Olubereberye 37:1-36 LGCB2014 - Bible AI

¹Yakobo yabeeranga mu Kanani, ensi bajjajjaabe mwe baatambuliratambuliranga.

²Era bino bye bikwata ku nda ya Yakobo: Yusufu bwe yali nga wa myaka kkumi na musanvu ngʼali ne baganda be batabani ba Biira ne Zirifa, nga balunda ekisibo kyʼendiga, Yusufu nʼategeezanga Yakobo kitaabwe ebintu ebibi bye baakolanga.

³Bwʼatyo Isirayiri nʼayagala nnyo Yusufu okusinga abaana be abalala, kubanga nga ye mwana owʼomu bukadde bwe; nʼamutungira ekyambalo ekyʼamabala amangi.

⁴Naye baganda ba Yusufu bwe baalaba nga kitaabwe amwagala okusinga bo ne bakyawa Yusufu, ne batayinza na kwogera naye na kisa.

⁵Lumu Yusufu nʼaloota ekirooto, nʼagenda nʼakitegeeza baganda be, ne beeyongera nnyo okumukyawa.

⁶Yabagamba nti, “Muwulire ekirooto kino kye naloose.

⁷Twali tusiba ebinywa byʼeŋŋaano nga tuli mu nnimiro, ekinywa kyange ne kiyimuka ne kiyimirira; laba ebinywa byammwe ne bikyebungulula ne bikivuunamira.”

⁸Baganda be ne bamugamba nti, “Olowooza olitufuga? Olowooleza ddala nti tulibeera baddu bo?” Olwo ne beeyongera nnyo okumukyayira ddala olwʼekirooto kye nʼebigambo bye.

⁹Ate nʼaloota ekirooto ekirala nʼakitegeeza baganda be, nʼagamba nti, “Ndoose ekirooto ekirala: ne ndaba enjuba nʼomwezi nʼemmunyeenye ekkumi nʼemu nga binvuunamira.”

¹⁰Naye bwe yakitegeeza kitaawe ngʼali wamu ne baganda be, kitaawe nʼamunenya ngʼagamba nti, “Kirooto ki kino kyʼoloose? Ddala nze ne nnyoko awamu ne baganda bo tulijja ne tuvuunama mu maaso go?”

¹¹ⓡ Baganda be ne bamukwatirwa obuggya, kyokka ye kitaabwe nʼakuuma ekigambo ekyo mu mutima gwe.

¹²Awo baganda ba Yusufu ne bagenda okumpi ne Sekemu okulunda ekisibo kya kitaabwe.

¹³Isirayiri nʼalyoka agamba Yusufu nti, “Nga baganda bo bwe balundira e Sekemu, jjangu nkutume gye bali.” Yusufu nʼamuddamu nti, “Nzuuno ntuma.”

¹⁴Nʼalyoka amugamba nti, “Genda kaakano olabe obanga baganda bo nʼekisibo bali bulungi, okomewo ontegeeze.” Awo nʼamutuma okuva mu kiwonvu kya Kebbulooni, nʼatuuka e Sekemu.

¹⁵Awo omusajja nʼamulaba ngʼatangatangira ku ttale, nʼamubuuza nti, “Onoonya ki?”

¹⁶Nʼamuddamu nti, “Noonya baganda bange, nkwegayiridde mbuulira gye balundira ekisibo.”

¹⁷Omusajja nʼamuddamu nti, “Beeyongerayo, kubanga nabawulira nga bagamba nti, ‘Ka tugende e Dosani.’ ” Awo Yusufu nʼagoberera baganda be nʼabasanga e Dosani.

¹⁸Baganda be ne bamulengera ngʼakyali wala, era bwe yali nga tannabasemberera ne bateesa bamutte.

¹⁹Ne bagambagana nti, “Sekalootera wuuyo ajja.

²⁰Kale mujje tumutte, tumusuule mu kimu ku binnya;[30] tuligamba nti, ‘Ensolo enkambwe ye ya mulya; tulabe ebirooto bye bwe birituukirira.’ ”

²¹Naye Lewubeeni bwe yakiwulira nʼagezaako okumuwonya mu mikono gyabwe nʼagamba nti, “Tetumutta.

²²Tuleme kuyiwa musaayi; ka tumusuule mu bunnya buno wano mu nsiko. Temumuteekako mukono gwammwe.” Yayogera bwʼatyo alyoke amuwonye mu mikono gyabwe, amuddize kitaawe.

²³Awo Yusufu bwe yatuuka ku baganda be ne bamwambulamu ekyambalo kye ekyʼamabala amangi kye yali ayambadde:

²⁴ne bamutwala ne bamusuula mu bunnya obwali obukalu nga tebuliimu mazzi.

²⁵Awo bwe baatuula okulya, ne bayimusa amaaso ne balengera ekibiina kyʼAbayisimayiri nga bava e Gireyaadi, ngʼeŋŋamira zaabwe zeettise ebyakaloosa, nʼenvumbo ne mooli nga bali mu lugendo babitwala e Misiri.

²⁶Yuda kwe kugamba baganda be nti, “Kitugasa ki okutta muganda waffe nʼokuyiwa omusaayi gwe?

²⁷Tumuguze Abayisimayiri. Omukono gwaffe guleme okumubaako, kubanga muganda waffe, omubiri gwaffe gwennyini.” Baganda be ne bakkiriziganya naye.

²⁸ⓢ Abasuubuzi, Abayisimayiri bwe baabatuukako ne baggya Yusufu mu bunnya, ne bamuguza Abayisimayiri. Baamubaguza ebitundu bya ffeeza amakumi abiri; ne bamutwala e Misiri.

²⁹Lewubeeni bwe yadda nʼalaga ku bunnya nʼalaba nga Yusufu taliimu, nʼayuza engoye ze,

³⁰nʼaddayo eri baganda be nʼabagamba nti, “Omwana taliiyo. Kale naamunoonyeza wa?”

³¹Awo ne baddira ekyambalo kya Yusufu, ne batta embuzi, ne bakinnyika mu musaayi.

³²Ne baddira ekyambalo ekyo ekyʼamabala amangi ne bakitwalira kitaabwe ne bamugamba nti, “Twalaba ekyambalo kino, kikebere olabe obanga kye kya mutabani wo.”

³³Nʼakyetegereza nʼagamba nti, “Kye kyambalo kya mutabani wange! Ensolo enkambwe yamulya. Ddala Yusufu yataagulwataagulwa.”

³⁴Awo Yakobo nʼayuza ebyambalo bye, nʼakungubagira Yusufu okumala ebbanga ddene.

³⁵Batabani be bonna ne bawala be ne bagenda gyʼali okumusanyusa, kyokka ye nʼatakkiriza kusanyusibwa. Nʼagamba nti, “Nedda, ndikka emagombe nga nkyakungubagira omwana wange Yusufu.” Bwʼatyo Yakobo nʼakungubagira nnyo Yusufu.

³⁶Mu kiseera kyekimu Abamidiyaani bwe baatuuka e Misiri, Yusufu ne bamuguza Potifali, omu ku bakungu ba Falaawo; omukungu oyo ye yali omukulu wa bambowa.