Olubereberye 39:1-23 LGCB2014 - Bible AI

¹Awo Yusufu bwe yatwalibwa e Misiri, Potifali omukungu wa Falaawo, omukulu wʼabambowa Omumisiri nʼamugula okuva ku Bayisimayiri abaamutwala e Misiri.

²ⓣ Mukama nʼaba ne Yusufu nʼaba nʼomukisa ngʼali mu nnyumba ya mukama we Omumisiri.

³Ne mukama we nʼalaba nga Mukama amuwadde omukisa mu buli kyʼakola.

⁴Awo Yusufu nʼaganja nnyo mu maaso ga mukama we, nʼamulabiriranga, nʼamufuula omukulu we nnyumba ye ne byonna bye yalina.

⁵Okuva olwo Mukama nʼawa omukisa ennyumba yʼOmumisiri olwa Yusufu. Omukisa gwa Mukama ne guba ku byonna bye yalina, mu nnyumba ne mu nnimiro.

⁶Awo Omumisiri nʼateeka byonna mu mikono gya Yusufu. Yusufu nʼavunaanyizibwanga byonna okuggyako emmere mukama we gye yalyanga.[33]

⁶Kyokka Yusufu yali mulungi nnyo, mubalagavu.

⁷Awo olwatuuka oluvannyuma lwʼebbanga eriwerako, mukyala wa mukama we namutunuulira nʼokwegomba era nʼamugamba nti, “Weebake nange.”

⁸Naye Yusufu nʼagaana, nʼagamba mukazi wa mukama we nti, “Laba, mukama wange yankwasa byonna ebiri mu nnyumba, nʼabiteeka byonna mu mikono gyange,

⁹era tewali nʼomu ansinga mu nnyumba ye, tewali na kimu kyʼatankwasa okuggyako ggwe, kubanga ggwe oli mukazi we. Kale nnyinza ntya okuyingira mu kwonoona okwenkanidde awo nʼokusobya eri Katonda?”

¹⁰Newaakubadde muka mukama we yamutayirira, Yusufu ye teyamuwulira na mulundi na gumu.

¹¹Naye lwali lumu Yusufu bwe yayingira mu nju okukola emirimu gye nga tewali nʼomu mu nnyumba,

¹²muka mukama we nʼakwata ekyambalo kya Yusufu nga bwʼagamba nti, “Weegatte nange.” Yusufu nʼamwesimatulako, ekyambalo kye ne kisigala mu ngalo zʼomukazi wa mukama we. Ye nʼadduka nʼava mu nnyumba.

¹³Naye omukazi bwe yalaba ngʼasigazza ekyambalo kya Yusufu,

¹⁴nʼayita abasajja abʼomu nnyumba ye nʼabagamba nti, “Mulabe, yatuleetera Omwebbulaniya okutuduulira, yazze gye ndi okwebaka nange,

¹⁵bwʼawulidde nga ndeekaana nʼadduka nʼava mu nnyumba.”

¹⁶Awo kwe kutereka ekyambalo okutuusa mukama wa Yusufu lwe yadda eka.

¹⁷Omukyala nʼabuulira bba byonna ngʼagamba nti, “Omuddu Omwebbulaniya gwe watuleetera, yayingidde gye ndi okunjooga.

¹⁸Naye nabadde nakaleekaana, nʼaleka ekyambalo kye gye ndi, nʼadduka nʼava mu nnyumba.”

¹⁹Awo mukama wa Yusufu bwe yawulira ebigambo omukazi bye yamutegeeza ngʼagamba nti, “Bwʼati ne bwʼati omuddu wo bwe yampisizza,” obusungu bwa bba ne bubuubuuka.

²⁰Mukama wa Yusufu nʼakwata Yusufu nʼamuteeka mu kkomera omwasibirwanga abazzizza emisango eri kabaka.

²¹ⓤ Naye Mukama nʼabeera ne Yusufu, nʼamulaga okwagala kwe okutalojjeka. Nʼaganja nnyo mu maaso gʼomukuumi wʼekkomera.

²²Omukuumi wʼekkomera nʼateeka abasibe bonna mu mikono gya Yusufu, era buli ekyakolebwanga nga Yusufu yʼakirinako obuvunaanyizibwa.

²³Omukuumi wʼekkomera nga tafaayo ku buli ekyalinga mu mikono gya Yusufu, kubanga Mukama yali naye, era Mukama nʼamuwa omukisa mu buli kye yakolanga.