Olubereberye 27:1-46 LGCB2014 - Bible AI

¹Awo Isaaka bwe yali ngʼakaddiye nnyo nʼamaaso ge nga gayimbadde, nga takyayinza kulaba, nʼayita Esawu mutabani we omukulu, nʼamugamba nti, “Mutabani,” nʼamuddamu nti, “Nze nzuuno.”

²Isaaka nʼamugamba nti, “Laba, nkaddiye, simanyi lwe ndifa.

³Kale kaakano kwata byʼoyizza, omutego gwo nʼobusaale bwo, ogende mu nsiko onjiggire yo omuyiggo.

⁴Onteekereteekere ekyokulya ekiwooma ennyo kye njagala, okindeetere nkirye, ndyoke nkusabire omukisa nga sinnafa.”

⁵Ne Lebbeeka yali awo ngʼawuliriza, Isaaka ngʼagamba mutabani we omukulu Esawu. Awo Esawu bwe yagenda mu nsiko okuyigga omuyiggo aguleete,

⁶Lebbeeka nʼagamba mutabani we Yakobo owookubiri nti, “Mpulidde kitaawo ngʼagamba muganda wo Esawu nti,

⁷‘Ndeetera omuyiggo onteekereteekere ekyokulya ekiwooma obulungi, nkirye, ndyoke nkusabire omukisa eri Mukama nga sinnafa.’

⁸Kale nno kaakano mwana wange wulira kye nkugamba.

⁹Genda eri ekisibo ondeeteremu embuzi bbiri ennungi, nfumbire kitaawo ekyokulya ekiwooma, nga bwʼayagala,

¹⁰okitwalire kitaawo akirye, alyoke akusabire omukisa nga tannafa.”

¹¹Naye Yakobo nʼagamba Lebbeeka nnyina nti, “Muganda wange Esawu musajja wa byoya, so nga nze ndi muweweevu.

¹²Singa kitange anampeeweetako, siifuuke mulimba gyʼali, ne nfuna ekikolimo mu kifo kyʼokufuna omukisa?”

¹³Nnyina nʼamuddamu nti, “Ekikolimo kyo kibe ku nze mwana wange; wulira ekigambo kyange ogende ozindeetere.”

¹⁴Awo Yakobo nʼagenda, nʼazikwata nʼazireeteera nnyina, nʼateekerateekera Isaaka ekyokulya ekiwooma nga bwe yayagala.

¹⁵Lebbeeka nʼaddira ebyambalo ebisinga obulungi ebya Esawu, mutabani we omukulu, ebyali mu nnyumba; nʼabyambaza Yakobo mutabani we omuto,

¹⁶era nʼaddira nʼamaliba gʼembuzi nʼagamwambaza ku mikono ne ku bitundu ebyobulago ebiweweera.

¹⁷Nʼalyoka addira ekyokulya ekiwooma nʼomugaati bye yafumba, nʼabikwasa Yakobo mutabani we.

¹⁸Awo Yakobo nʼagenda eri kitaawe, nʼamugamba nti, “Kitange nzuuno.” Ye nʼamuddamu nti, “Ggwe ani mwana wange?”

¹⁹Yakobo nʼagamba kitaawe nti, “Nze Esawu omwana wo omubereberye, nkoze nga bwʼoŋŋambye. Kale kaakano tuula olye ku muyiggo gwange olyoke onsabire omukisa.”

²⁰Naye Isaaka nʼabuuza mutabani we nti, “Ogufunye otya amangu bwʼotyo?” Nʼamuddamu nti, “Mukama Katonda wo ampadde omukisa.”

²¹Awo Isaaka nʼagamba mutabani we nti, “Sembera wendi mutabani, nkukwateko, ntegeerere ddala nga ggwe mutabani wange Esawu.”

²²Yakobo kwe kusembera awali Isaaka kitaawe. Bwe yamuwulira nʼagamba nti, “Eddoboozi lya Yakobo naye emikono gya Esawu.”

²³Nʼatamutegeera kubanga emikono gye gyaliko obwoya ngʼegya Esawu muganda we, kwe kumuwa omukisa.

²⁴Isaaka nʼamubuuza nti, “Ddala gwe mwana wange Esawu?”

²⁴Nʼamuddamu nti, “Ye nze.”

²⁵Nʼalyoka amugamba nti, “Kale gundeetere, ndye ku muyiggo gwa mutabani wange, nkusabire omukisa.” Nʼalyoka agumuleetera, nʼalya era nʼamuleetera ne wayini nʼanywa.

²⁶Awo kitaawe Isaaka nʼamugamba nti, “Sembera onnywegere mwana wange.”

²⁷Nʼamusemberera nʼamunywegera, kitaawe nʼawulira akaloosa ke ngoye ze nʼamuwa omukisa ngʼagamba nti, “Wulira akaloosa kʼomwana wange, kali ngʼakaloosa kʼennimiro Mukama gyʼawadde omukisa.

²⁸Katonda akuwe omusulo ogwʼomu ggulu, nʼobugimu bwʼensi, era akuwe emmere eyʼempeke nnyingi ne wayini.

²⁹Abantu bakuweerezenga, nʼamawanga gakuvuunamirenga. Fuganga baganda bo, ne batabani ba nnyoko bakuvuunamirenga. Akolimirwe oyo anaakukolimiranga era aweebwenga omukisa oyo anaakusabiranga omukisa.”

³⁰Amangu ddala nga Isaaka yakamala okuwa Yakobo omukisa, era nga Yakobo tannava wali Isaaka kitaabwe, Esawu nʼatuuka ngʼava okuyigga.

³¹Era naye nʼateekateeka emmere eyʼakawoowo nʼagireetera kitaawe. Nʼagamba kitaawe nti, “Kitange golokoka olye ku muyiggo gwʼomwana wo olyoke onsabire omukisa.”

³²Kitaawe Isaaka nʼamubuuza nti, “Gwe ani?” Kwe kumuddamu nti, “Nze omwana wo omubereberye Esawu.”

³³Olwo Isaaka nʼakankana nnyo nʼabuuza nti, “Ani oyo ayizze omuyiggo nʼagundeetera ne ngulya ne ngumalawo nga tonnajja ne mmusabira omukisa? Era ddala ajja kuweebwa omukisa.”

³⁴Awo Esawu bwe yawulira ebigambo bya kitaawe ebyo, nʼatulika nʼakaaba nnyo nnyini, nʼagamba kitaawe nti, “Nange mpa omukisa, ayi kitange.”

³⁵Naye nʼamuddamu nti, “Muganda wo azze nʼannimba era akututteko omukisa gwo.”

³⁶Esawu nʼayogera nti, “Teyatuumibwa linnya lye Yakobo? Laba, anyingiridde emirundi gino gyombi; yanziggyako ebyʼobukulu bwange, ate kaakano antutteko nʼomukisa gwange.” Kwe kubuuza kitaawe nti, “Tondekeddeewo mukisa nʼakatono?”

³⁷Isaaka nʼaddamu Esawu nti, “Laba, mmufudde mukama wo, era mmuwadde baganda be bonna babe baweereza be, era mmusabidde abe nʼemmere eyʼempeke wamu ne wayini nga bingi ddala. Kale nnaakukolera ki mwana wange?”

³⁸ⓚ Esawu nʼabuuza kitaawe nti, “Tolinaawo mukisa na gumu kitange? Nange mpa omukisa, ayi kitange.” Bwʼatyo Esawu nʼayimusa eddoboozi lye nʼakaaba.

³⁹ⓛ Awo Isaaka kitaawe nʼamuddamu nti, “Laba, onooberanga mu nsi enkalu, era toofunenga musulo guva waggulu mu ggulu.

⁴⁰ⓜ Ekitala kyo kye kinaakukuumanga, era onooweerezanga muganda wo. Naye bwʼolimwesimattulako, oliba weefunidde eddembe.”

⁴¹Awo Esawu nʼakyawa muganda we Yakobo ngʼamulanga omukisa kitaabwe gwe yamuwa. Esawu nʼalyoka ayogera nti, “Ennaku ezʼokukungubagira kitange zinaatera okutuuka. Bwe zirituuka, muganda wange Yakobo nga mutta.”

⁴²Kyokka Lebbeeka nʼatuusibwako ebigambo bya Esawu mutabani we omukulu; kwe kutumya Yakobo mutabani we omuto, nʼamugamba nti, “Laba, Esawu muganda wo ateekateeka okukutta.

⁴³Kale nno kaakano mwana wange, okole nga bwe nkugamba: Golokoka oddukire ewa, mwannyinaze Labbaani ali mu Kalani,

⁴⁴obeereko eyo, okutuusa obusungu bwa muganda wo nga bukkakkanye.

⁴⁵Obusungu bwe buliba bumuweddeko, nga yeerabidde kyʼomukoze, ne ndyoka ntuma ne bakunona. Kale lwaki mbafiirwa mwembi ku lunaku olumu?”

⁴⁶Lebbeeka nʼalyoka ategeeza Isaaka nti, “Obulamu bwange bwetamiddwa olwʼabakazi bano Abakiiti. Singa Yakobo awasa omu ku bakazi Abakiiti, nga bano, omu ku bakazi aba muno, obulamu bwange buliba tebukyangasa.”