Olubereberye 24:1-67 LGCB2014 - Bible AI

¹Ibulayimu yawangaala nʼakaddiwa nnyo; era Mukama yamuwa emikisa mingi mu byonna.

²Awo Ibulayimu nʼagamba omuddu asinga obukulu mu nnyumba ye, eyali afuga byonna Ibulayimu bye yalina nti, “Teeka omukono gwo wansi wʼekisambi kyange[17]

³ndyoke nkulayize mu maaso ga Mukama Katonda wʼeggulu era Katonda wʼensi, nga toliwasiza mutabani wange mukazi kuva mu bawala ba nsi ya Bakanani, mwe mbeera,

⁴wabula ngʼoligenda mu nsi yange mu bantu bange nʼowasiza mutabani wange Isaaka omukazi.”

⁵Omuddu kwe kumubuuza nti, “Omukazi bwʼataliyagala kujja nange mu nsi eno, ndizzaayo mutabani wo mu nsi mwe wava?”

⁶Ibulayimu nʼaddamu nti, “Togezanga nʼozzaayo mutabani wange.

⁷Mukama, Katonda wʼeggulu, eyanzigya mu nnyumba ya kitange, mu nsi mwe nazaalibwa eyayogera nange era nʼandayirira nti, ‘Ezadde lyo ndiriwa ensi eno,’ alituma malayika we nʼakukulembera owasirize mutabani wange omukazi era omuggyeyo.

⁸Naye omukazi bwʼaligaana okujja naawe, olwo ekirayiro kino kiriba tekikyakusiba. Kyokka togezanga nʼozzaayo omwana wange.”

⁹Awo omuddu kwe kuteeka omukono gwe wansi wʼekisambi kya mukama we Ibulayimu.

¹⁰Awo omuddu nʼatwala ku ŋŋamira za mukama we nʼagenda ngʼatutte buli ngeri ya kirabo okuva ku bya mukama we. Nʼayimuka nʼagenda e Mesopotamiya mu kibuga kya Nakoli.

¹¹Obudde bwe bwawungeera nʼatuuka ebweru wʼekibuga nʼafukamiza awo eŋŋamira okumpi nʼoluzzi obudde nga buwungedde abakazi we bagendera okukima amazzi.

¹²Nʼasaba nti, “Ayi Mukama Katonda wa mukama wange Ibulayimu mpa obuwanguzi leero nkwegayiridde, olage mukama wange Ibulayimu okwagala kwo okutaggwaawo.

¹³Laba nnyimiridde okumpi nʼoluzzi, ne bawala bʼabantu abʼomu kibuga bajja okusena amazzi.

¹⁴Kale omuwala gwe nnaagamba nti, ‘Nkwegayiridde mpa ku mazzi agʼomu nsuwa yo nnyweko,’ nʼamala agamba nti, ‘Kale nnywa, era nʼeŋŋamira zo nnaazinywesa,’ oyo yʼaba abeera gwʼolonze okuba mukazi wʼomuddu wo Isaaka. Ku kino kwe nnaategeerera nti olaze mukama wange ekisa kyo ekitaggwaawo.”

¹⁵Laba, bwe yali nga tannamaliriza kusaba, Lebbeeka muwala wa Besweri mutabani wa Mirika muka Nakoli, muganda wa Ibulayimu, nʼajja ngʼatadde ensuwa ye eyʼamazzi ku kibegabega kye.

¹⁶Omuwala oyo yali mulungi okulabako nga muwala mbeerera, nʼakka mu luzzi nʼajjuza ensuwa ye nʼavaayo.

¹⁷Awo omuddu nʼayanguwa nʼamusisinkana, nʼamugamba nti, “Nkusaba ompe ku tuzzi ku nsuwa yo.”

¹⁸Nʼamuddamu nti, “Nywako mukama wange.” Amangwago nʼassa ensuwa mu mikono gye, nʼagikwata mu mukono gwe nʼamuwa amazzi.

¹⁹Bwe yamala okumuwa amazzi, nʼamugamba nti, “Nʼeŋŋamira zo nazo nnaazisenera amazzi okutuusa lwe zinaamala okunywa.”

²⁰Bwʼatyo nʼayanguwa nʼayiwa ensuwa ye eyʼamazzi nʼagimalira mu kyesero, nʼadduka nʼasena amalala agaali gamala eŋŋamira ze zonna,

²¹omusajja ngʼasirise ngʼamwekaliriza amaaso okumanya obanga Mukama awadde olugendo lwe omukisa oba nedda.

²²Eŋŋamira bwe zaamala okunywa, omusajja nʼaddira empeta ya zaabu eyʼoku matu erimu gulaamu ttaano nʼobutundu musanvu nʼebikomo ebya zaabu bibiri ebyʼoku mikono bya gulamu kikumi mu kkumi na ttaano nʼabiwa omuwala abyenaanike.

²³Nʼamubuuza nti, “Oli muwala wʼani? Mu nnyumba ya kitaawo mulimu ekisenge mwe tuyinza okusuzibwa?”

²⁴Nʼamuddamu nti, “Ndi muwala wa Besweri, mutabani wa Mirika gwe yazaalira Nakoli.”

²⁵Nʼayongerako nti, “Tulina omuddo omukalu nʼemmere endala ebimala, era nʼekisenge ekyʼokusulamu tukirina.”

²⁶Awo omusajja nʼakutamya omutwe gwe nʼasinza Mukama.

²⁷Nʼagamba nti, “Yeebazibwe Mukama Katonda wa mukama wange Ibulayimu atalese kisa kye ekitaggwaawo nʼobwesigwa bwe eri mukama wange. Era nze ku lwange Mukama ankulembedde mu kkubo nʼantuusa mu nnyumba ya booluganda lwa mukama wange.”

²⁸Awo omuwala nʼadduka nʼategeeza abʼennyumba ya nnyina ebintu ebyo byonna.

²⁹Lebbeeka yalina mwannyina, Labbaani, eyayanguwa okulaga ku luzzi eri omusajja,

³⁰Labbaani bwe yalaba empeta nʼebikomo ku mikono gya mwannyina, era bwe yawulira ebigambo bya mwannyina ngʼomusajja bwʼamugambye, nʼagenda eri omusajja. Laba omusajja yali ngʼayimiridde awali eŋŋamira ku luzzi.

³¹Labbaani nʼamugamba nti, “Jjangu gwe aweereddwa Mukama omukisa. Lwaki obeera eno? Ntegesse ennyumba era nʼekifo kyʼeŋŋamira.”

³²Awo, omusajja nʼalaga ku nnyumba, nʼasumulula eŋŋamira, ne baziwa essubi nʼebyokulya ne bamuleetera nʼamazzi ye nʼabasajja be yali nabo banaabe ebigere.

³³Oluvannyuma ne bamuleetera emmere alye. Kyokka ye nʼagamba nti, “Sijja kulya nga sinnayogera kindeese.” Labbaani nʼamugamba nti, “Yogera.”

³⁴Awo nʼagamba nti, “Ndi muddu wa Ibulayimu.

³⁵Mukama yawa mukama wange emikisa mingi, era afuuse mukulu, amuwadde ebisibo byʼendiga nʼamagana gʼente, ne ffeeza ne zaabu, abaweereza abasajja nʼabaweereza abakazi era nʼeŋŋamira awamu nʼendogoyi.

³⁶Era Saala muka mukama wange bwe yali ngʼakaddiye yamuzaalira omwana owoobulenzi, era mukama wange awadde oyo byonna byʼalina.

³⁷Mukama wange yandayiza nʼaŋŋamba nti, ‘Towasizanga mutabani wange mukazi ava mu Bakanani ba nnyini nsi mwe mbeera.

³⁸Wabula oligenda mu nnyumba ya kitange, mu bantu bange, nʼowasiza mutabani wange omukazi okuva omwo.’

³⁹Ne mbuuza mukama wange nti, ‘Omukazi bwʼatalikkiriza kujja nange?’

⁴⁰“Ye nʼanziramu nti, ‘Mukama oyo gwe ntambulira mu maaso ge alikutumira malayika we mu lugendo lwo era alikuwa omukisa, nʼowasiza mutabani wange omukazi okuva mu bantu bange, era mu nnyumba ya kitange.

⁴¹Naye ekirayiro kyange tekirikubaako bwʼolituuka mu bantu bange ne batamukuwa, nga ggwe toliiko musango.’

⁴²“Leero bwe ntuuse ku luzzi, ne ŋŋamba nti, ‘Ayi Mukama, Katonda wa mukama wange Ibulayimu, obanga onoowa omukisa olugendo luno lwe ndiko,

⁴³laba, nnyimiridde awali oluzzi, kale omuwala anajja okusena amazzi, ne mugamba nti, “Nkusaba ku tuzzi mu nsuwa yo nyweko,”

⁴⁴nʼanziramu nti, “Nnywa, era ne ŋŋamira zo nazo nzija kuzisenera,” oyo yʼaba abeera omukazi Mukama gwʼalondedde mutabani wa mukama wange.’

⁴⁵“Laba, bwe nabadde nga nkyayogera mu mutima gwange, Lebbeeka nʼavaayo nʼensuwa ye ngʼeri ku kibegabega kye, nʼaserengeta ku luzzi nʼasena amazzi. Ne mugamba nti, ‘Nkusaba ompe nyweko.’

⁴⁶“Nassa mangu ensuwa ye okuva ku kibegabega kye, nʼagamba nti, ‘Nnywa, era nnaanywesa nʼeŋŋamira zo.’

⁴⁷“Kwe kumubuuza nti, ‘Oli muwala wʼani?’ Nʼanziramu nti, ‘Ndi muwala wa Besweri, mutabani wa Nakoli, Mirika gwe yamuzaalira.’ Ne nteeka empeta ku nnyindo ye nʼebikomo ku mikono gye.

⁴⁸Awo ne nkutamya omutwe gwange ne nsinza Mukama ne muwa ekitiibwa, Katonda wa mukama wange Ibulayimu eyankulembera nannuŋŋamya mu lugendo lwange okuwasiriza mutabani wa mukama wange omukazi okuva mu bantu ba mukama wange.

⁴⁹Kale kaakano obanga mu mazima munaakolera mukama wange ebyekisa, mumbuulire, era obanga si bwe kityo mumbuulire; ndyoke mmanye ekyʼokukola.”

⁵⁰Awo Labbaani ne Besweri ne baddamu nti, “Kino kivudde wa Mukama, tetuyinza kukuddamu kino oba kiri.

⁵¹Laba, Lebbeeka wuuyo, mutwale, agende abeere muka mutabani wa mukama wo, nga Mukama bwʼalagidde.”

⁵²Omuddu wa Ibulayimu bwe yawulira ebigambo byabwe nʼavuunama wansi mu maaso ga Mukama.

⁵³Nʼaggyayo ebyʼobugagga ebya ffeeza ne zaabu, nʼebyambalo nʼabiwa Lebbeeka, era nʼawa mwannyina ne nnyina ebirabo ebyʼomuwendo omungi.

⁵⁴Awo ye nʼabasajja be yali nabo ne balyoka balya era ne banywa; ne basulayo ekiro ekyo.

⁵⁴Bwe baagolokoka enkya nʼagamba nti, “Ka nzireyo eri mukama wange.”

⁵⁵Mwannyina ne nnyina ne bamuddamu nti, “Leka omuwala abeereko naffe akaseera, wakiri ennaku kkumi, olwo mulyoke mugende.”

⁵⁶Ye nʼabaddamu nti, “Temundwisa, kubanga Katonda awadde olugendo lwange omukisa.”

⁵⁷Ne bagamba nti, “Ka tuyite omuwala tumubuuze.”

⁵⁸Ne bayita Lebbeeka, ne bamubuuza nti, “Onoogenda nʼomusajja ono?” Nʼaddamu nti, “Nnaagenda.”

⁵⁹Awo ne basiibula Lebbeeka mwannyinaabwe, nʼomuweereza we omuwala, nʼomuweereza wa Ibulayimu omusajja awamu nʼabasajja be.

⁶⁰Ne basabira Lebbeeka omukisa ne bamugamba nti,

⁶⁰“Mwannyinaffe beera nnyina wʼenkumi nʼenkumi, abaana nʼabazzukulu bo balyenga ebibuga byʼabalabe baabwe.”

⁶¹Awo Lebbeeka nʼabaweereza be ne basituka ne beebagala eŋŋamira ne bagenda nʼomuweereza wa Ibulayimu omusajja, bwʼatyo omuddu nʼatwala Lebbeeka ne bagenda.

⁶²Olwo Isaaka yali ngʼavudde e Beerirakayiroyi ngʼali mu Negevu.

⁶³Awo bwe yali ngʼatambula nga bwʼafumiitiriza mu nnimiro akawungeezi, nʼayimusa amaaso ge nʼalengera eŋŋamira nga zijja.

⁶⁴Ne Lebbeeka nʼayimusa amaaso ge. Bwe yalengera Isaaka nʼava ku ŋŋamira,

⁶⁵nʼabuuza omuddu nti, “Ani oyo gwe nnengera mu nnimiro ajja okutusisinkana?”

⁶⁵Omuddu nʼaddamu nti, “Ye mukama wange.” Lebbeeka kwe kutoola omunagiro gwe ne yeebikkirira.

⁶⁶Awo omuddu nʼategeeza Isaaka byonna nga bwe byagenda.

⁶⁷Awo Isaaka nʼatwala Lebbeeka nʼamuyingiza mu weema eyali eya Saala nnyina, nʼafuuka mukazi we nʼamwagala. Isaaka nʼalyoka afuna essanyu kasookedde afiirwa nnyina.[18]