Olubereberye 21:1-34 LGCB2014 - Bible AI

¹Awo Mukama nʼakwatirwa Saala ekisa nga bwe yagamba Ibulayimu nʼakola Saala nga bwe yasuubiza.

²ⓩ Saala nʼaba olubuto, nʼazaalira Ibulayimu omwana owoobulenzi mu bukadde bwe, mu kiseera Mukama kye yamugamba.

³Ibulayimu nʼatuuma omwana owoobulenzi, eyamuzaalirwa Saala, erinnya Isaaka.

⁴ⓐ Ibulayimu nʼakomola mutabani we Isaaka owʼennaku omunaana ezʼobukulu nga Katonda bwe yamulagira.

⁵Ibulayimu yali aweza emyaka kikumi mutabani we Isaaka bwe yazaalibwa.

⁶Saala nʼagamba nti, “Katonda andeetedde okusekererwa, buli anaawulira anansekerera.”

⁷Era nʼagamba nti, “Ani yandirowoozezza nti Saala alifuna omwana? Naye, laba mmuzaalidde omwana wabulenzi.”

⁸Isaaka nʼakula, nʼaggyibwa ku mabeere, Ibulayimu nʼafumba embaga ennene ku lunaku Isaaka lwe yaggyibwa ku mabeere.[15]

⁹Naye Saala yalaba nga mutabani wa Agali Omumisiri, gwe yazaalira Ibulayimu ngʼazannya ne mutabani we Isaaka.

¹⁰ⓑ Nʼalyoka agamba Ibulayimu nti, “Goba omuweereza ono ne mutabani we, kubanga omwana wʼomuweereza ono talisikira wamu na mwana wange Isaaka.”

¹¹Naye ekyo Ibulayimu nʼatakisiima.

¹²ⓒ Katonda nʼagamba Ibulayimu nti, “Tonakuwala olwʼomulenzi nʼolwʼomuweereza wo omukazi, buli Saala kyʼakugamba kikole; kubanga mu Isaaka mwe ndituukiririza ebyo byonna bye nakusuubiza.

¹³Era nʼomwana wʼomuweereza wo omukazi ndimufuula eggwanga, kubanga ava mu ggwe.”

¹⁴Ibulayimu nʼagolokoka ku makya ennyo, nʼaddira omugaati nʼensawo eyʼamazzi nʼabiwa Agali nʼomwana gwe yazaala ngʼabiteeka ku kibegabega kye, nʼamusiibula. Agali nʼagenda ngʼatambulatambula mu ddungu lya Beeruseba.

¹⁵Awo amazzi agʼomu ddiba bwe gaggwaamu, Agali nʼateeka omwana we wansi wʼogumu ku miti.

¹⁶Agali ne yeeyongerayo ebbanga ngʼawalasibwa akasaale, nga mita kikumi, nʼatuula okumwolekera, kubanga yayogera nti, “Nneme okulaba omwana ngʼafa.” Naye bwe yali ngʼatudde, omwana nʼayimusa eddoboozi nʼakaaba.

¹⁷Katonda nʼawulira eddoboozi lyʼomulenzi ngʼakaaba, malayika wa Katonda nʼayita Agali ngʼasinziira mu ggulu nʼamugamba nti, “Kiki ekikuteganya? Totya, kubanga Katonda awulidde eddoboozi lyʼomulenzi wʼali.

¹⁸Golokoka, situla omwana omunyweze mu mikono gyo, kubanga ndimufuula eggwanga eddene.”

¹⁹Awo Katonda nʼazibula amaaso gʼAgali, nʼalaba oluzzi, nʼagenda nʼajjuza ensawo eyʼeddiba amazzi, nʼanywesa omulenzi.

²⁰Awo Katonda nʼaba nʼomulenzi nʼakula nʼabeera mu ddungu nʼaba mwatiikirivu mu kulasa.

²¹Yabeeranga mu ddungu lya Palani: nnyina nʼamufunira omukazi okuva mu nsi yʼEmisiri.

²²Mu kiseera ekyo Abimereki ngʼali ne Fikoli omukulu wʼeggye lye nʼagamba Ibulayimu nti, “Katonda ali naawe mu buli kyʼokola:

²³kale kaakano ndayirira mu maaso ga Katonda nga tolinkuusakuusa, wadde okukuusakuusa omwana wange oba omwana wʼomwana wange. Naye nga nze bwe nkukoze obulungi nga naawe bwʼolinkola nze nʼensi mwʼozze.”

²⁴Ne Ibulayimu nʼamuddamu nti, “Nkulayiridde.”

²⁵Awo Ibulayimu ne yeemulugunya eri Abimereki olwʼoluzzi lwe abaddu be lwe baamunyagako.

²⁶Abimereki nʼamugamba nti, “Simanyi nʼomu eyakola ekintu ekyo, ggwe tewambulira era sikiwulirangako okutuusa ggwe lwʼokintegeezeezza olwa leero.”

²⁷Awo Ibulayimu nʼaddira endiga nʼente nʼabiwa Abimereki, ne balagaana endagaano bombi.

²⁸Awo Ibulayimu nʼayawulako endiga enduusi musanvu okuva mu kisibo kye.

²⁹Abimereki nʼabuuza Ibulayimu nti, “Endiga ezo omusanvu enduusi zʼoyawuddeko amakulu gaazo ki?”

³⁰Nʼamuddamu nti, “Endiga ezo enduusi omusanvu onoozitwala okuva gye ndi kalyoke kabe obukakafu nti Nze nasima oluzzi olwo.”

³¹Ekifo ekyo kyekyava kiyitibwa Beeruseba, kubanga eyo bombi gye baalagaanira.

³²Bwe baamala okukola endagaano e Beeruseba, Abimereki ne Fikoli omukulu wʼeggye lye ne basitula ne baddayo mu nsi yʼAbafirisuuti.

³³Ibulayimu nʼasimba omuti omumyulira mu Beeruseba nʼakaabiririra eyo erinnya lya Mukama, Katonda Ataggwaawo.

³⁴Ibulayimu ne yeeyongera okutambulatambula mu nsi yʼAbafirisuuti okumala ennaku nnyingi.