Olubereberye 3:1-24 LGCB2014 - Bible AI

¹Kale nno omusota gwali mukalabakalaba okukira ensolo zonna ezʼomu nsiko, Mukama Katonda ze yatonda. Ne gugamba omukazi nti, “Kazzi Katonda yagamba nti ‘Temulyanga ku muti gwonna ogwʼomu nnimiro!’”

²Omukazi nʼaddamu omusota nti, “Tulya ku buli muti ogwʼomu nnimiro,

³kyokka Katonda yatulagira nti, ‘Temulyanga ku kibala kyʼomuti oguli wakati mu nnimiro, wadde okugukwatako, muleme okufa.’ ”

⁴ⓤ Naye omusota ne gugamba omukazi nti, “Temugenda kufa.

⁵ⓥ Kubanga Katonda amanyi nga lwe muligulyako amaaso gammwe lwe galizibuka, era mulifaanana nga ye, okumanyanga ekirungi nʼekibi.”

⁶Awo omukazi bwe yalaba ngʼomuti mulungi nga gusanyusa okutunulako era gwegombebwa okuleeta amagezi, nʼanoga ekibala kyagwo nʼalya; nʼawaako ne bba naye nʼalya.

⁷Awo amaaso gaabwe bombi ne gazibuka, ne bategeera nga baali bwereere; ne baluka amalagala gʼemiti ne beekolera ebyokwambala.

⁸ⓦ Awo ne bawulira eddoboozi lya Mukama Katonda ngʼatambula mu nnimiro, mu budde obuweeweevu. Omusajja nʼomukazi ne beekweka mu miti Mukama Katonda aleme okubalaba.

⁹Naye Mukama Katonda nʼayita omusajja nti, “Oli ludda wa?”

¹⁰Nʼaddamu nti, “Mpulidde eddoboozi lyo mu nnimiro, ne ntya, kubanga mbadde bwereere; ne nneekweka.”

¹¹Nʼamubuuza nti, “Ani akubuulidde nti Oli bwereere? Olidde ku muti gwe nakulagira obutagulyangako?”

¹²Omusajja nʼaddamu nti, “Omukazi gwe wampa okubeeranga nange yʼampadde ekibala ne ndya.”

¹³ⓧ Mukama Katonda kwe kubuuza omukazi nti, “Kiki kino kyʼokoze?” Omukazi nʼaddamu nti, “Omusota gwe gunsenzesenze ne ndya.”

¹⁴ⓨ Mukama Katonda nʼagamba omusota nti, Kubanga okoze kino okolimiddwa okukira ensolo zonna ezʼawaka nʼezʼomu nsiko, oneekululiranga ku lubuto lwo era onoolyanga nfuufu ennaku zonna ezʼobulamu bwo.

¹⁵ⓩ Nteeka obulabe wakati wo nʼomukazi, ne wakati wʼezzadde lyo nʼezzadde lyʼomukazi; ezzadde lye linaakubetentanga omutwe, naawe onoolibojjanga ekisinziiro.

¹⁶ⓐ Nʼagamba omukazi nti, “Nnaayongeranga nnyo ku bulumi bwo ngʼoli lubuto, onoozaaliranga mu bulumi; musajja wo anaakukoleranga bye weetaaga kyokka anaakufuganga.”

¹⁷Nʼagamba Adamu nti, “Kubanga owulidde eddoboozi lya mukazi wo, nʼolya ku muti gwe nakulagira obutagulyangako; ensi ekolimiddwa ku lulwo: mu ntuuyo zo mwʼonoofuniranga ekyokulya ennaku zonna ezʼobulamu bwo.

¹⁸ⓑ Ensi eneekumerezanga amaggwa nʼamatovu, onoolyanga ebibala ebyʼomu nnimiro.

¹⁹Mu ntuuyo zo mwʼonoggyanga ekyokulya, okutuusa lwʼolidda mu ttaka mwe wava, kubanga oli nfuufu ne mu nfuufu mwʼolidda.”

²⁰Omusajja nʼatuuma omukazi erinnya Kaawa, oyo ye nnyina wʼabalamu bonna.

²¹Mukama Katonda nʼakolera Adamu ne mukazi we ebyambalo ebyʼamaliba nʼabambaza.

²²Awo Mukama Katonda nʼagamba nti, “Laba omuntu afuuse ngʼomu ku ffe okumanyanga ekirungi nʼekibi; kale kaakano talwa kugolola mukono gwe nʼanoga ku muti ogwʼobulamu nʼalya, nʼawangaala emirembe gyonna.”

²³Bwʼatyo Mukama Katonda nʼagoba omuntu mu nnimiro Adeni agende alimenga ettaka mwe yaggyibwa.

²⁴Bwe yamala okugobamu omuntu, nʼateekamu Bakerubi nʼekitala ekimyansa ekyʼobwogi ku buli ludda okukuuma ekkubo erigenda ku muti ogwʼobulamu.