalala wano, batabani bo, oba bakoddomi bo, oba bawala bo, oba omuntu omulala yenna mu kibuga? Bafulumye mu kifo kino;

¹³kubanga tuli kumpi okukizikiriza. Kubanga okukaaba olwʼabantu baamu eri Mukama kuyitiridde, era Mukama atutumye okukizikiriza.”

¹⁴Awo Lutti nʼafuluma nʼategeeza bakoddomi be abaali abʼokuwasa bawala be ngʼagamba nti, “Musituke, muve mu kifo kino, kubanga Mukama ali kumpi kukizikiriza.” Naye yafaanana ngʼabalaata eri bakoddomi be. Lutti nʼabʼennyumba ye ne badduka.

¹⁵Naye obudde bwe bwali bunaatera okukya, bamalayika ne balagira Lutti nga bagamba nti, “Golokoka, otwale mukazi wo ne bawala bo ababiri abali wano muleme okuzikirira ngʼekibuga kibonerezebwa.”

¹⁶ⓦ Naye bwe yali akyekunya, abasajja ne bamukwata omukono, nʼemikono gya mukazi we, nʼemikono gyʼabawala be bombi, Katonda ngʼabakwatirwa ekisa, ne babafulumya ne babateeka ebweru wʼekibuga.

¹⁷Bwe baabafulumya ne babagamba nti, “Mudduke muwonye obulamu bwammwe, temutunula mabega wadde okuyimirira mu kiwonvu; muddukire ku nsozi, muleme okuzikirizibwa.”

¹⁸Awo Lutti nʼabagamba nti, “Nedda bakama bange;

¹⁹Laba, omuddu wammwe alabye ekisa mu maaso gammwe, era mundaze ekisa kingi nga muwonya obulamu bwange; naye siyinza kuddukira ku nsozi akabi tekalwa kunzingiza ne nfa.

²⁰Laba, ekibuga kiri ekitono ekiri okumpi, kirungi okuddukira omwo. Leka nzirukire eyo. Era nʼobulamu bwange bujja kuwona!”

²¹Nʼamuddamu nti, “Laba, era nnyongedde okukukwatirwa ekisa, sijja kumalawo kibuga kyʼoyogeddeko.

²²Yanguwa tolwa, ddukira eyo; kubanga siriiko kye nnaakola nga tonnatuuka eyo.” Erinnya lyʼekibuga kyeryava liba Zowaali.

²³Lutti we yatuukira mu Zowaali enjuba yali evuddeyo, Sodomu ne Ggomola ne bizikirizibwa.

²⁴ⓧ Awo Mukama nʼatonnyesa ku Sodomu ne Ggomola omuliro nʼobuganga okuva mu ggulu;

²⁵nʼazikiriza ebibuga ebyo, nʼekiwonvu kyonna nʼabantu bonna abaali mu bibuga, ne buli kintu ekyalimu.

²⁶ⓨ Naye mukazi wa Lutti bwe yatunula emabega, nʼafuuka empagi eyʼomunnyo.

²⁷Awo ku makya ennyo Ibulayimu nʼagenda mu kifo mwe yayimiririra mu maaso ga Mukama;

²⁸nʼatunula wansi okwolekera Sodomu ne Ggomola nʼokwolekera ekitundu kyonna ekyʼolusenyi, nʼalaba, era laba, ekitundu kyonna nga kijjudde omukka.

²⁹Bwe kityo bwe kyali Katonda bwe yazikiriza ebibuga ebyʼomu kiwonvu. Katonda nʼajjukira Ibulayimu nʼafulumya Lutti ebweru nʼamuggya wakati mu kuzikirizibwa, bwe yazikiriza ebibuga Lutti mwe yabeeranga.

³⁰Awo Lutti nʼava mu Zowaali, nʼabeera mu nsozi wamu ne bawala be, kubanga yatya okubeera mu Zowaali. Ye ne bawala be ne babeera mu mpuku.

³¹Olunaku lumu omuwala omukulu nʼagamba muto we nti, “Kitaffe akaddiye era tewali na musajja ku nsi ajja kutwagala ngʼempisa yʼensi bwʼeri.

³²Jjangu tunywese kitaffe omwenge, tulyoke twebake naye, tusobole okufuna ezzadde nga liva mu kitaffe.”

³³Ne batamiiza kitaabwe ekiro ekyo, omukulu nʼagenda ne yeebaka ne kitaawe, Lutti nʼatamanya bwe yeebaka yadde bwe yagolokoka.

³⁴Ku lunaku olwaddirira, omuwala omukulu nʼagamba omuto nti, “Laba, ekiro neebase ne kitange; Leka tumunywese omwenge ekiro kino, oyingire gyʼali weebake naye, tulyoke tusobole okukuuma ezzadde mu kitaffe.”

³⁵Awo ne batamiiza kitaabwe ekiro ekyo, omuwala omuto nʼasituka ne yeebaka naye, Lutti nʼatamanya bwe yeebase ne bwʼagolokose.

³⁶Bwe batyo bawala ba Lutti bombi buli omu nʼaba olubuto nga lwa kitaabwe.

³⁷Omuwala omukulu nʼazaala omwana wabulenzi nʼamutuuma Mowaabu, ye jjajja wʼAbamowaabu abaliwo kaakano.

³⁸Omuto naye nʼazaala omwana mulenzi nʼamutuuma Benami, ye yavaamu Abamoni abaliwo ne kaakano.