Olubereberye 23:1-20 LGCB2014 - Bible AI

¹Saala yawangaala emyaka kikumi mu abiri mu musanvu.

²Nʼafiira e Kiriyasuwalaba, ye Kebbulooni, mu nsi ya Kanani. Saala bwe yafa Ibulayimu nʼayingira okumukungubagira nʼamukaabira.

³Oluvannyuma nʼava awali omulambo gwe nʼagenda eri Abakiiti[16] nʼabagamba nti,

⁴ⓗ “Ndi mugenyi era omutambuze mu mmwe, munfunire ekifo awʼokuziika, ndyoke nziikewo omuntu wange anve ku maaso.”

⁵Abakiiti ne baddamu Ibulayimu nti,

⁶“Tuwulirize mukama waffe. Laba, oli muntu mukulu wakati mu ffe. Ziika mukazi wo mu emu ku ntaana zaffe gyʼoneeroboza. Tewali nʼomu mu ffe anaakuuma ntaana ye, oba okukuziyiza okuziika omuntu wo.”

⁷Ibulayimu nʼagolokoka nʼavuunama eri Abakiiti, bannannyini nsi.

⁸Nʼabagamba nti, “Obanga munzikirizza mu mwoyo mulungi okuziika omuntu wange, mumpulirize. Kale munneegayiririre Efulooni mutabani wa Zokali,

⁹anguze empuku eyʼe Makupeera, gyʼalina, eri ku nkomerero yʼennimiro ye. Agingulize mu maaso gammwe, mmusasule omuwendo gwayo gwonna, efuuke ekifo kyange ekyʼokuziikangamu mu mmwe.”

¹⁰Mu kiseera ekyo Efulooni yali atudde awo wakati mu Bakiiti. Efulooni, Omukiiti nʼaddamu Ibulayimu nga Abakiiti bonna abaaliwo mu mulyango gwʼekibuga nga bawulira nti,

¹¹“Nedda Mukama wange. Mpuliriza. Nkuwadde ennimiro nʼempuku erimu, ngʼabantu bange balaba, ziika omuntu wo.”

¹²Awo Ibulayimu nʼavuunama mu maaso gaabwe bonna.

¹³Nʼagamba Efulooni, bonna nga bawulira nti, “Obanga okkirizza, nkusaba nsasule omuwendo gwʼennimiro gwonna ndyoke nziikewo mukazi wange.”

¹⁴Efulooni nʼaddamu Ibulayimu nti,

¹⁵“Mpuliriza mukama wange, ennimiro esaana ebitundu byʼeffeeza ebikumi bina. Kale ekyo ki eri abʼomukwano? Twala ennimiro oziikemu abafu bo.”

¹⁶Ne bakkiriziganya, Ibulayimu kwe kusasula Efulooni ensimbi ze bakkirizaganya nga Abakiiti bonna balaba.

¹⁷Olwo ennimiro ya Efulooni mu Makupeera, eyali ku luuyi olwʼebuvanjuba olwa Mamule, ennimiro awamu nʼempuku eyalimu, nʼemiti gyonna egyali mu nnimiro ekitundu kyonna ne bifuuka bya

¹⁸Ibulayimu nga Abakiiti bonna abaafuluma mu mulyango gwʼekibuga balaba.

¹⁹Oluvannyuma Ibulayimu nʼaziika Saala mukazi we mu mpuku mu nnimiro ya Makupeera ku luuyi olwʼebuvanjuba bwa Mamule, ye Kebbulooni, mu nsi ya Kanani.

²⁰Abakiiti ne bakwasa Ibulayimu ennimiro awamu nʼempuku yaamu mu butongole okubeera obutaka bwe okuziikangamu abantu be.