Olubereberye 4:1-26 LGCB2014 - Bible AI

¹ⓒ Adamu nʼamanya Kaawa, mukazi we, nʼaba olubuto nʼazaala Kayini nʼagamba nti, “Mukama annyambye nzadde omuntu.”

²Oluvannyuma nʼazaala muganda we Aberi.

²Aberi nʼaba mulunzi, ye Kayini nʼabeera mulimi.

³ⓓ Awo ennaku bwe zaayitawo Kayini nʼalyoka aleeta ebibala byʼebimera ebyava mu ttaka okubiwaayo eri Katonda.

⁴ⓔ Aberi naye nʼaleeta ku baana bʼendiga ze ababereberye nʼamasavu gaazo. Mukama nʼasiima Aberi nʼekiweebwayo kye.

⁵Naye teyasiima Kayini wadde ekiweebwayo kye. Awo Kayini nʼasunguwala nnyo, ne ndabika yʼamaaso ge nʼewaanyisibwa.

⁶Mukama nʼabuuza Kayini nti, “Osunguwalidde ki? Era nʼendabika yʼamaaso go lwaki ewaanyisiddwa?

⁷Bwʼonookolanga obulungi tokkirizibwenga? Naye bwʼotokole bulungi ekibi, kiri kumpi naawe, nga kikulindiridde, naye oteekwa okukiwangula.”

⁸ⓕ Kayini nʼagamba Aberi muganda we nti, “Tulageko mu nnimiro.” Bwe baali nga bali mu nnimiro Kayini nʼagolokokera ku muganda we Aberi, nʼamutta.

⁹Awo Mukama nʼabuuza Kayini nti, “Muganda wo Aberi ali ludda wa?” Nʼamuddamu nti, “Ssimanyi; nze mukuumi wa muganda wange?”

¹⁰ⓖ Mukama nʼamugamba nti, “Okoze ki? Eddoboozi lyʼomusaayi gwa muganda wo oguyiyiddwa ku ttaka linkaabirira.

¹¹Ne kaakano okolimiddwa, era ettaka lyasamye okumira omusaayi gwa muganda wo gwe wasse.

¹²Bwʼonoolimanga ettaka teriikuwenga bibala byalyo; onoobanga momboze ku nsi.”

¹³Kayini nʼagamba Mukama nti, “Ekibonerezo kyange kinzitooweredde sikisobola.

¹⁴Laba, ongobye okuva ku nsi ne mu maaso go; era nnaabanga momboze ne buli anandaba ananzita.”

¹⁵ⓗ Awo Mukama nʼamugamba nti, “Nedda si bwe kiri. Buli alitta Kayini ndimuwalana emirundi musanvu.”

¹⁶Kayini nʼalyoka ava mu maaso ga Mukama, nʼabeera mu nsi ya Enodi ku luuyi olwʼebuvanjuba olwa Adeni.

¹⁷ⓘ Kayini nʼamanya mukazi we, nʼaba olubuto nʼazaala Enoka. Kayini nʼazimba ekibuga nʼakituuma erinnya lyerimu erya mutabani we Enoka.

¹⁸Enoka nʼazaalirwa Iradi ne Iradi nʼazaala Mekujeeri, ne Mekujeeri nʼazaala Mesuseera, ne Mesuseera nʼazaala Lameka.

¹⁹Lameka nʼawasa abakazi babiri: omu yali Ada nʼomulala nga ye Zira.

²⁰Ada nʼazaala Yabali. Ono ye yali kitaawe wʼabo ababeera mu weema nga balunda.

²¹ⓙ Muganda we Yubali, ye yazaala abo abakuba ennanga nʼokufuuwa omulere.

²²Zira nʼazaala Tubalukayini omuweesi wʼebyʼekikomo nʼebyʼekyuma. Ne mwannyina wa Tubalukayini nga ye Naama.

²³ⓚ Lameka nʼagamba bakazi be nti, “Ada ne Zira, muwulire eddoboozi lyange; mwe bakazi ba Lameka, muwulirize kye ŋŋamba; nzise omusajja olwʼokunfumita, nga muvubuka, olwʼokunkuba.

²⁴ⓛ Obanga Kayini yawalanirwa emirundi musanvu, mazima Lameka wa kuwalanirwa emirundi nsanvu mu musanvu.”

²⁵Awo Adamu nʼamanya mukazi we, nʼazaala omwana wabulenzi nʼamutuuma Seezi, kubanga yayogera nti, “Katonda ampadde omwana omulala mu kifo kya Aberi, Kayini gwe yatta.”

²⁶Seezi nʼazaala omwana owoobulenzi nʼamutuuma Enosi.

²⁶Mu kiseera ekyo abantu ne batandika okukoowoola erinnya lya Mukama.