Olubereberye 33:1-20 LGCB2014 - Bible AI

¹Awo Yakobo nʼayimusa amaaso ge nʼalaba Esawu ngʼajja ngʼali nʼabasajja ebikumi bina. Yakobo nʼalyoka ayawulamu abaana abaali ne Leeya ne Laakeeri awamu nʼabaweereza be abakazi ababiri.

²Abaweereza nʼabaana baabwe ne bakulembera, Leeya nʼabaana be ne baddako, Laakeeri ne Yusufu ne basembayo.

³Ye Yakobo ngʼabakulembedde, nga bwʼavuunama ku ttaka emirundi musanvu, okutuusa lwe yatuuka okumpi ne muganda we.

⁴Naye Esawu nʼadduka okumusisinkana, nʼamulamusa ngʼamugwa mu kifuba nʼamunywegera; bombi ne bakaaba.

⁵Esawu bwe yayimusa amaaso ge nʼalaba abakazi nʼabaana, nʼabuuza Yakobo nti, “Bano baani abali naawe?” Yakobo nʼamuddamu nti, “Be baana Katonda baawadde omuddu wo mu kisa kye.”

⁶Awo abaweereza be abakazi nʼabaana baabwe ne basembera, ne bavuunama, mu ngeri yʼemu.

⁷Leeya nʼabaana be nabo ne basembera ne bavuunama. Oluvannyuma Yusufu ne Laakeeri ne basembera nabo ne bavuunama.

⁸Esawu nʼabuuza Yakobo nti, “Otegeezaaki olwa bino byonna bye nsanze?” Yakobo nʼaddamu nti, “Lwa kufuna kusaasirwa kwa mukama wange.”

⁹Naye ye Esawu nʼamugamba nti, “Bye nnina bimmala, muganda wange, byʼolina beera nabyo.”

¹⁰Yakobo nʼamuddamu nti, “Nedda nkwegayiridde, obanga nfunye okusaasirwa mu maaso go, kale kkiriza ekirabo kyange ekivudde mu ngalo zange. Kubanga ddala okulaba ku maaso go kiri ngʼokulaba amaaso ga Katonda, olwʼekisa ekyo kyʼonnyaniririzzaamu.

¹¹Nkwegayiridde kkiriza ekirabo kyange ekikuleeteddwa, kubanga Katonda andaze ekisa kye, era siri mu bwetaavu.” Bwʼatyo Esawu nʼakikkiriza.

¹²Awo Esawu nʼagamba nti, “Kale tutambule, nze nzija okukukulemberamu.”

¹³Naye Yakobo nʼamuddamu nti, “Mukama wange amanyi nti Abaana banafu, era nʼebisibo biyonsa, era singa bitambuzibwa awatali busaasizi bijja kufa.

¹⁴Mukama wange kʼaleke omuddu we, nze nzija kujja mpola, okusinziira ku ntambula yʼebisolo ebikulembedde, era ne ku ntambula yʼabaana, okutuusa lwe ndituuka mu Seyiri.”

¹⁵Awo Esawu nʼagamba Yakobo nti, “Kale ka ndeke abamu ku basajja abali nange.” Naye Yakobo nʼamuddamu nti, “Tekyetaagisa. Kale nsaba ekisa mu maaso ga mukama wange.”

¹⁶Bwʼatyo Esawu nʼaddayo ku lunaku olwo mu Seyiri.

¹⁷Naye Yakobo nʼalaga mu Sukkosi, ne yeezimbira ennyumba, nʼazimbira ne nsolo ebisiisira; ekifo ekyo kyekiva kiyitibwa Sukkosi.

¹⁸Era Yakobo nʼatuuka mirembe mu kibuga Sekemu, mu nsi ya Kanani, ngʼava e Padanalaamu, nʼasiisira okwolekera ekibuga.

¹⁹ⓠ Abaana ba Kamoli kitaawe wa Sekemu ne bamuguza ekitundu mwe yasiisira, nʼabasasula ebitundu bya ffeeza kikumi.

²⁰Nʼazimbira eyo ekyoto nʼakiyita Ekyoto kya Katonda wa Isirayiri.