Olubereberye 29:1-35 LGCB2014 - Bible AI

¹Awo Yakobo ne yeeyongerayo mu lugendo lwe, nʼatuuka mu nsi yʼabantu bʼebuvanjuba.

²Bwe yatunula nʼalaba oluzzi mu nnimiro, ngʼebisibo bisatu ebyʼendiga zigalamidde awo ku lwo, kubanga awo we zaanywesezebwanga. Ejjinja eryasaanikiranga ku mumwa gwʼoluzzi olwo lyali ddene,

³era ebisibo bwe byakuŋŋaananga, abasumba ne balyoka baliyiringisa okuliggya ku mumwa gwʼoluzzi ne banywesa endiga; bwe zaamalanga ne balizzaako.

⁴Awo Yakobo nʼabuuza abasumba nti, “Abooluganda muva wa?” Ne bamuddamu nti, “Tuva Kalani.”

⁵Kwe kubabuuza nti, “Labbaani mutabani wa Nakoli mumumanyi?” Ne bamuddamu nti, “Tumumanyi.”

⁶Nʼabuuza nti, “Ali bulungi?” Ne baddamu nti, “Ali bulungi, era laba Laakeeri muwala we wuuli ajja nʼendiga!”

⁷Nʼabagamba nti, “Mulabe, obudde bukyali bwa ttuntu, ekiseera tekinnatuuka okukuŋŋaanya ensolo awamu, muzinywese mulyoke mugende muzirunde.”

⁸Bo kwe kumuddamu nti, “Ekyo tetusobola kukikola ngʼebisibo byonna tebinnakuŋŋaanyizibwa, nga nʼejjinja terinaggyibwa ku mumwa gwʼoluzzi, olwo ne tunywesa endiga.”

⁹Yakobo bwe yali akyayogera nabo, Laakeeri nʼatuuka nʼendiga za kitaawe. Kubanga ye yali azirunda.

¹⁰Yakobo bwe yalaba Laakeeri, muwala wa Labbaani, mwannyina nnyina, nʼendiga za Labbaani, nʼagenda nʼayiringisa ejjinja okuva ku mumwa gwʼoluzzi nʼanywesa endiga za Labbaani.

¹¹Yakobo nʼalyoka agwa Laakeeri mu kifuba, nʼayimusa eddoboozi nʼakaaba.

¹²Yakobo nʼalyoka ategeeza Laakeeri nti, waluganda ne kitaawe, era ye mutabani wa Lebbeeka. Laakeeri kwe kudduka nʼategeeza kitaawe.

¹³Awo Labbaani bwe yawulira ebya Yakobo, mutabani wa mwannyina, nʼadduka okumusisinkana, nʼamugwa mu kifuba nʼamulamusa bulungi, nʼamutwala mu nnyumba ye. Yakobo nʼategeeza Labbaani byonna ebyaliwo.

¹⁴Labbaani nʼagamba nti, “Mazima oli ggumba lyange, era nnyama ya mubiri gwange! Nʼabeera naye omwezi mulamba.”

¹⁵Awo Labbaani nʼagamba Yakobo nti, “Olwʼokubanga oli waluganda kyʼonoova ompeerereza obwereere? Ntegeeza empeera yo bwʼeneebanga.”

¹⁶Labbaani yalina bawala be babiri; erinnya lyʼomukulu nga ye Leeya ne lyʼomuto nga ye Laakeeri.

¹⁷Leeya yali manafu, kyokka ye Laakeeri nga mulungi era nga wʼamaanyi.

¹⁸Yakobo yayagala Laakeeri, era nʼagamba Labbaani nti, “Nzija kukuweereza[21] emyaka musanvu olwa muwala wo omuto Laakeeri.”

¹⁹Labbaani kwe kumuddamu nti, “Kituufu okumuwa ggwe ne ssimuwa musajja mulala yenna. Beera nange.”

²⁰Bwʼatyo Yakobo nʼakolerera Laakeeri emyaka musanvu, naye ne giba ngʼennaku obunaku gyʼali kubanga yamwagala nnyo.

²¹Awo Yakobo nʼagamba Labbaani nti, “Kale mpa mukazi wange, mmutwale, kubanga ekiseera kye twalagaana nkimazeeko.”

²²Labbaani kwe kukuŋŋaanya abantu bʼekifo ekyo, nʼakola embaga.

²³Naye mu kiro Labbaani nʼatwala muwala we Leeya nʼamuwa Yakobo okumutwala okuba mukazi we.[22]

²⁴Labbaani yali awadde Leeya Zirupa amuweerezenga.

²⁵Bwe bwakya, Yakobo nʼalaba nga bamuwadde Leeya. Kwe kugamba Labbaani nti, “Onkoze ki kino? Saakuweereza lwa Laakeeri? Kale lwaki onimbye?”

²⁶Labbaani nʼamuddamu nti, “Mu nsi yaffe tekiri mu buwangwa bwaffe, omuto okusooka omukulu okufumbirwa.

²⁷Sooka omale nʼono wiiki eno emu, nʼoli tugenda kumukuwa; kyokka olimukolerera okumala emyaka emirala musanvu.”

²⁸Ekyo Yakobo nʼakikkiriza, nʼamalako wiiki emu eyo, Labbaani nʼalyoka amuwa Laakeeri muwala we okuba mukazi we.

²⁹Labbaani nʼawa Laakeeri Biira amuweerezenga.

³⁰Yakobo nʼatwala Laakeeri nʼaba mukazi we; nʼayagala Laakeeri okusinga Leeya, nʼaweereza Labbaani emyaka egyo emirala omusanvu.

³¹Mukama bwe yalaba nga Leeya akyayibbwa nʼaggula olubuto lwe. Laakeeri ye yali mugumba.

³²Leeya nʼaba olubuto, nʼazaala omwana wabulenzi. Nʼamutuuma erinnya Lewubeeni, ngʼagamba nti, “Kubanga Mukama alabye okubonyaabonyezebwa kwange: ddala baze ananjagala.”

³³Nʼaba olubuto olulala, nʼazaala omwana mulenzi, nʼagamba nti, “Kubanga Mukama alabye nga ndi mukyawe, kyavudde ampa omwana owoobulenzi omulala; nʼamutuuma erinnya Simyoni.”

³⁴Ate nʼaba olubuto nʼazaala omwana mulenzi, nʼagamba nti, “Kale kaakano baze ajja kuba bumu nange, kubanga mmuzaalidde abaana abalenzi basatu.” Omwana kyeyava atuumwa Leevi.

³⁵Era Leeya nʼaba olubuto nʼazaala omwana wabulenzi, nʼagamba nti, “Ku luno nzija kutendereza Mukama,” kyeyava amutuuma Yuda; nʼalekayo okuzaala.