Olubereberye 35:1-29 LGCB2014 - Bible AI

¹Katonda nʼagamba Yakobo nti, “Golokoka oyambuke e Beseri, obeere eyo, ozimbire Katonda ekyoto, eyakulabikira bwe wadduka muganda wo Esawu.”

²Awo Yakobo nʼagamba abʼomu nnyumba ye ne bonna abaali naye nti, “Muggyeewo bakatonda abalala abali nammwe, mwetukuze mukyuse ebyambalo byammwe,

³tulyoke twambuke tugende e Beseri ndyoke nzimbire Katonda ekyoto, Katonda eyanziramu mu nnaku ezʼokunakuwala kwange, era abadde nange buli gye ŋŋenze.

⁴Awo ne bawa Yakobo bakatonda abalala bonna be baalina, nʼempeta ezaali ku matu gaabwe;[29] Yakobo nʼabiziika wansi wʼomuvule ogwali okumpi ne Sekemu.”

⁵Bwe baali batambula, entiisa ya Katonda nʼegwa ku bibuga ebyali bibeetoolodde, ne batagoberera baana ba Yakobo.

⁶Yakobo nʼajja e Luzi, ye Beseri, ekiri mu nsi ya Kanani, ye nʼabantu bonna abaali naye.

⁷Nʼazimba eyo ekyoto, nʼakituuma Erubeeseeri. Kubanga eyo Katonda gye yamweragira bwe yadduka muganda we.

⁸Debola omujjanjabi wa Lebbeeka nʼafa nʼaziikibwa wansi wʼomuvule, wansi wa Beseri kyekyava kiyitibwa Alooninakusi.

⁹Yakobo bwe yava mu Padanalaamu Katonda nʼamulabikira, nʼamuwa omukisa.

¹⁰Katonda nʼamugamba nti, “Erinnya lyo ggwe Yakobo; tokyaddayo kuyitibwa Yakobo, erinnya lyo linaabanga Isirayiri.” Bwe kityo erinnya lye ne liba Isirayiri.

¹¹Katonda nʼamugamba nti, “Ndi Katonda Ayinzabyonna: zaala oyale, eggwanga ne nkuyanja yʼamawanga biriva mu ggwe, ne bakabaka balisibuka mu ggwe.

¹²Ensi gye nawa Ibulayimu ne Isaaka, ndigikuwa ggwe, era ndigiwa nʼezzadde lyo eririddawo.”

¹³Awo Katonda nʼalinnya okuva waali mu kifo we yayogerera naye.

¹⁴Yakobo nʼasimba empagi mu kifo Katonda mwe yayogerera naye, empagi eyʼejjinja; nʼagiyiwako ekiweebwayo ekyokunywa, nʼayiwako nʼamafuta.

¹⁵Yakobo ekifo Katonda we yayogerera naye nʼakiyita Beseri.

¹⁶Bwe baava e Beseri, era nga bakyali walako okuva Efulasi, Laakeeri nʼalumwa, nʼalumwa ddala nnyo.

¹⁷Bwe yali ngʼalumwa bwʼatyo omuzaalisa nʼamugamba nti, “Totya kubanga kaakano onoofuna omwana omulala owoobulenzi.”

¹⁸Omwoyo bwe gwali gumuggwaamu ngʼafa, nʼamutuuma Benoni, naye kitaawe nʼamuyita Benyamini.

¹⁹Awo Laakeeri nʼafa nʼaziikibwa ku kkubo erigenda Efulasi (ye Besirekemu).

²⁰Yakobo nʼasimba empagi ku malaalo ge, yʼempagi yʼamalaalo ga Laakeeri, ekyaliwo nʼokutuusa kaakano.

²¹Isirayiri ne yeeyongera okutambula, nʼakuba eweema ye, emabega wʼomunaala gwa Ederi.

²²Isirayiri bwe yali ngʼali mu nsi omwo Lewubeeni nʼagenda ne yeebaka ne Biira omuweereza wa kitaawe, Isirayiri nʼakiwulira.

²²Batabani ba Yakobo baali kkumi nʼababiri.

²³Batabani ba Leeya baali: Lewubeeni mutabani wa Yakobo omubereberye, ne Simyoni, ne Leevi, ne Yuda, ne Isakaali ne Zebbulooni.

²⁴Batabani ba Laakeeri ye:

²⁴Yusufu ne Benyamini.

²⁵Batabani ba Biira, omuweereza wa Laakeeri be ba:

²⁵Ddaani ne Nafutaali,

²⁶Batabani ba Zirupa omuweereza wa Leeya be ba: Bano be batabani ba Yakobo abaamuzaalirwa mu Padanalaamu.

²⁶Gaadi ne Aseri.

²⁷Awo Yakobo nʼajja eri kitaawe Isaaka e Mamule, oba Kiriyasaluba, ye Kebbulooni, Ibulayimu ne Isaaka mwe baatuulanga.

²⁸Isaaka yawangaala emyaka kikumi mu kinaana.

²⁹Isaaka nʼafa ngʼakaddiye nnyo nʼagenda abantu be gye bagenda, ngʼamaze ennaku nnyingi, batabani be Esawu ne Yakobo ne bamuziika.