Olubereberye 32:1-32 LGCB2014 - Bible AI

¹Awo Yakobo nʼakwata ekkubo lye, bamalayika ba Katonda ne bamusisinkana.

²Yakobo bwe yabalaba nʼagamba nti, “Lino ggye lya Katonda.” Ekifo ekyo nʼalyoka akituuma Makanayimu.

³Awo Yakobo nʼatuma ababaka eri Esawu muganda we, mu kitundu kya Seyiri[27] mu nsi ya Edomu.

⁴Nʼabagamba nti, “Mugambe mukama wange Esawu nti, ‘Omuddu wo Yakobo abadde ne Labbaani okutuusa kaakano,

⁵alina ente, nʼendogoyi, nʼendiga era nʼembuzi, abaweereza abakazi era nʼabasajja. Kaakano aweerezza mukama we Esawu obubaka buno afune okusaasirwa mu maaso ge.’ ”

⁶Ababaka bwe baakomawo eri Yakobo ne bamugamba nti, “Twatuuka ewa muganda wo Esawu era ajja okukusisinkana ngʼalina abasajja ebikumi bina.”

⁷Olwo Yakobo nʼatandika okutiira ddala, nʼasoberwa. Nʼayawulamu abantu be yali nabo, nʼayawulamu nʼendiga, ebisibo bye yalina ne mu ŋŋamira, ebibinja bibiri,

⁸ngʼalowooza nti, “Esawu bwʼanaatuuka ku kibinja ekisooka nʼakizikiriza, kale ekibinja ekisigaddewo kinadduka.”

⁹Awo Yakobo nʼagamba nti, “Ayi Katonda wa jjajjange Ibulayimu, era Katonda wa kitange Isaaka, Ayi Mukama eyaŋŋamba nti, ‘Ddayo mu nsi yammwe, mu bantu bo, nange nnaakugaggawazanga,’

¹⁰sisaanira wadde akatundu akatono akʼokwagala kwo okutaggwaawo, wadde obwesigwa bwonna bwʼolaze omuddu wo. Kubanga nasomoka omugga guno Yoludaani nga nnina muggobuggo; naye kaakano nfuuse ebibinja bibiri.

¹¹Nkusaba omponye mu mukono gwa muganda wange, Esawu, kubanga mmutya, talwa kujja nʼatutta ffenna awamu nʼabakazi nʼabaana.

¹²Naye waŋŋamba nti, ‘Nnaakugaggawazanga, era abalikuvaamu baliba ngʼomusenyu gwʼennyanja, ogutabalika obungi bwabwe.’ ”

¹³Nʼalyoka asula eyo ekiro ekyo, nʼaggya ekirabo kya muganda we Esawu ku ebyo bye yalina:

¹⁴embuzi enkazi ebikumi bibiri, embuzi ennume amakumi abiri, endiga enkazi ebikumi bibiri, endiga ennume amakumi abiri,

¹⁵eŋŋamira enkazi amakumi asatu nʼobwana bwazo, ente enkazi amakumi ana nʼennume kkumi, nʼendogoyi enkazi amakumi abiri, nʼendogoyi ennume kkumi.

¹⁶Nʼazikwasa abaddu be, buli kisibo ngʼakyawudde, nʼagamba abaddu be nti, “Kale munkulemberemu, mulekeewo ebbanga wakati wa buli kisibo.”

¹⁷Nʼalagira eyakulembera nti, “Esawu, muganda wange bwʼanaakusisinkana nʼakubuuza nti, ‘Oli muntu wʼani? Ogenda wa? Na bino byʼolina byʼani?’

¹⁸Nʼolyoka omuddamu nti, ‘Bya muddu wo Yakobo, birabo byʼaweerezza mukama wange Esawu, era tali wala naffe.’ ”

¹⁹Bwʼatyo era nʼalagira nʼowokubiri nʼowookusatu ne bonna abaagobereranga ebisibo nti, “Nammwe mwogere ebigambo bye bimu bwe musisinkana Esawu,

²⁰era mugambe nti, ‘Omuddu wo Yakobo tali wala naffe.’ ” Kubanga Yakobo yalowooza nti, “Nnaamuwooyawooya nʼekirabo ekinkulembedde, nʼoluvannyuma nnaalaba amaaso ge, osanga tankole kabi.”

²¹Ekirabo kyekyava kimukulemberamu, ye nʼasula mu kifo we yali ekiro ekyo.

²²Mu kiro ekyo Yakobo nʼagolokoka nʼatwala bakazi be bombi, nʼabaweereza be abakazi ababiri, nʼabaana be ekkumi nʼomu nʼasomokera e Yaboki.

²³Nʼabatwala ne byonna bye yalina nʼabasomosa omugga.

²⁴ⓞ Ye Yakobo nʼasigala yekka, omusajja nʼameggana naye okutuusa obudde okukya.

²⁵Omusajja bwe yalaba nga taasobole Yakobo, nʼakoma ku kinywa kyʼekisambi kye. Yakobo nʼatandika okuwenyera nga bwʼameggana nʼomusajja.

²⁶Omusajja nʼalyoka agamba Yakobo nti, “Ndeka ŋŋende kubanga obudde bugenda kukya.”

²⁶Naye Yakobo nʼayogera nti, “Sijja kukuta nga tompadde mukisa.”

²⁷Omusajja nʼamubuuza nti, “Erinnya lyo gwʼani?” Nʼamuddamu nti, “Yakobo.”

²⁸Awo nʼamugamba nti, “Tokyaddayo kuyitibwa Yakobo. Wabula onooyitibwanga Isirayiri, kubanga omegganye ne Katonda, awamu nʼabantu nʼowangula.”

²⁹ⓟ Awo ne Yakobo nʼamugamba nti, “Mbuulira erinnya lyo.” Naye ye nʼamuddamu nti, “Lwaki ombuuza erinnya lyange?” Awo nʼamuwa omukisa.

³⁰Yakobo ekifo ekyo kyeyava akiyita Penieri, ngʼagamba nti, “Kubanga ndabaganye ne Katonda, kyokka obulamu bwange ne busigalawo.”

³¹Enjuba nʼevaayo ne mwakako nga bwʼasala Penieri, ngʼawenyera olwʼobuvune mu kisambi kye.

³²Abayisirayiri kyebava batalya kinywa kyʼekisambi na buli kati, kubanga ekyo omusajja wa Katonda kye yakomako.