Olubereberye 25:1-34 LGCB2014 - Bible AI

¹Ibulayimu nʼawasa omukazi omulala erinnya lye Ketula.

²Yamuzaalira Zimulaani, ne Yokusaani, ne Medani, ne Midiyaani, ne Isubaki ne Suwa.

³Yokusaani nʼazaala Seeba ne Dedani. Dedani nʼazaala Asulimu, ne Letusimu ne Leumimu.

⁴Batabani ba Midiyaani baali Efa, ne Eferi, ne Kanoki, ne Abida ne Eruda. Abo bonna be baana nʼabazzukulu ba Ketula.

⁵Ibulayimu yawa Isaaka byonna bye yalina.

⁶Naye bo abaana bʼabaweereza be nʼabawa birabo, nʼabasiibula bwe yali ngʼakyali mulamu bagende ebuvanjuba mu nsi eyʼebuvanjuba; baviire mutabani we Isaaka.

⁷Ibulayimu yawangaala emyaka kikumi mu nsanvu mu etaano.

⁸Ibulayimu yafa ngʼakaddiyidde ddala, nga musajja awangaalidde ddala obulungi.

⁹Batabani be Isaaka ne Isimayiri ne bamuziika mu mpuku eyʼe Makupeera, mu nnimiro ya Efulooni, mutabani wa Zokali Omukiiti, ebuvanjuba bwa Mamule;

¹⁰ennimiro Ibulayimu gye yagula ku Bakiiti. Omwo Ibulayimu mwe yaziikibwa awali Saala mukazi we.

¹¹Ibulayimu bwe yafa, Katonda nʼawa mutabani we Isaaka omukisa, Isaaka nʼabeera e Beerirakayiroyi.

¹²Bano be baana ba Isimayiri mutabani wa Ibulayimu eyazaalibwa Agali Omumisiri, omuweereza wa Saala omuwala.

¹³Gano ge mannya gaabwe nga bwe baddiŋŋanwako: Nebayoosi, omubereberye wa Isimayiri, ne Kedali, ne Adubeeri, ne Mibusamu,

¹⁴ne Misuma, ne Duma, ne Masa,

¹⁵ne Kadadi, ne Teema, ne Yetuli, ne Nafisi ne Kedema.

¹⁶Abo be batabani ba Isimayiri, era ago ge mannya gaabwe, mu byalo ne mu bibuga byabwe mwe baabeeranga, abafuzi kkumi na babiri buli omu nʼeggwanga lye.

¹⁷Isimayiri yafa ngʼawezezza emyaka kikumi mu asatu mu musanvu nʼatwalibwa mu babe.

¹⁸Abantu be baatuula okuviira ddala mu Kavira ne batuuka ku Ssuuli okuliraana Misiri ku luuyi olwa Bwasuli. Ennaku zaabwe zonna baawalananga baganda baabwe.

¹⁹Bano be baana ba Isaaka, mutabani wa Ibulayimu. Ibulayimu yazaala Isaaka.

²⁰Isaaka yalina emyaka amakumi ana, we yawasiza muwala wa Besweri Omusuuli owʼe Padanalaamu, eyayitibwanga Lebbeeka mwannyina wa Labbaani.

²¹Isaaka nʼasaba Mukama ku lwa mukazi we Lebbeeka kubanga yali mugumba, Katonda nʼawulira okusaba kwe, Lebbeeka naaba olubuto.

²²Abaana bombi ne bagulumbira mu lubuto lwe, Lebbeeka nʼagamba nti, “Obanga kiri bwe kityo, lwaki mba omulamu?” Awo nʼagenda ne yeebuuza ku Mukama.

²³ⓘ Mukama nʼamuddamu nti, “Mu lubuto lwo mulimu amawanga abiri, abantu ababiri bʼolizaala balibeera banjawulo, omu alibeera wʼamaanyi okusinga munne, era omukulu yaaliweereza omuto.”

²⁴Ennaku ezʼokuzaala bwe zaatuuka, laba, nʼazaala abalongo nga babulenzi.

²⁵Eyasooka bwe yavaayo nga mumyufu, omubiri gwe gwonna nga gufaanana ngʼekyambalo ekyʼebyoya. Kyebaava bamutuuma Esawu.

²⁶Oluvannyuma ne muganda we nʼazaalibwa, omukono gwe nga gukutte ekisinziiro kya Esawu; kyebaava bamuyita Yakobo. Isaaka yalina emyaka nkaaga Lebbeeka we yazaalira abaana abo.

²⁷Abalenzi ne bakula, Esawu nʼaba muyizzi lukulwe, omuntu owʼoku ttale. Naye ye Yakobo yali musajja musirise ngʼasigala waka.

²⁸Isaaka nʼayagala Esawu kubanga yalyanga ku muyiggo gwe, naye Lebbeeka ye nʼayagala Yakobo.

²⁹Lumu Yakobo yali afumba enva, Esawu nʼajja ngʼava ku ttale; enjala ngʼemuluma nnyo.

³⁰Esawu nʼagamba Yakobo nti, “Mpa mpute ku nva ezo, kubanga enjala ejula kunzita.” Kyeyava ayitibwa Edomu.

³¹Yakobo nʼamuddamu nti, “Sooka onguze obukulu bwo.”

³²Esawu nʼagamba nti, “Laba ndi kumpi nʼokufa, obukulu bungasa ki?”

³³ⓙ Yakobo nʼaddamu nti, “Sooka ondayirire.” Awo Esawu nʼamulayirira, olwo nʼaguza Yakobo obukulu bwe.

³⁴Yakobo nʼalyoka awa Esawu emmere nʼenva, nʼalya nʼanywa, nʼagolokoka nʼagenda. Bwʼatyo Esawu nʼanyooma obukulu bwe.