Olubereberye 22:1-24 LGCB2014 - Bible AI

¹ⓓ Awo oluvannyuma lwʼebyo, Katonda nʼagezesa Ibulayimu, nʼamuyita nti, “Ibulayimu!” Nʼaddamu nti, “Nze nzuuno.”

²Katonda nʼamugamba nti, “Twala mutabani wo, mutabani wo omu yekka, Isaaka, gwʼoyagala, ogende mu nsi Moliya ku lumu ku nsozi lwe ndikulaga omuweereyo eyo okuba ekiweebwayo ekyokebwa.”

³Ibulayimu nʼagolokoka ku makya nʼateeka amatandiiko ku ndogoyi ye, nʼatwala babiri ku baweereza be abasajja ne Isaaka mutabani we, nʼayasa enku ezʼekiweebwayo ekyokebwa, nʼasituka nʼagenda mu kifo Katonda kye yamugamba.

⁴Ku lunaku olwokusatu Ibulayimu nʼayimusa amaaso ge nʼalengera ekifo.

⁵Awo Ibulayimu nʼagamba balenzi be nti, “Musigale wano nʼendogoyi, nze nʼomulenzi tugende eri tusinze, tulyoke tukomewo.”

⁶Ibulayimu nʼaddira enku ezʼekiweebwayo ekyokebwa nʼazitikka Isaaka mutabani we, ye nʼakwata omuliro nʼakambe, ne bagenda bombi.

⁷Isaaka nʼagamba Ibulayimu nti, “Taata.” Isaaka nʼamubuuza nti, “Laba, omuliro nʼenku biibino, naye omwana gwʼendiga ogwʼekiweebwayo ekyokebwa guluwa?”

⁷Ibulayimu nʼamuddamu nti, “Nzuuno mwana wange.”

⁸Ibulayimu nʼamuddamu nti, “Mwana wange, Katonda aneefunira omwana gwʼendiga ogwʼekiweebwayo ekyokebwa.” Kale ne bagenda bombi.

⁹ⓔ Bwe baatuuka mu kifo Katonda kye yamugamba, Ibulayimu nʼazimba ekyoto, nʼatindikira enku, nʼasiba omwana we Isaaka, nʼamuteeka ku kyoto ku nku.

¹⁰Awo Ibulayimu nʼakwata ekiso, nʼagolola omukono gwe atte omwana we.

¹¹Naye malayika wa Mukama nʼamukoowoola ngʼasinziira mu ggulu, nʼagamba nti, “Ibulayimu! Ibulayimu!”

¹¹Ibulayimu nʼaddamu nti, “Nze nzuuno.” Nʼamugamba nti,

¹²“Togolola mukono gwo ku mulenzi so tomukola kintu na kimu, kubanga kaakano ntegedde nti otya Katonda, ndabye nti omwana wo tomunnyimye, omwana wo omu yekka bwʼati.”

¹³Awo Ibulayimu nʼayimusa amaaso, nʼalaba, era laba, emabega we endiga ennume ngʼeri mu kisaka ngʼamayembe gaayo mwe galaalidde. Ibulayimu nʼagenda nʼaddira endiga eyo nʼagiwaayo okuba ekiweebwayo ekyokebwa, mu kifo kyʼomwana we.

¹⁴Ibulayimu kyeyava atuuma ekifo ekyo erinnya Yakuwayire, era ne kaakano bwe kiyitibwa nti ku lusozi lwa Mukama anaagabiriranga.

¹⁵Awo malayika wa Mukama nʼayita Ibulayimu omulundi ogwokubiri ngʼasinziira mu ggulu,

¹⁶ⓕ nʼamugamba nti, “Nze Mukama neerayiridde, nga bwʼokoze kino, nʼotonnyima mwana wo omu yekka bwʼati,

¹⁷ddala ndikuwa omukisa, era ndyaza ezzadde lyo, ne liba ngʼemmunyeenye ezʼeggulu era ngʼomusenyu oguli ku lubalama lwʼennyanja. Era ezzadde lyo balitwala ebyʼabalabe baabwe,

¹⁸ⓖ era mu zzadde lyo amawanga gonna mwe galiweerwa omukisa, kubanga ogondedde eddoboozi lyange.”

¹⁹Ibulayimu nʼalyoka addayo eri abavubuka be, ne basitula ne balaga e Beeruseba.

²⁰Awo mu biro ebyo ne babuulira Ibulayimu nti, “Laba Mirika azaalidde Nakoli muganda wo abaana: Uzi ye mubereberye,

²¹ne muto we ye Buzi, ne Kemweri kitaawe wa Alamu,

²²ne Kesedi, ne Kazo, ne Pirudaasi, ne Yidulaafu ne Besweri.”

²³Era Besweri yazaala Lebbeeka. Abaana abo omunaana Mirika be yazaalira Nakoli muganda wa Ibulayimu.

²⁴Ate ne mukazi we omulala Lewuma nʼazaalira Nakoli, abaana aboobulenzi era be bano: Teba, ne Gakamu, ne Takasi, ne Maaka.