Olubereberye 28:1-22 LGCB2014 - Bible AI

¹Awo Isaaka nʼayita Yakobo nʼamuwa omukisa, nʼamukuutira nti, “Towasanga, wadde omu ku bakazi Abakanani.

²Golokoka ogende e Padanalaamu mu nnyumba ya Besweri kitaawe wa nnyoko, ofune omukazi omu ku bawala ba Labbaani mwannyina nnyoko.

³Katonda Ayinzabyonna akuwe omukisa, akwaze, weeyongere, era obeerenga nʼabantu abʼenjawulo bangi.

⁴Akuwe emikisa gya Ibulayimu, era agiwe nʼezzadde lyo, olyoke ofune ensi mwʼotambulira, Katonda gye yawa Ibulayimu.”

⁵Bwʼatyo Isaaka nʼasiibula Yakobo, Yakobo nʼagenda e Padanalaamu ewa Labbaani, mutabani wa Besweri Omusuuli mwannyina Lebbeeka, nnyina wa Esawu ne Yakobo.

⁶Esawu nʼategeera nga Isaaka awadde Yakobo omukisa, era ngʼamusindise e Padanalaamu afuneyo omukazi, era nga bwe yamuwa omukisa yamukuutira nti, “Towasanga ku bakazi Abakanani,”

⁷era nga Yakobo agondedde kitaawe ne nnyina nʼagenda e Padanalaamu.

⁸Awo nʼategeera nti abakazi Abakanani tebaasanyusa kitaawe Isaaka.

⁹Esawu nʼagenda eri Isimayiri nʼawasa omukazi erinnya lye Makalasi, muwala wa Isimayiri, mutabani wa Ibulayimu, mwannyina wa Nebayoosi, nʼamwongera ku bakazi be yalina.

¹⁰Awo Yakobo nʼava e Beeruseba nʼayolekera Kalani. Nʼatuuka mu kifo ekimu, nʼasula awo ekiro ekyo, kubanga obudde bwali buzibye.

¹¹Nʼaddira erimu ku mayinja agaali mu kifo ekyo, nʼalyezizika ne yeebaka.

¹²ⓝ Nʼaloota ngʼalaba eddaala eggwanvu nga liva ku nsi okutuuka mu ggulu, era nga bamalayika ba Katonda balikkirako era nga balinnyirako,

¹³era nga Mukama atudde waggulu waalyo. Mukama nʼagamba Yakobo nti, “Nze Mukama Katonda wa Ibulayimu jjajjaawo, era Katonda wa Isaaka; ensi kwʼogalamidde ndigikuwa ggwe nʼezzadde lyo.

¹⁴Era ezzadde lyo liriba ngʼenfuufu yʼoku nsi, era olibuna obugwanjuba nʼobuvanjuba era nʼobukiikakkono nʼobukiikaddyo. Mu ggwe ne mu zadde lyo amawanga gonna agʼoku nsi mwe galiweerwa omukisa.

¹⁵Laba ndi wamu naawe, era nnaakukuumanga buli gyʼonoogendanga yonna, era ndikukomyawo mu nsi eno, kubanga sirikuleka okutuusa nga mmaze okukola ekyo kye nkugambye.”

¹⁶Awo Yakobo nʼava mu tulo nʼagamba nti, “Mazima ddala Mukama ali mu kifo kino, nze mbadde ssimanyi.”

¹⁷Nʼatya nnyo, nʼagamba nti, “Ekifo kino nga kyantiisa! Ekifo kino ye nnyumba ya Katonda, era guno gwe mulyango gwʼeggulu.”

¹⁸Awo Yakobo nʼagolokoka ku makya, nʼaddira ejjinja lye yali yeezizise nʼalisimba okuba empagi nʼayiwa amafuta ku mutwe gwa lyo.

¹⁹Ekifo ekyo nʼakituuma Beseri, songa ekibuga ekyo kyayitibwanga Luzi.

²⁰Awo Yakobo ne yeerayirira ngʼagamba nti, “Katonda bwʼalibeera nange, nʼankuuma mu lugendo luno lwe ndiko, nʼampa emmere okulya era nʼebyokwambala ne nkomawo mirembe mu nnyumba ya kitange,

²¹olwo Mukama nʼaba Katonda wange.

²²Era ejjinja lino lye nsimbye okuba empagi liriba nnyumba ya Katonda, era nʼebyo byonna byʼompa ndikuwaako ekimu ekyʼekkumi.”